ޚަބަރު

ޢުމަރު މަނިކަށް އެންމެންގެ ހެޔޮ ދުޢާ، ވަޒަންކުރަނީ ކުރެއްވި ޤައުމީ ބޮޑު ޚިދުމަތް


  • ކުރީގެ ރައީސުންނާއި، ދައުލަތުގެ ވެރިން އަދި ފަތުރުވެރިކަމުގެ ދާއިރާގެ އިސްބޭފުޅުން ގެންދަނީ ތަޢުޒިޔާ ދަންނަވަމުން

  • އުމަރު މަނިކު އަވަހާރަވުމަކީ މުޅި ރާއްޖެއަށް ލިބިގެންދިޔަ ހިތާމައެއް

ރާއްޖެއަށް ފަތުރުވެރިކަން ތަޢާރަފްކޮށް، އެ ސިނާއަތު ކުރިއެރުވުމަށް ގިނަގުނަ މަސައްކަތްތަކެއް ކޮށްދެއްވި ނިޝާން މުލީގޭ ޝަރަފުގެ ޢިއްޒަތުގެ ވެރިޔާ މުޙައްމަދު އުމަރު މަނިކު، އަވަހާރަވުމާ ގުޅިގެން ފަތުރުވެރިކަމުގެ ދާއިރާގެ ޚިދުމަތް ތެރެއިންނާއި، ކުރީގެ ރައީސުންނާއި ސިޔާސީ ވެރިން ތަޢުޒިޔާ ވިދާޅުވެއްޖެެއެވެ.

މުޙައްމަދު އުމަރު މަނިކު، އަވަހާރަވުމާ ގުޅިގެން މީސް މީޑިޔާގައި ޙިއްސާކުރެއްވި ޕޯސްޓުގައި ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ ވިދާޅުވީ ދިވެހި ފަތުރުވެރިކަމުގެ އެއްބާނީ، ނިޝާން މުލީގޭ ޝަރަފުގެ އިއްޒަތުގެ ވެރިޔާ މުޙައްމަދު ޢުމަރު މަނިކު އަވަހާރަވި ޚަބަރު އަޑު އެއްސެވީ ނުހަނު ފުން ހިތާމައާއެކު ކަމަށެވެ. އަދި ޢުމަރު މަނިކަކީ ދުނިޔޭގެ އެންމެ މަތީ ފެންވަރުގައި ރާއްޖޭގެ ފަތުރުވެރިކަން ތަރައްޤީކުރެއްވުމަށް އަގުހުރި މަސައްކަތްތަކެއް ކޮށްދެއްވައި، ދިވެހި ދަޢުލަތަށް ގިނަގުނަ ޚިދުމަތްކުރައްވާފައިވާ ބޭފުޅެއްކަމަށެވެ.

ޢަބްދުއްރަޙީމް ވަނީ މަރުޙޫމްގެ ޢާއިލާއަށް ތަޢުޒިޔާ ދަންނަވައި، ސުވަރުގޭގެ ދާއިމީ ނިޢުމަތް މަރުޙޫމަށް މިންވަރުކޮށްދެއްވުމަށް އެދި ދުޢާ ދަންނަވާފައެވެ.

ޢުމަރު މަނިކު އަވަހާރަވުމާއި ގުޅިގެން އެމަނިކުފާނާއި އެކީގައި ފަތުރުވެރިކަމުގެ ދާއިރާގައި މަސައްކަތް ކުރެއްވި ބޭފުޅުންނާއި، އަދި ރާއްޖޭގެ ފަތުުރުވެރިކަން ކުރިއެރުވުމުގައި މަސައްކަތް ކުރައްވަމުންދާ ގިނަ ބޭފުޅުންވެސް ގެންދަަނީ ތަޢުޒިޔާ ދަންނަވަމުންނެވެ. އޮނަރަބަލް ޤާސިމް އިބްރާހިމް ވިދާޅުވީ، އުމަރު މަނިކު އަވަހާރަވުމަކީ މުޅި ރާއްޖެއަށް ލިބިގެންދިޔަ ހިތާމައެއް ކަމަށެވެ. އަދި މިއީ ފަތުރުވެރިކަމުގެ މުޅި އިންޑަސްޓްރީއަށް ލިބިގެންދިޔަ ފުންހިތާމައެއްގެ ގޮތުގައި ޤާސިމް ސިފަކުރެއްވިއެވެ. ޤާސިމްގެ އިތުރުންވެސް ފަތުރުވެރިކަމުގައި ހަރަކާތްތެރިވާ ގިނަ ބޭފުޅުން ގެންދަވަނީ ތައުޒިޔާ ދަންނަވަމުންނެވެ.

މީސްމީޑިޔާގައި ޙިއްސާކުރެއްވި ޕޯސްޓެއްގައި ކުރީގެ ރައީސުންކަމަށްވާ ޢަބްދުﷲ ޔާމީން ޢަބްދުލްޤައްޔޫމާއި އިބްރާހިމް މުޙައްމަދު ޞާލިހާއި، ރައީސް ނަޝީދު ވަނީ ޢުމަރު މަނިކު އަވަހާރަވުމާއި ގުޅިގެން ޢާއިލާއަށް ތަޢުޒިޔާ ދަންނަވާފައެވެ. އަދި ޢުމަރު މަނިކު ޤައުމަށް ކޮށްދެއްވި އަގުހުރި ޚިދުމަތްތަކުގެ އަގުވަޒަންކުރައްވައި، މަރުޙޫމަށް ސުވަރުގޭގެ ދާއިމީ ނިޢުމަތް މިންވަރުކޮށްދެއްވުން އެދި ދުޢާ ދަންނަވާފައެވެ.

މުޙައްމަދު ޢުމަރު މަނިކު އަވަހާރަވުމާ ގުޅިގެން ވަޒީރުންވެސް ވަނީ ތަޢުޒިޔާ ދަންނަވާފައެވެ. ވަޒީރުން ވަނީ މަރުޙޫމް މުޙައްމަދު ޢުމަރު މަނިކަކީ ދިވެހި ފަތުރުވެރިކަމުގެ ދާއިރާގެ އިތުރުން އިޖުތިމާޢީ ދާއިރާއަށްވެސް ނުހަނު ގިނަ ޚިދުމަތްތަކެއްކޮށްދެއްވި ބޭފުޅެއްކަން ފާހަގަކުރައްވާފައެވެ. އަދި ޢާއިލާއަށް ތަޢުޒިޔާ ދަންނަވައި، ސުވަރުގޭގެ މަތިވެރި ނިޢުމަތް މިންވަރުކޮށްދެއްވުން އެދި ދުޢާ ދަންނަވާފައެވެ.

އެމްޔޫ މަނިކު އަވަހާރަވީ ސިއްޙީ ޙާލުކޮޅު ދެރަވެ، ފަރުވާދެމުންދަނިކޮށް ސިންގަޕޫރުގައި، ރޭގެ ވަގުތެއްގައެވެ. ޖަނާޒާ ބޭއްވުމަށް ހަމަޖެހިފަވަނީ މިއަދު އަސުރު، ސިންގަޕޫރުގައެވެ. އަވަހާރަވި އުމުރުފުޅުން 78 އަހަރުފުޅުގައެވެ.

މުޙައްމަދު އުމަރު މަނިކުގެ ޖަނާޒާ ބޭއްވުމަށް ހަމަޖެހިފައިވަނީ ސިންގަޕޫރުގައެވެ. ޖަނާޒާ އޮންނާނީ އަސުރު ނަމާދަށްފަހު މަސްޖިދް ޕްސާރާ އަމަންގައެވެ.