މަރުގެ އަދަބު ތަންފީޒުކުރުމާބެހޭ ޤަވާއިދާ ގުޅޭގޮތުން ހައިކޯޓުން ބައްލަވަމުން ގެންދަވާ މައްސަލަ ނިމެންދެން މަރުގެ އަދަބު ތަންފީޒުކުރެއްވުން ފަސްކުރެއްވުމަށް ހައިކޯޓުން ވަގުތީ އަމުރެއް ނެރުއްވައިފިއެވެ.
މަރުގެ އަދަބު ތަންފީޒުކުރެއްވުމާ ގުޅޭގޮތުން ހޯމް މިނިސްޓްރީން އެކުލަވާލައްވާފައިވާ ޤަވާޢިދުގެ 8 ވަނަ މާއްދާއިން ފެށިގެން 17 ވަނަމާއްދާއާ ހުރި މާއްދާތަކަކީ ޤާނޫނީ އަސާސީއާ ތަޢާރަޒްވާ މާއްދާތަކެއްކަމަށް ކަނޑައަޅުއްވައިދެއްވުން އެދިއަމިއްލަ ޖަމްޢިއްޔާއަކުން ހައިކޯޓަށް ހުށައަޅުއްވާފައިވާ މަސައްލަ ނިންމެންދެން މަރުގެ އަދަބު ތަންފީޒުކުރެއްވުން މަޑުޖައްސާލައްވަން ޖެހޭކަމަށް މައްސަލަ ބައްލަވަމުން ގެންދަވާ ފަނޑިޔާރުންނަށް ޤަބޫލުފުޅު ކުރެއްވޭކަމަށް ހައިކޯޓުން ނިންމެވި ނިންމެވުމުގައިވެއެވެ. އެހެންކަމުން މިމައްސަލައާމެދު ހައިކޯޓުން ވަކިގޮތެއް ކަނޑައަޅުއްވަންދެން މި ޤަވާއިދުގެ ދަށުން އެއްވެސް މީހެއްގެ މައްޗަށް މަރުގެ ޙުކުމް ތަންފީޒުކުރުން މަޑުޖައްސަވާލެއްވުމަށް ހައިކޯޓުންވަނީ ދައުލަތުގެ މުއައްސަސާތަކަށް އަމުރުކުރައްވާފައެވެ.
މިމައްސަލައަކީ އަމިއްލަ ޖަމްޢިއްޔާއެއް ކަމަށްވާ މޯލްޑިވިއަން ޑިމޮކްރަސީ ނެޓްވޯކުން ހައިކޯޓަށް ހުށައެޅުއްވާފައިވާ ދުސްތޫރީ މައްސަލައެކެވެ. މިމައްސަލައިގައި ދައުލަތުގެ ފަރާތުން ވަނީ މިޤަވާޢިދުގެ ދިފާޢުގައި ވާހަކަދައްކަވާފައިވެއެވެ. މިހާތަނަށް ދިވެހިރާއްޖޭގެ ސުޕްރީމް ކޯޓުން ވަނީ 2 މީހެއްގެމައްޗަށް މަރަށް މަރުހިފުމަށް ޙުކުމްކުރައްވާފައެވެ.