މަރިޔަމް ޒުބައިރު ރައީސްގެ ދަރިކަލުންގެ އަބުރުގެ ރައްކާތެރިކުރުމުގެ ޙައްގު ނިގުޅައިގެންފައިވާކަން ސާބިތުވާކަމަށް ހުކުމްކޮށްފި

މަރިޔަމް ޒުބައިރު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ދަރިކަލުންގެ އަބުރުގެ ރައްކާތެރިކުރުމުގެ ޙައްގު ނިގުޅައިގެންފައިވާކަން ސާބިތުވާކަމަށް ސިވިލް ކޯޓުން ހުކުމްކޮށްފިއެވެ.

ސިވިލް ކޯޓުން މިގޮތަށް ހުކުމް ކުރީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ދޮށީ ފިރިހެން ދަރިކަލުންގެ ހައްޤުތަކަށް އަރައިގަތް މައްސަލަ ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދުގެ ފަރާތުން ހުށަހެޅުއްވުމުންނެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ދަރިކަލުންގެ ކަރާމާތަށް އަރައިގަނެ، ދޮގު ވާހަކަތަކެއް ފަތުރާފައިވާކަމަށް ބުނެ މައްސަލަ ހުށަހެޅުއްވީ ގަލޮޅު ދެކުނު ދާއިރާގެ މެމްބަރު މީކާއިލް އަހުމަދު ނަސީމްގެ މަންމާފުޅު، އަދި އެމްޑީޕީގެ އިސް އެކްޓިވިސްޓެއްކަމަށްވާ މަރިޔަމް ޒުބައިރު، މަންދީއާއި އެމްޑީޕީގެ ޗެއަރޕާސަން ފައްޔާޒް އިސްމާއިލް އަދި އެމްޑީޕީއާ ދެކޮޅަށެވެ.

މި މައްސަލައާއި ގުޅިގެން ރައީސުލްޖުމްހޫރިއްޔާގެ އާއިލާ ތަމްސީލުކުރައްވާ ޤާނޫނީ ވަކީލުންގެ ޓީމުން ވިދާޅުވީ، ދިވެހިރައްޔިތުންގެ ޑިމޮކްރެޓިކް ޕާޓީން، ފާއިތުވި މާރިޗުމަހުގެ ތެރޭގައި މާލޭގައި ބޭއްވި ސިލްސިލާ މުޒާހަރާތަކުގެ ތެރޭގައި، އެޕާޓީގެ އެކްޓިވިސްޓެއް ކަމުގައިވާ މަރިޔަމް ޒުބައިރު، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ދޮށީ ދަރިކަލުންނަށް ނިސްބަތްކޮށް ދައްކާފައިވާ ވާހަކަތަކުގެ ސަބަބުން، ދަރިކަލުންގެ ނަފްސަށާއި ފުރާނައަށް ނުރައްކާވާނޭ ޙާލަތެއް މެދުވެރިކުރުވައި، އެކުއްޖާގެ ކިޔެވުމާއި މުސްތަޤުބަލަށް ބޮޑެތި ގެއްލުންތަކެއް ކުރިމަތިވާނޭ ޙާލަތެއް މެދުވެރިކުރުވި ކަމަށެވެ. އެހެންވެ އެކުއްޖާގެ މަންމަ އަދި ރައީސުލްޖުމްހޫރިއްޔާގެ އަނބިކަނބަލުން ސާޖީދާ މުޙައްމަދުގެ ފަރާތްޕުޅުން ސިވިލް ކޯޓުގެ އިތުރުން ފެމިލީ ކޯޓަކަށްވެސް މައްސަލަ ހުށަހަޅުއްވި ކަމަށެވެ.

ރައީސުލްޖުމްހޫރިއްޔާގެ އަނބިކަނބަލުންގެ ފަރާތްޕުޅުން ސިވިލް ކޯޓަށް ހުށަހަޅުއްވާފައިވަނީ ޤާނޫނުއަސާސީން ކަށަވަރުކޮށްދީފައިވާ ނަމާއި އަބުރު ރައްކާތެރިކުރެވިފައިއޮތުމުގެ ޙައްޤު ނިގުޅައިގެންފައިވާ މައްސަލައެކެވެ.

މި މައްސަލައާ ގުޅިގެން ސިވިލް ކޯޓުން ކުރި ހުކުމުގައި ބުނެފައިވަނީ ޤާނޫނުއަސާސީން ކުޑަކުދިންނަށް ލިބިދޭ ނަމާއި އަބުރުގެ ރައްކާތެރިކުރެވިފައިވުމުގެ ޙައްގާއި އެކި މުއާހަދާތަކުން ލިބޭ ޢިއްޒަތާއި އަބުރު ރައްކާތެރިވެފައިވުމުގެ ޙައްގު ރައީސުލްޖުމްހޫރިއްޔާގެ ދަރިކަލުންގެ ފަރާތުން ނިގުޅައިގެންފައިވާކަން ލިޔެކިޔުންތަކުން ސާބިތުވާ ކަމަށެވެ. އަދި ގެއްލުމުގެ ބަދަލު ހޯދަން ރައީސުލްޖުމްހޫރިއްޔާގެ އަނބިކަނބަލުންނަށް ދައުވާ ކުރެވޭނެ ކަމަށްވެސް ވަނީ ހުކުމުގައި ބުނެފައެވެ.

މި މައްސަލައިގައި މަރިޔަމް ޒުބައިރު ރައީސުލްޖުމްހޫރިއްޔާގެ ދަރިކަލުންގެ ޙައްގަށް އަރައިގެންފައިވާކަން ސާބިތުވި ނަމަވެސް ފައްޔާޒާއި އެމްޑީޕީ ޒިންމާ ކުރެވެން ނެތް ކަމަށްވެސް ވަނީ ހުކުމުގައި ބަޔާންކޮށްފައެވެ.

ރައީސްގެ އަނބިކަނބަލުންގެ ވަކީލުންގެ ޓީމުން ވިދާޅުވެފައިވާގޮތުގައި ރައީސުލްޖުމްހޫރިއްޔާގެ އަނބިކަނބަލުންގެ ފަރާތްޕުޅުން އެ މައްސަލަ ހުށަހަޅުއްވާފައިވަނީ އެކަމަނާގެ ބޭފުޅުންނަށް ރައްކާތެރިކަން ހޯދުމަށް މަންމައެއްގެ ހައިސިއްޔަތުންނާއި މާދަމާ އެ މަޤާމުތަކުގައި ތިބެދާނޭ އެހެންކުދިންނަށް ރައްކާތެރިކަން ޔަޤީންވެފައި އޮތުމަކީ، ކޮންމެހެން ބޭނުންކަމެއްކަމުގައި ދެކެވަޑައިގަންނަވާތީ ކަމަށެވެ.