ކުޅުދުއްފުށި ސިޓީގައި މިހާރު ކުރިއަށްދާ އިންޓަރ ސްކޫލް އެތުލެޓިކްސް މީޓް 2025 ގައި 15 އަހަރުން ދަށުގެ ޝޮޓްޕުޓްގެ އަންހެން ކެޓަގަރީން ނައިވާދޫ ސުކޫލުގެ ފާތުމަތު ނާޔާ ވާހިދު ރަންމެޑަލް ހޯދައިފިއެވެ.
ނާޔާ ރަންމެޑަލް ހޯދީ 7.81 މީޓަރު ދުރަށް ޝޮޓްޕުޓް އެއްލައިގެން 10 ޕޮއިންޓް ހޯދައިގެންނެވެ.
ރިހިމެޑަލް ހޯދީ 7.34 މީޓަރު ދުރަަަށް ޝޮޓްޕުޓް އެއްލައިގެން 8 ޕޮއިންޓް ހޯދި ށ. އަތޮޅު ތައުލީމީ މަރުކަޒުގެ ސާއީ މުހައްމަދު ވާސިފްއެވެ. ލޯ މެޑަލް ހޯދީ 7.21 މީޓަރު ދުރަށް ޝޮޓްޕުޓް އެއްލައިގެން 6 ޕޮއިންޓް ހޯދި ޖަލާލުއްދީން ސުކޫލުގެ ފާތުމަތު ޔޫލީ ހުސެއިންނެވެ.
17 އަހަރުން ދަށުގެ ހައިޖަމްޕްގެ އަންހެން ކެޓަގަރީން ރަން މެޑަލް ހޯދީ އަފީފުއްދީން ސުކޫލުގެ އައިމިނަތު އީމާން އަބޫބަކުރެވެ. އޭނާ ވަނީ 1.09 މީޓަރު އުހަށް ފުންމާފައެވެ.
މީގެ އިތުރުން މިއަދު ހަވީރު ކުރިޔަށް ދިޔަ ފައިނަލް އިވެންޓްތަކުގެ ތެރެއިން 14 އަހަރުން ދަށުގެ އަންހެން ކެޓަގަރީގެ ޑިސްކަސް އެއްވަނަ ހޯދީ ޖަލާލުއްދީން ސުކޫލުގެ މިޝްކާ އަހުމަދު މުހައްމަދެވެ. ދެވަނަ ހޯދީ މަކުނުދޫ ސުކޫލުގއ އިމްނާ އަހުމަދު ނަސީރެވެ.
ތިންވަނަ ހޯދީ ނައިވާދޫ ސުކޫލުގެ ފާތުމަތު އާޔާ އަހުމަދު ރަމްޒީއެވެ.
13 އަހަރުން ދަށުގެ ލޯންގް ޖަމްޕްގެ ފިރިހެން ކުދިންގެ ކެޓަގަރީން އެއްވަނަ ހޯދީ ނޮޅިވަރަމްފަރު ސުކޫލުގެ އަހުމަދު ލޭސަން އާދަމް ނަސީމްއެވެ. އޭނާ ވަނީ 2.02 މީޓަރު ދުރަށް ފުންމައިގެން 10 ޕޮއިންޓް ހޯދާފައެވެ.
ދެވަނަ ހޯދީ މިލަންދޫ ސުކޫލުގެ އަބުދުالله ޒަލަފް އިބްރާހިމްއެވެ. އޭނާ ވަނީ 1.92 މީޓަރު ދުރަށް ފުންމާ 8 ޕޮއިންޓް ހޯދާފައެވެ. ތިންވަނަ ހޯދީ މަކުނުދޫ ސުކޫލުގެ އިބްރާހިމް ރަޒާން ރަމްޒީއެވެ. އޭނާ ވަނީ 1.92މީޓަރު ދުރަށް ފުންމައިގެން 6 ޕޮއިންޓް ހޯދާފައެވެ.
އަދި 13 އަހަރުން ދަށުގެ އަންހެން ކެޓަގަރީގެ 70 މީޓަރު ހާޑްލްސްގެ އެއްވަނަ ހޯދީ ނައިވާދޫ ސުކޫލުގެ ސިޔާނާ އަހުމަދު ޒިޔާދެވެ. ދެވަނަ ހޯދީ މިލަންދޫ ސުކޫލުގެ އައިޝަތު ޝީން ފާޒިރެވެ. ތިންވަނަ ހޯދީ ނައިވާދޫ ސުކޫލުގެ މަލްހާ އަހުމަދު ރަމީޒެވެ.