ތުރުކީވިލާތަށް ގެންނަން މަސައްކަތްކުރި ނާކާމިޔާބު ބަޣާވާތާ ގުޅިގެން ސިފައިންގެ އިސް ޖެނެރަލުންނާއި ކޮމާންޑަރުންގެ ތެރެއިން އެތައް ސަތޭކަ ބަޔަކު މަޤާމުން ވަކިކުރުމަށް އެޤައުމުގެ ސަރުކާރުން އަމުރުކޮށްފިއެވެ. މީގެއިތުރުން ތުރުކީވިލާތުގެ ޚަބަރުފަތުރާ ވަޞީލަތްތަކުގެ ތެރެއިން ގިނައަދަދެއްގެ މުއައްސަސާތައް ބަންދުކޮށް، ގިނަ އަދަދެއްގެ ނޫސްވެރިންގެ މައްޗަށް ޝަރީޢަތް ހިންގާނެކަމާއި ސަރުކާރުގެ މުވައްޒަފުންގެ ތެރެއިން އެތައްހާސް ބަޔަކު މަގާމުން ވަކިކުރިކަންވެސް ތުރުކީ ސަރުކާރުން ވަނީ ހާމަކޮށްފައެވެ.
ތުރުކީވިލާތަށް ގެންނަން މަސައްކަތްކުރި ނާކާމިޔާބު ބަޣާވާތާ ގުޅުން ހުރިކަމަށް ތުހުމަތުކޮށް ސިފައިންގެ މުއައްސަސާއިން ވަކިކުރުމަށް ނިންމާފައިވާ 2،220 އޮފަސަރުންގެ ތެރޭގައި ސިފައިންގެ އެންމެ އިސް ޖެނެރަލުންނާއި އިސް ކޮމާންޑަރުންގެ، އިތުރުން އެތަށް ސަތޭކަބަޔަކު ހިމެނެއެވެ. މިއީ ތުރުކީވިލާތުގެ ފަހުގެ ތާރީޚެއްގައި މިހާގިނަ އަދަދެއްގެ އިސް އޮފިސަރުންތަކެއް ސިފައިންގެ ތެރެއިން ވަކިކުރި ފުރަތަމަ ފަހަރެވެ. ތުރުކީ ސަރުކާރުންވަނީ ސިފައިންގެ އެކި ރޭންކްތަކުގެ 8،651 މީހުން ބަޣާވަތުގައި އެކި ފެންވަރުގައި ބައިވެރިވާކަމަށް ބުނެފައެވެ. މިއީ ތުރުކީ ސިފައިންގެ ޖުމްލަ އަދަދުގެ ގާތްގަނޑަކަށް 1.5 އިންސައްތައެވެ. ތުރުކީ ސިފައިންގެ ލަޝްކަރަކީ އެމެރިކާގެ ސިފައިންގެ ލަޝްކަރު ފިޔަވައި ނޭޓޯގައި ހިމެނޭ 2 ވަނައަށް އެންމެ ބޮޑު އަދި އެންމެ ވަރުގަދަ ލަޝްކަރެވެ.
ނާކާމިޔާބު ބަޣާވާތާ ގުޅުން ހުރިކަމަށް ތުހުމަތުކޮށް ބަންދުކުރުމަށް ތުރުކީ ސަރުކާރުން އަމުރުކުރި ޚަބަރުފަތުރާ ވަސީލަތްތަކުގެ ތެރޭގައި 16 ޓީވީ ސްޓޭޝަނާއި 23 ރޭޑިޔޯ ސްޓޭޝަނާއި 45 ނޫހާއި 3 ނޫސްއެޖެންސީ އާއި 29 ޗާޕުޚާނާ ހިމެނެއެވެ. މިތަންތަން ބަންދުކުރުމަށް ތުރުކީ ސަރުކާރުން އަމުރުކުރީ އެޤައުމުގައި އިޢުލާންކޮށްފައިވާ ކުއްލި ޙާލަތާއެކު ސަރުކާރަށް ލިބިދޭ ގާނޫނީ އިސްތިސްނާ ބާރުތަކުގެ ދަށުންނެވެ. މީގެއިތުރުން މި ނާކާމިޔާބު ބަޣާވާތަށް އެހީތެރިވިކަމުގެ ތުހުމަތުގައި ގިނަ އަދަދެއްގެ ނޫސްވެރިންގެ މައްޗަށް ޝަރީއަތް ހިންގުމަށް ތުރުކީގެ ޕްރޮސެކިޓަރުން ނިންމާފައިވާއިރު މީގެތެރޭގައި ސަރުކާރާ އިދިކޮޅު މަޝްހޫރު ނޫހެއްކަމަށްވާ "ޒަމާން" ނޫހުގެ 47 މުވައްޒަފުން ހިމެނެއެވެ. "ޒަމާން" ނޫހަކީ ނާކާމިޔާބު ބަޣާވާތުގެ ފަހަތުގައިވާ ކަމަށް ތުހުމަތުކުރެވޭ ދީނީ އިލްމުވެރިޔާ ފަތްހުﷲ ގުލެންއާ ގުޅުންބޮޑު ނޫހެކެވެ. އަނެއްކޮޅުން ތުރުކީވިލާތުގެ ސިއްހަތާބެހޭ ވަޒީރު ރަޖަބު އާގްދާޣް ވަނީ އެ ވުޒާރާގެ އެކި ޑިޕާޓްމަންޓްތަކުގެ މުވައްޒަފުންގެ ތެރެއިން 5،500 މުވައްޒަފުން މަގާމުން ވަކިކުރިކަން އިޢްލާން ކުރައްވާފައެވެ. މީގެތެރޭގައި ޑިރެކްޓަރުންނާއި އެއަށްވުރެ މަތީ މަގާމުތަކުގެ 115 މީހުންނާއި 1،504 މެޑިކަލް ޑޮކްޓަރުންނާއި ގިނައަދަދެއްގެ ޕްރޮފެޝަނަލް މުވައްޒަފުންނާއި ތަޖްރިބާކާރުން ހިމެނެއެވެ. މީގެއިތުރުން ސިފައިންނާއި ފުލުހުންގެ އާދައިގެ މީހުންނާއި ސަރުކާރުގެ އެކި ވުޒާރާތަކުގެ ސިވިލް ސާވިސް މުވައްޒަފުން ހިމެނޭގޮތަށް 50،000 އެއްހާ މީހުން ވަޒީފާއިން ވަކިކުރިކަންވެސް ތުރުކީ ސަރުކާރުންވަނީ އިޢްލާން ކޮށްފައެވެ.