މާލޭގައި އެއްވެސް ބާވަތެއްގެ އެއްވުމެއް ނުވަތަ ހިނގާލުމެއް ބޭއްވޭނީ ހޯމް މިނިސްޓްރީން ޢާންމުކޮށް އިޢުލާންކުރައްވާފައިވާ ތަންތަނުގައި އެކަނިކަމަށް ކަނޑައެޅުއްވުމަށް ޤާނޫނަށް ހުށައެޅުއްވި އިޞްލާޙް މަޖިލީހަށް ބަލައިގެންފިއެވެ. ޞުލްޙަވެރިކަމާއެކު އެއްވެ އުޅުމުގެ މިނިވަންކަމުގެ ޤާނޫނަށް ހުށައަޅުއްވާފައިވާ މި އިޞްލާޙު މަޖިލީހުން ބަލައިގަތުމަށް ފާސްކުރެއްވީ މިއަދު ބޭއްވެވި މަޖިލީހުގެ ޖަލްސާއިންނެވެ.
މި ޖަލްސާގެ ބަހުސް ހޫނުވެ މެދު ހެންވޭރު ދާއިރާގެ މެމްބަރު ޢަލީ ޢާޒިމްގެ ނަން އިއްވެވުމަށްފަހު ވަނީ މަޖިލީހުގެ ތަޅުމުން ބޭރުކުރައްވާފައެވެ. ޖަލްސާގެ ރިޔާސަތުގައި އިންނެވި މަޖިލީހުގެ ނާއިބް ރައީސް މޫސާ މަނިކު ވަނީ މެމްބަރު ޢަލީ ޢާޒިމްގެ ނަން އިއްވެވުމުގެ ކުރިން މަޖިލީހުގެ ޤަވާޢިދަށް ޙުރުމަތްތެރިކޮށް ހިއްތެވުމަށް ތަކުރާރުކޮށް ނަސޭޙަތްތެރި ވެވަޑައިގެންފައެވެ. ނަމަވެސް ރިޔާސަތުގެ އެންގެވުމާ އެއްގޮތަށް ޢާޒިމް ޢަމަލުނު ކުރެއްވުމުން ރިޔާސަތުން ވަނީ އޭނާގެ ނަން އިއްވާފައެވެ.
ޞުލްޙަވެރިކަމާއެކު އެއްވެ އުޅުމުގެ މިނިވަންކަމުގެ ޤާނޫނަށް މާފަންނު ދެކުނު ދާއިރާގެ މެމްބަރު ޢަބްދުﷲ ރިފާޢު ހުށައެޅުއްވި އިޞްލާޙުގައި ވަނީ، މޯލްޑިވްސް ޕޮލިސް ސަރވިސްއިން ލިޔުމުން ދެއްވާ ހުއްދައެއް ލިބިގެން ނޫނީ، މާލޭގައި އެއްވެސް ބާވަތެއްގެ، އެއްވުމެއް ނުވަތަ ހިނގާލުމެއް ނުވަތަ އުޅަނދުބުރެއް ބޭއްވޭނީ ހޯމް މިނިސްޓްރީން ކަނޑައަޅުއްވައި، ޢާންމުކޮށް އިޢުލާން ކުރައްވާފައިވާ ތަންތަނުގައި އެކަނި ކަމަށެވެ. އެގޮތުން އެއްވެ އުޅެވޭނެ ތަންތަނުގެ ލިސްޓް މި ޤާނޫނަށް ޢަމަލްކުރަން ފަށާތާ 30 ދުވަހުގެ ތެރޭގައި ހޯމް މިނިސްޓްރީން ޢާންމުކޮށް އިޢުލާން ކުރައްވައި ސަރުކާރުގެ ގެޒެޓްގައި ޝާއިޢުކުރައްވަން ޖެހޭނެކަމަށް ރިފާޢު ހުށައެޅުއްވި އިޞްލާޙުގައިވެއެވެ. އަދި އެ ލިސްޓަށް އެއްވެސް އުނިއިތުރެއް ގެނެވޭނީ އެ އުނިއިތުރަކަށް ޢަމަލްކުރަން ފެއްޓެވުމުގެ 30 ދުވަސް ކުރިން ހޯމް މިނިސްޓްރީއިން އެކަން ޢާންމުކޮށް އިޢުލާން ކުރައްވައި ގެޒެޓްގައި ޝާއިޢު ކުރެއްވުމަށްފަހުގައި ކަމަށްވެސް އިޞްލާޙުގައިވެއެވެ.
މި އިޞްލާޙު މަޖިލީހުގެ ތަޅުމަށް ހުށައަޅުއްވަމުން މާފަންނު ދެކުނު ދާއިރާގެ މެމްބަރު ޢަބްދުﷲ ރިފާޢު ވިދާޅުވީ، މާލެއަކީ ނިސްބަތުން އާބާދީ ބޮޑު ދުއްވާ އެއްޗިހި ގިނަ، މަގުތައް ހަނި އަދި ކާރުބާރު ބޮޑު ރަށަކަށްވެފައި، މާލޭގެ މަގުތަކުގައި އެއްވެ އުޅުމަކީ އޭގެ ސަބަބުން ރައްޔިތުންނަށް ދަތިއުނދަގުލާއި ނުރައްކާތައް އަދި ޢާންމުންނާއި ރައްޔިތުންގެ މުދަލާއި ތަކެއްޗަށް ގެއްލުންވާނެ ކަމަކަށް ވާތީކަމަށެވެ.
މިބިލްގެ ބަޙުސްގެ މަރުޙަލާގައި ހޫނުގަދަ ބަޙުސްތަކެއް ފެނިގެން ގޮސްފައިވެއެވެ. ސަރުކާރަށް ތާއީދުކުރައްވާ މެމްބަރުން ބިލަށް ތާއީދުކުރައްވާ ވާހަކަ ދެއްކެވިއިރު އިދިކޮޅު މެމްބަރުން ވަނީ ބިލާ ދެކޮޅަށް ވާހަކަ ދައްކަވާފައެވެ. މި ބިލް ބަލައިގަތުމަށްފަހު ވަނީ ދިރާސާކުރެއްވުމަށް ކޮމިޓީއަށް ފޮނުއްވާފައެވެ.