ނިމުނު ހަފްތާ: ބޯހިޔާވަހިކަން، އެއްފަސްކުރުން، ތަރައްޤީގެ އެތައް މަޝްރޫޢުތަކެއް

ނިމުނު ހަފްތާގައިވެސް އެކިއެކި ދާއިރާތަކުން ފާހަގަކޮށްލެވޭ މުހިންމު ކަންތައްތަކެއް ހިނގައިދިޔައެވެ. (24 އޮގަސްޓް) އެގޮތުން މިއަހަރުގެ ޤައުމީ ދުވަސް ކުލަގަދަކޮށް، ހއ. އުތީމުގައި ފާހަގަކުރި ޚަބަރު ފާހަގަކޮށްލެވެއެވެ. ޤައުމީ ދުވަހުގެ މުނާސަބަތުގައި އުތީމުގައި އޮތް ޖަލްސާގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާއި ދައުލަތުގެ އިސްވެރިން ބައިވެރިވެވަޑައިގެންނެވިއެވެ. މި ޖަލްސާގައި ދިވެހި ޤައުމިއްޔަތަށް ޚިދުމަތް ކުރުމުގެ ޚާއްޞަ ޝަރަފު، އުތީމު ރައްޔިތުންނަށް ރައީސް ވަނީ އަރުވާފައެވެ. އަދި ނިޝާން ދިޔަމިގިލީގޭ ޝަރަފުގެ ޢިއްޒަތް، ދިވެހި ދައުލަތަށް 40 އަށްވުރެ ގިނަ އަހަރު ޚިދުމަތްކުރައްވާފައިވާ އުތީމު އާދަމް ޢަބްދުއްރަޙްމާނަށް ވަނީ އަރުވާފައެވެ.

(24 އޮގަސްޓް) އުތީމުގައި ޤާއުމީ ދުވަސް ފާހަގަކުރެއްވުމަށްފަހު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ތިލަދުންމަތީ ދެކުނުބުރީގެ ރަށްރަށަށް ދަތުރުފުޅެއް ފަށްޓަވާފައެވެ. މި ދަތުރުފުޅުގެ ތެރެއިން ރަށްރަށުގެ ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކާއި ބައްދަލުކުރައްވައި، އެ ފަރާތްތައކުގެ ކަންބޮޑުވުންތައް އައްސަވައި، ރައްޔިތުންނާވެސް ރައީސުލްޖުމްހޫރިއްޔާ ބައްދަލުކުރެއްވިއެވެ.

ހދ. އަތޮޅު ދަތުރުފުޅުގެ އުސްއަލިތައް:

• (24 އޮގަސްޓް) ކޮންމެ ގޯއްޗަކަށް ގޯއްޗެއް ލިބޭގޮތަށް 18 މަސް ދުވަހުގެ ތެރޭގައި ހިރިމަރަދޫ ރައްޔިތުން ހަނިމާދޫއަށް ބަދަލުކުރަން ނިންމަވައި، މަސައްކަތް އެޗްޑީސީއާ ހަވާލުކުރުން
• (25 އޮގަސްޓް) ހަނިމާދޫ އެއަރޕޯޓު ނޮވެމްބަރުމަހަށް ނިންމައި ބޭނުންކުރަން ފެށޭނެކަމަށް ރައީސުލްޖުމްހޫރިއްޔާ ވިދާޅުވުން
• (25 އޮގަސްޓް) އަންނަ މަހު ހަނިމާދޫގައި 500 ހައުސިން ޔުނިޓުގެ މަސައްކަތް ފަށްޓަވާނެކަން ހާމަކުރެއްވުން
• (25 އޮގަސްޓް) ހަނިމާދޫގައި ތަރައްޤީކުރާ 30 އެނދުގެ އައު ހޮސްޕިޓަލުގެ ޢަމަލީ މަސައްކަތް ފެށުން
• (25 އޮގަސްޓް) ހދ. ނާގޯށީގައި ރިސޯޓު ތަރައްޤީކުރުމުގެ ޢަމަލީ މަސައްކަތް ފެށުން
• (26 އޮގަސްޓް) ކުޅުދުއްފުށި ސިޓީގައި 2000 ހައުސިންގ ޔުނިޓު ތަރައްޤީކުރަން އެޗްޑީސީއާ ހަވާލުކުރުން
• (26 އޮގަސްޓް) ނޮވެންބަރު މަހުން ފެށިގެން ކަށި މިޔަރުގެ މަސްވެރިކަމަށް ހުޅުވާލަން ރައީސް ނިންމެވުން
• (27 އޮގަސްޓް) ހދ. އަތޮޅުގައި އޭޓީއެމް ނެތް ރަށްރަށުގައި އޭޓީއެމްގެ ޚިދުމަތް ފަށައި، ހުރިހާ ރަށެއްގައި އޭޓީއެމް ޤާއިމުކުރި 9 ވަނަ އަތޮޅަކަށް ހދ. އަތޮޅުވުން

ސިޔާސީ ދާއިރާ:

(25 އޮގަސްޓް) ނިމުނު ހަފްތާގައި ސިޔާސީ ދާއިރާއިން ފާހަގަކޮށްލެވޭ ޚަބަރުތަކަށް ބަލާލާއިރު، ހަރުކަށި ފިޔަވަޅު އެޅޭގޮތަށް ހެދި ގޭންގު ކުށްތަކާއި އެ ނޫންވެސް ނުރައްކާތެރި ކުށްތައް ހުއްޓުވުމުގެ ޤާނޫނަށް ޢަމަލުކުރަން ފެށި ޚަބަރު ފާހަގަކޮށްލެވެއެވެ. މި ޤާނޫނުގައި އިންތިޒާމުވެގެން ހިންގާ ކުށްތައް ހުއްޓުވުމަށްޓަކައި ހަރުކަށި އަދަބުތަކެއް ކަނޑައަޅާފައިވެއެވެ. މި ޤާނޫނަށް ޢަމަލުކުރަން ފެށީ މިދިޔަ ހޯމަ ދުވަހުއެވެ. އދ.ގެ ހިއުމަން ރައިޓްސް ކައުންސިލްގެ ނައިބަކަށް ރާއްޖެ އިންތިޚާބުވީވެސް ހަމަ އެ ދުވަހުއެވެ.

(26 އޮގަސްޓް) ހަމައެއާއެކު މާލީ ކަންކަމާއި ތަރައްޤީގެ ރޭވުންތެރިކަމާ ބެހޭ ވަޒީރުގެ ޚާއްސަ އެޑްވައިޒަރަކަށް ކުރީގެ ވަޒީރު ހަމްދޫން ހަމީދު ހަމަޖެއްސެވި ޚަބަރުވެސް ފާހަގަކޮށްލެވެއެވެ. (27 އޮގަސްޓް) އަދި ހިއުމަން ރައިޓްސް ކޮމިޝަން އޮފް ދި މޯލްޑިވްސް، އެޗްއާރުސީއެމްގެ މެންބަރުކަމަށް އަޙްމަދު މަޤުސޫމް އައްޔަންކުރަން މަޖިލީހުން ރުހުންދެއްވާފައިވާއިރު، ސިވިލް ސަރވިސް ކޮމިޝަނަށް ކޮމިޝަނުގެ ރައީސް މުޙައްމަދު ނާޞިހު އިތުރު ދައުރަކަށް އައްޔަންކުރަން މަޖިލީހުން ރުހުންދެއްވީވެސް ނިމުނު ހަފުތާގައެވެ. ނާޞިހުގެ އިތުރުން ޑރ. ދީބާ މޫސާއާއި ޑރ. ހުސައިން ފާއިޒު އައްޔަންކުރަންވެސް މަޖިލީހުން ރުހުންދެއްވިއެވެ.

އެހެނިހެން ދާއިރާތައް:

(26 އޮގަސްޓް) އެހެނިހެން ދާއިރާތަކުން ފާހަގަކޮށްލެވޭ ޚަބަރުތަކަށް ބަލާލާއިރު، ތުލުސްދޫ ކައިރިއަށް ދޯންޏެއް ބަންޑުންޖަހާލި ހާދިސާގައި ދިވެއްސަކު ނިޔާވި ޚަބަރު ފާހަގަކޮށްލެވެއެވެ. (24 އޮގަސްޓް) އަދި ޕަބްލިކް ސަރވިސް މީޑިޔާ، ޕީއެސްއެމުން "ޗާލު ދިވެހިރާއްޖެ"ގެ ނަމުގައި އެވޯޑެއް ތަޢާރަފުކުރި ޚަބަރުވެސް ފާހަގަކޮށްލެވެއެވެ. މި އެވޯޑަކީ ރާއްޖޭގެ ރަށްރަށުގެ ރައްޔިތުންގެ އިސްނެގުމާއެކު، ރާއްޖޭގެ ތިމާވެށި ހިމާޔަތްކޮށް ރައްކާތެރިކުރުމަށް ކުރާ މަސައްކަތްތަކާއި ދިވެހީންގެ މުއްސަނދި އާދަކާދައާއި ސަގާފަތް ކުރިއެރުވުމަށް ރަށްރަށުން ކުރާ މަސައްކަތްތައް ދެނެގަނެ، އެ މަސައްކަތުގެ އަގު ވަޒަންކުރުމުގެ ގޮތުން ދެވޭ އެވޯޑެކެވެ.