"އާރްއެސްޑަބްލިއު ސިސްޓަމްތަކާއެކު އައިސް ލިބުމުގެ މައްސަލަ ހައްލުވެ މަސްވެރިންގެ އާމްދަނީ އިތުރުވާނެ"

ލޮނު ފެނުން މަސް ފިނިކުރާ ނިޒާމު ނުވަތަ އާރްއެސްޑަބްލިއު ސިސްޓަމްތައް ޤާއިމްކުރެވިގެންދިއުމާއެކު މަސްވެރިންނަށް އައިސް ލިބުމުގައި ކުރިމަތިވާ ދަތިތަކަށް ހައްލު ލިބި މަސްވެރިންގެ އާމްދަނީ އިތުރުވެގެންދާނެކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙުމަދު ޝިޔާމް ވިދާޅުވެއްޖެއެވެ.

ވަޒީރު މިހެން ވިދާޅުވީ، މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާ އާއި ލައިވްސް އެންޑް ލައިވްލިހުޑް ފަންޑު، އެލްއެލްއެފު ގުޅިގެން ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުންނެވެ.

ލޮނު ފެނުން މަސް ފިނިކުރާ ނިޒާމު ނުވަތަ އާރްއެސްޑަބްލިއު ސިސްޓަމްތައް ޤާއިމްކުރުމާއި ގުޅޭގޮތުން މައުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން މަސްވެރިކަމާއި ކަނޑުގެ ވަސީލަތްތަކާއި ބެހޭ ވަޒީރު އަޙުމަދު ޝިޔާމް ވިދާޅުވީ، ދިވެހިރާއްޖޭގެ މަސްވެރިކަމުގެ ސިނާޢަތަށް ކުރިމަތިވެފައިވާ މައިގަނޑު ގޮންޖެހުންތަކުގެ ތެރޭގައި އައިސް ލިބުމުގެ ދަތިކަމާއި، ތެލުގެ އަގު މަތިވުން ހިމެނޭ ކަމަށެވެ.

މި ދަތިތަކަށް ހައްލު ހޯދުމަށްޓަކައި، ލޮނު ފެނުން މަސް ފިނިކުރާ ނިޒާމު ނުވަތަ އާރްއެސްޑަބްލިއު ސިސްޓަމް ފަދަ ޒަމާނީ ޓެކްނޮލޮޖީތައް ތަޢާރަފުކުރުމާއި، މަސްވެރިންނަށް މާލީ އެހީތެރިކަން ފޯރުކޮށްދިނުމުގެ މުހިންމުކަން ވަޒީރު ފާހަގަކުރެއްވިއެވެ. އަދި މިފަދަ ކަންކަމުގެ ސަބަބުން، މަސްވެރިކަމުގެ ދާއިރާ އިތުރަށް ކުރިއަރައި، މަސްވެރިންގެ އާމްދަނީ އިތުރުވެގެންދާނެކަމަށް އުންމީދުކުރައްވާކަަމށްވެސް ވަޒީރު ޝިޔާމް ވިދާޅުވިއެވެ.

މަސްވެރިކަމާ ބެހޭ ވަޒީރު ވިދާޅުވީ، އާރްއެސްޑަބްލިއު މަޝްރޫޢުގެ މަޤްޞަދަކީ މަސްވެރި އުޅަނދުފަހަރަށް ދެމެހެއްޓެނިވި އަދި ހަކަތައިގެ ޤާބިލުކަން ލިބިފައިވާ ޓެކްނޮލޮޖީއެއް ފޯރުކޮށްދިނުން ކަމަށެވެ. މިނިޒާމުގެ ސަބަބުން، އުޅަނދުފަހަރަށް އައިސްޕްލާންޓްތަކަށް ބަރޯސާނުވެ ބާނާ މަހުގެ ފެންވަރު ދެމެހެއްޓުމުގައި އަމިއްލަ ފުދުންތެރިކަން ހާސިލުކުރެވޭނެ ކަމަށް ވަޒީރު ވިދާޅުވިއެވެ.

"މިޒަމާނަށް ބަލާއިރު މަސްވެރި އުޅަނދުފަހަރުގެ ފްލީޓް އަޕްޑޭޓްކުރުމަކީ ވަރަށް މުހިންމު ކަމެއް. އަޅުގަނޑުމެންގެ ގިނަ އުޅަނދުފަހަރު ބަނދެފައިވަނީ އަހަރުތަކެއް ކުރިންކަމުން، އެ އުޅަނދުފަހަރު މިހާރުގެ މިންގަނޑުތަކާ ނުބައްދަލުވެދާނެ. އެހެންކަމުން، އާރްއެސްޑަބްލިއު ފަދަ އައު ނިޒާމުތަކާއި ތެޔޮ ސަލާމަތްކުރެވޭ އިންޖީނުތައް ބޭނުންކުރުމުގެ ސަބަބުން، އަޅުގަނޑުމެންގެ މަސްވެރިންނަށް އިސްރާފު މަދުކޮށް، ޚަރަދު ކުޑަކޮށް އަދި އެމީހުން ބާނާ މަހުގެ ފެންވަރު ރަނގަޅުކުރުމަށް އެހީތެރިވެދެވޭނެ." މަސްވެރިކަމާއި ބެހޭ ވަޒީރު އަހުމަދު ޝިޔާމް ވިދާޅުވިއެވެ.

ވަޒީރުގެ ވާހަކަފުޅުގައި، މި މަޝްރޫޢުގެ ދަށުން ޤާއިމުކުރެވިފައިވާ އާރްއެސްޑަބްލިއު ފައިނޭންސިންގ ޕްރޮޖެކްޓުގެ ދަށުން، އާންމުކޮށް ފައިނޭންސިންގ ނުލިބޭ ފަރާތްތަކަށް މާލީ އެހީތެރިކަން ފޯރުކޮށްދެވޭނެ ކަމަށްވެސް ވިދާޅުވިއެވެ.