މި އަހަރުގެ މިހާތަނަށް 50 އަށްވުރެ ގިނަ ކުޅިވަރުގެ މަޝްރޫއުތައް ނިންމައި ހަވާލުކުރެވިއްޖެ: ވަޒީރު ރާފިޢު
މި އަހަރުގެ މިހާތަނަށް 50 އަށްވުރެ ގިނަ ކުޅިވަރުގެ މަޝްރޫއުތައް ނިންމައި ރައްޔިތުންނާ ހަވާލުކުރެވިއްޖެ ކަމަށް ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެއެވެ.
ޕީއެންސީ ހަރުގެ ޖަލްސާގައި ވާހަކަދައްކަވަމުން ކުޅިވަރު ވަޒީރު އިތުރަށް ވިދާޅުވީ މިއަހަރަކީ ކުޅިވަރުގެ ވުޒާރާއިން އެންމެ ގިނަ މަޝްރޫޢުތައް ނިންމާ ހަވާލުކުރާނެ އަހަރަށްވެގެންދާނެކަމަށެވެ. މިގޮތުން ކުޅިވަރުގެ ވުޒާރާއިން މިހާތަނަށް ނިންމާފައިވާ 50 އަށްވުރެ ގިނަ މަޝްރޫއުތަކުގެ ތެރޭގައި ކުޅިވަރުގެ އެކި ވަސީލަތްތައް ހިމެނޭކަމަށް ވަޒީރު ރާފިޢު ހާމަކުރެއްވިއެވެ.
"ކުޅިވަރުގެވެސް އެކި ވަސީލަތްތައް އަޅުގަނޑުމެން މިހާރުވެސް މިހާތަނަށް އައި އިރުގައި ފަންސާހަށްވުރެ ގިނަ ޕްރެޖެކްޓު އެއްކޮށް ނިންމާ ރައްޔިތުންނާވަނީ ހަވާލުކޮށްފަ، އަދި އިރާދަކުރެއްވިއްޔާ މިއަހަރުވެގެންދާނީ ދިވެހިރާއްޖޭގެ ކުޅިވަރުގެ ވުޒާރާއިން މިހާތަނަށް އެންމެ ގިނަ މަޝްރޫޢުތައްކޮށް އެ މަޝްރޫޢުތަކަށް ހައްލު ގެނެސްދޭ އަހަރަކަށް" ވަޒީރު ވިދާޅުވިއެވެ.
ރާއްޖޭގެ ހުރިހާ ހިސާބެއްގައި ކުޅިވަރުގެ ވަސީލަތްތައް ޤާއިމުކުރުމަށް ސަރުކާރުން ގެންދަވަނީ ގިނަގުނަ މަސައްކަތްތައް ކުރައްވަމުންނެވެ. މިގޮތުން މިއަހަރުގެ މޭމަހުގެ ތެރޭގައި ހުއްޓިފައިހުރި ބައެއް ކުޅިވަރު މަޝްރޫއުތައް ނިންމުމަށް ސަރުކާރުގެ ފަރާތުން ފެނަކަ ކޯޕަރޭޝަނާއި، ރޯޑް ޑިވެލޮޕްމަންޓް ކޯޕަރޭޝަން (އާރްޑީސީއާ) އަދި މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އާވެސް ވަނީ ހަވާލުކޮށްފައެވެ.
ހުއްޓިފައިވާ ކުޅިވަރު މަޝްރޫޢުތައް ނިންމާ ރައްޔިތުންނާ ހަވާލުކޮށްދެއްވުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅެކެވެ. އެގޮތުން މި މަޝްރޫއުތައް ނިންމުމުގެ މަސައްކަތް ސަރުކާރުން މިދިޔަ އަހަރު ފަށާފަވާއިރު، މި މަޝްރޫއުތަކުގެ ބޮޑުބައެއް މިހާރުވަނީ ނިންމާ ހަވާލުކޮށްފައެވެ. އަދި މި މަސައްކަތްތައް ވީހާވެސް އަވަހަށް ހަރުދަނާ ގޮތެއްގައި ނިންމެވުމަކީ ރައީސުލްޖުމްހޫރިއްޔާގެ ވަޢުދުފުޅެގެ ތެރޭގައި ހިމެނޭ ކަމެކެވެ.
ކުޅިވަރާ ބެހޭ ޤާނޫނަށް ގެނެވުނު އިޞްލާޙާއެކު މިބިލު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުވަނީ މިއަހަރުގެ މޭމަހުގެ ތެރޭގައި ތަސްދީގުކުރައްވާފައެވެ. އިސްލާހުކުރެވުނު ކުޅިވަރު ގާނޫނުގެ ދަށުން ހެދިގެންދާ ޤައުމީ ކުޅިވަރު ފަންޑަށް ޖަމާކުރެވޭ ފައިސާއިން، ފަންޑުގެ މަޤްޞަދުތައް ޙާޞިލުކުރުމަށްޓަކައި ފަންޑުން ކުރެވޭ ހޭދައިގެ މިންވަރު އިތުރުކުރުމަށް، ޤާނޫނު ހުއްދަކުރާ މިންވަރަކުން އިންވެސްޓްކުރުމަށްވަނީ ހަމަޖެހިފައެވެ.
"ޤައުމީ ކުޅިވަރު ފަންޑު"ގެ ނަމުގައި ފަންޑެއް ގާއިމުކުރެއްވުމަށް ރައީސުލްޖުމްހޫރިއްޔާ ނިންމެވީ، ދިވެހި ކުޅުންތެރިންނާއި އެތުލީޓުން އިތުރުކޮށް، ކުޅިވަރު ކުރިއަރުވައި ތަރައްޤީކުރުމަށާއި، ދިވެހި ކުޅިވަރު ޖަމާޢަތް ނުވަތަ ކުޅިވަރު ޢާއިލާ ބާރުވެރިކުރުވުމުގެ މަޤްޞަދުގައެވެ.