ތިނަދޫގައި ލޯންޗު އެކްސިޑެންޓެއް ހިނގައި 4 މީހަކަށް އަނިޔާވެއްޖެ
-
ލޯންޗުގައި ތިބި 2 ފަސިންޖަރަކަށާއި، ކެޕްޓަނާއި ފަޅުވެރިޔާއަށް އަނިޔާވެފައިވޭ
ތިނަދޫގައި ނުރައްކާތެރި ލޯންޗު އެކްސިޑެންޓެއް ހިނގައި، 4 މީހަކަށް އަނިޔާވެއްޖެއެވެ.
ފުލުހުން ވިދާޅުވީ ތިނަދޫ ސިޓީ ފެރީ ޓާމިނަލް ޖެޓީއަށް ކައިރި ކުރި ލޯންޗެއް ކޮންޓްރޯލް ނުވެގޮސް ޖެޓީގައި ޖެހި އެކްސިޑެންޓް ވެފައިވާކަމުގެ މައުލޫމާތު މިއަދު މެންދުރު 01:50 އެހާކަންހާއިރު ފުލުހުންނަށް ލިބިފާވާކަމަށެވެ.
އެލޯންޗްގައި ތިބީ 3 އަންހެނުންނާއި، 1 އަހަރުގެ ތުއްތު ކުއްޖެއްގެ އިތުރުން ލޯންޗްގެ ކެޕްޓަނާއި، ފަޅުވެރިޔާ ހިމެނޭހެން ޖުމްލަ 6 މީހުންކަމަށް ފުލުހުން މަޢުލޫމާތުދެއްވިއެވެ.
ފުލުހުން ވިދާޅުވީ މި އެކްސިޑެންޓްގައި ލޯންޗުގައި ތިބި 2 ފަސިންޖަރަކަށާއި، ކެޕްޓަނާއި، ފަޅުވެރިޔާއަށް އަނިޔާވެފައިވާކަމަށެވެ. އަނިޔާވެފައިވަނީ ކެޕްޓަނާއި ފަޅުވެރިޔާގެ އިތުރުން 2 އަންހެނަކަށެވެ.
އަނިޔާލިބުނު މީހުންނަށް ޑރ. ޢަބްދުއްސަމަދު މެމޯރިއަލް ހޮސްޕިޓަލުގައި ފަރުވާ ދެމުން ދާކަމަށް ފުލުހުން ވިދާޅުވިއެވެ.
މި މައްސަަލަ ފުލުހުން ގެންދަނީ ތަހުގީގު ކުރަމުންނެވެ.