ވިޒިޓް މޯލްޑިވްސްގެ ގްލޯބަލް އެމްބެސަޑަރަކަށް "ވަން ޕީސް"ގެ ތަރި ޓެޒް ސްކައިލަރ

ނެޓްފިލްކްސްގެ އެންމެ ކާމިޔާބު ޝޯވގެ ރެކޯޑް ބިންދާލާފައިވާ "ވަން ޕީސް" ސީރީޒްގެ ތަރި ޓެޒް ސްކައިލަރ، ވިޒިޓް މޯލްޑިވްސް ކޯޕަރޭޝަންގެ ގްލޯބަލް އެމްބެސަޑަރެއްގެ ގޮތުގައި ހަމަޖައްސައިފިއެވެ.

"ވަން ޕީސް"ގެ ސްޓްރޯ ހެޓް ޕައިރޭޓްސްގެ ފަންނުވެރި ކައްކާ ސަންޖީގެ ދައުރު އަދާކުރާ ސްކައިލަރ، އޭނާގެ އެމްބެސެޑަރޝިޕްގެ ތެރޭގައި ދިވެހިރާއްޖޭގެ ހިތްގައިމު ޤުދުރަތީ ރީތިކަމާއި، ސަގާފީ މުއްސަނދިކަމާއި، ދެމެހެއްޓެނިވި ފަތުރުވެރިކަމާއި، އަދި ޚާއްސަކޮށް އެޑްވެންޗަރ ފަތުރުވެރިކަމުގެ ފުރުސަތުތައް އިޝްތިހާރުކުރުމުގައި ހަރަކާތްތެރިވާނެކަމަށް ވިޒިޓް މޯލްޑިވްސްއިން ވިދާޅުވެއެވެ.

ނެޓްފްލިކްސްގެ "ވަން ޕީސް" ވަނީ މި ސްޓްރީމިންގ ޕްލެޓްފޯމް ކުރިން ނުދެކޭފަދަ ކާމިޔާބީއެއް ހޯދާފައެވެ. މި ސީރީޒް ނެރުމާއެކު، 84 ޤައުމެއްގައި އެންމެ ގިނައިން ބަލާ ޝޯއަށް ވެގެން ދިޔައެވެ. މިއީ ކުރިން "ވެޑްނެސްޑޭ" އަދި "ސްޓްރޭންޖަރ ތިންގްސް"އިން ހޯދާފައިވާ ރެކޯޑުތައް މުގުރާލި ކާމިޔާބީއެކެވެ. މި ސީރީޒް އަކީ މިހާތަނަށް އެންމެ ރަނގަޅު ލައިވް-އެކްޝަން އެނިމޭ އެޑަޕްޓޭޝަންތަކުގެ ތެރެއިން އެއް އެޑަޕްޓޭޝަންކަމަށް ފާޑުކިޔުންތެރިންނާއި ފޭނުންގެ ތަޢުރީފު ލިބިފައިވެއެވެ.

އިންސްޓަގްރާމްގައި 1.8 މިލިޔަނަށްވުރެ ގިނަ ފޮލޯވަރުން ތިބި ސްކައިލަރގެ ޕޯސްޓުތަކަށް އެވްރެޖްކޮށް 45،000 ލައިކް އަދި 300އަށްވުރެ ގިނަ ކޮމެންޓް ލިބެއެވެ. މިފަދަ ނުފޫޒެއް އޮތުމުން، ބައިނަލްއަޤްވާމީ އޯޑިއަންސްތަކަކާ ހަމައަށް ރާއްޖޭގެ ގުދުރަތީ ރީތިކަމާއި، ދިވެހީންގެ އާދަކާދައާއި، ރާއްޖޭގެ ކަލިނަރީ އަދި އެޑްވެންޗަރ ފަތުރުވެރިކަމުގެ ވާހަކަތައް، ދިވެހިވަންތަކަމާއި ޝައުގުވެރިކަމާއެކު ދައްކުވާދިނުމުގެ ފުރުޞަތު ލިބިގެންދާނެ ކަމަށް ވިޒިޓް މޯލްޑިވްސްއިން ވިދާޅުވެއެވެ.

ވިޒިޓް މޯލްޑިވްސްއިން ވިދާޅުވީ، މިމަހުގެ 27ވަނަ ދުވަހުން ފެށިގެން އަންނަ ސެޕްޓެމްބަރު މަހުގެ 15ވަނަ ދުވަހާއި ހަމައަށް ސްކައިލަރ ރާއްޖެއަށް ޒިޔާރަތްކުރައްވާނެ ކަމަށެވެ. އަދި އޭނާގެ މި ދަތުރުގައި ރާއްޖެ އިޝްތިހާރުކުރުމަށް ގިނަ މަސައްކަތްތަކެއް ކުރައްވާނެކަމަށެވެ.

ވިޒިޓް މޯލްޑިވްސްގެ ގްލޯބަލް އެމްބެސެޑާޝިޕް ޕްރޮގްރާމަކީ ބައިނަލްއަގްވާމީ އޯޑިއަންސްތަކުގެ ތަފާތު ގިންތިތަކަކަށް ދިވެހިރާއްޖެ ޕްރޮމޯޓްކުރުމުގެ މަގުސަދުގައި ކުރިއަށްގެންދާ ޕްރޮގްރާމެކެވެ. އަދި މަޝްހޫރު ޝަހްސިއްޔަތުތަކުގެ މާކެޓިން ނުފޫޒާއެކު، ދިވެހިރާއްޖެއަކީ ބައިނަލްއަގްވާމީ އިންފްލުއެންސަރުން އެންމެ ގިނައިން ވާހަކަދައްކާ މަންޒިލުތަކުގެ ތެރެއިން އެއް މަންޒިލަށް ހެދުމާއި، މަންޒިލަށް އާ ދޮރުތައް ހުޅުވުމާއި، އެފަރާތްތަކުގެ އަމިއްލަ ތަޖުރިބާގެ އަލީގައި ދިވެހިރާއްޖޭގެ ދުނިޔޭގެ ފެންވަރުގެ ފަތުރުވެރިކަމާއި، ދިވެހި ސަގާފީ ތަޖުރިބާތަކާއި ދިރިއުޅުމުގެ ވައްޓަފާޅި ދައްކުވައިދިނުމަކީވެސް މި ޕްރޮގްރާމުގެ އެއް ބޭނުމެވެ.