އިނގިރޭސި ޕްރިމިއަރ ލީގުގައި ރޭ ފުލަމްއާ ދެކޮޅަށް ކުޅުނު މެޗުން 2-0 ގެ ނަތީޖާއަކުން ޗެލްސީ މޮޅުވެއްޖެއެވެ.
ލަންޑަނުގެ ސްޓެމްފަޑް ބްރިޖުގައި ކުޅުނު މި މެޗުގައި ދެ ޓީމުގެ ފަރާތުންވެސް ވާދަވެރި ކުޅުމެއް ފެނިގެން ގޮސްފައިވާއިރު މެޗުގެ ފުރަތަމަ ހާފުގައި ފުލަމް އިން ވަނީ ރަގަޅު ކުޅުމެއް ދައްކާފަ އެވެ.
މި މެޗުގެ 13 ވަނަ މިނިޓުގައި ޗެލްސީގެ ފޯވަޑް ލިއާމް ޑެލަޕް އަށް ލިބުނު އަނިޔާގެ ސަބަބުން އޭނާ ވަނީ ބަދަލުކޮށްފަ އެވެ.
އަދި އޭގެ އަށް މިނިޓު ފަހުން ފުލަމްގެ ޖޯޝް ކިންގް ވަނީ ލަނޑެއް ޖަހާ އެ ޓީމަށް ކުރި ހޯދަދިން ނަމަވެސް އެ ލަނޑު ޖެހުމުގެ ކުރިން ޗެލްސީގެ ޓްރެވޯ ޗަލޮބާ އަށް ރޮޑްރިގޯ މުނީޒް ފައުލް ކުރުމާއި ގުޅިގެން ގިނައިރުތަކެއް ވަންދެން ވީޑިއޯ ބެލުމަށްފަހު ރެފްރީ ވަނީ އެ ނިންމުން ބަދަލުކޮށްފަ އެވެ.
މި މެޗުގައި ޗެލްސީ އިން ފުރަތަމަ ލީޑު ނަގާފައިވަނީ މެޗުގެ ފުރަތަމަ ހާފުގެ އިތުރު ވަގުތުގެ ގޮތުގައި ކުޅުނު އަށް މިނިޓުގެ ތެރެއިން ފަހު މިނިޓުގައި ޖޮއާއޯ ޕެޑްރޯ ޖެހި ލަނޑުންނެވެ. އޭނާ މި ލަނޑު ޖަހާފައިވަނީ ޗެލްސީ އަށް ލިބުނު ކޯނަރު އެންޒޯ ފެނާންޑޭޒް ނެގިއިރު އޭރިޔާ ތެރޭގައި ހުރެ ބޮލުން ޖަހާ ގޯލުގެ ތެރެއަށް ފޮނުވާލައިގެންނެވެ.
ޖޮއާއޯ ޕެޑްރޯ މި މެޗުގައި ޖެހި ލަނޑާއެކު އޭނާ ވަނީ ޗެލްސީ އާއި ގުޅުނު ފަހުން އެ ޓީމުގެ ފުރަތަމަ 11 ގައި ހިމެނިގެން ކުޅުނު 5 މެޗުގައި ފަސް ލަނޑު ޖަހާފަ އެވެ.
ޗެލްސީ އިން މި މެޗުގައި ޖެހި ދެވަނަ ލަނޑަކީ މެޗުގެ ދެވަނަ ހާފުގެ ކުޅުން ފެށުނުތާ 11 ވަނަ މިނިޓުގައި އެ ޓީމަށް ލިބުނު ޕެނަލްޓީ އަކުން އެންޒޯ ފެނާންޑޭޒް ކާމިޔާބުކޮށްދީފައިވާ ލަނޑެކެވެ.
މި ނަތީޖާ އާއިއެކު ޗެލްސީ ވަނީ ލީގުގައި މިހާތަނަށް ކުޅުނު ތިން މެޗުންވެސް ބަލިނުވެ ސަލާމަތްވެފަ އެވެ. އެއް މެޗުން އެއްވަރުވެފައިވާއިރު ދެ މެޗުން ޗެލްސީ ވަނީ މޮޅުވެ ހަތް ޕޮއިންޓް ހޯދާފަ އެވެ.