މެލޭޝިއާގައި ހުންނަ ރާއްޖޭގެ ހައިކޮމިޝަންގެ ފަރާތުން، ރާއްޖޭގެ މިނިވަންދުވަސް ފާހަގަކުރެއްވުމަށް މެލޭޝިއާގައި ޚާއްޞަ ޙަފްލާއެއް ބާއްވަވައިފިއެވެ.
ކުއަލަލަންޕޫރުގައި ހުންނަ ސެރީ ޕެސިފިކް ހޮޓެލްގައި ބޭއްވި މި ޙަފްލާގައި ރާއްޖެއިން މެލޭޝިއާއަށް ކަނޑައަޅާފައި ހުންނަވާ ސަފީރު މުޙައްމަދު ފަހުމީ ޙަސަން ދެއްކެވި ވާހަކަފުޅުގައި މިނިވަންކަން ދެމެހެއްޓުމަށްޓަކައި ބައިބައިވުންތައް ނައްތާލައި ހުރިހާ ރައްޔިތުން ގުޅިގެން މަސައްކަތް ކުރުމުގެ މުހިންމުކަން ފާހަގަކުރެއްވިއެވެ. އަދި މެލޭޝިއާގައި ދިރިއުޅޭ ރައްޔިތުން އެކުވެރިކަމާއެކު ދިރިއުޅުމަށާއި، ޑްރަގްފަދަ ނުރަނގަޅު ކަންކަމުން ދުރުހެލިވުމަށް އިލްތިމާސްކުރެއްވިއެވެ. އަދި މެލޭޝިއާގައި ދިރިއުޅޭ ރައްޔިތުންނަށް ކަންކަން ފަހިކޮށްދެއްވުމަށް ސަރުކާރުން ކުރައްވަމުންދާ މަސައްކަތްޕުޅު ފާހަގަކުރެއްވިއެވެ. މިނިވަން ދުވަހުގެ މުނާޞަބަތުގައި މެލޭޝިއާގައި ބޭއްވި ޙަފްލާގައި ދުވަހާ ގުޅުވައިގެން ޚާއްޞަ މިއުޒިކް ޝޯއެއްވެސް ކުރިއަށްގެންދަވާފައިވާކަމަށް މެލޭޝިއާގައި ހުންނަ ރާއްޖޭގެ ހައިކޮމިޝަނުން މައުލޫމާތުދެއްވައެވެ.
މެލޭޝިއާގެ ވެރިރަށް ކުއަލަލަންޕޫރުގައި ބޭއްވި މި ޙަފްލާގައި މެލޭޝިއާގައި ދިރިއުޅޭ ދިވެހިންގެ ގާތްގަނޑަކަށް 400 ރައްޔިތުން ބައިވެރިވިކަމަށް މެލޭޝިއާ ހައިކޮމިޝަނުން މައުލޫމާތުދެއްވައެވެ.