ނޭޕާލްގެ ބޮޑުވަޒީރަށާއި ރައީސަށް ރައީސުލްޖުމްހޫރިއްޔާ ތަހުނިޔާ ފޮނުއްވައިފި

ނޭޕާލްގެ ޖުމްހޫރީ ދުވަހުގެ މުނާސަބަތުގައި އެޤައުމުގެ ރައީސް ރާމްޗަންދްރާ ޕައުޑެލްއަށާއި ބޮޑުވަޒީރު ކޭ.ޕީ ޝަރުމާ އޮލީއަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ތަހުނިޔާ ވިދާޅުވެއްޖެއެވެ.

ނޭޕާލްގެ ޖުމްހޫރީ ދުވަހުގެ މުނާސަބަތުގައި ސޯޝަލް މީޑިއާގައި ހިއްސާ ކުރެއްވި މެސެޖެއްގައި ރައީސުލްޖުމްހޫރިއްޔާ ވިދާޅުވީ، ނޭޕާލްގައި މިއަދު ފާހަގަކުރަމުންދާ ޖުމްހޫރީ ދުވަހަކީ، އެކި ނަސްލުތަކާއެކުވެސް އެޤައުމުގެ ރައްޔިތުން ދައްކާފައިވާ ނަމޫނާއާއި އެއްބައިވަންތަކަން ފާހަގަކުރާ ދުވަސްކަމަށެވެ. އެހެންކަމުން މިދުވަހުގެ ތަހުނިޔާ ނޭޕާލްގެ ރައީސާއި ބޮޑުވަޒީރަށާއި އެޤައުމުގެ ރައްޔިތުންނަށް އެމަނިކުފާނުވަނީ ފޮނުއްވާފައެވެ. ރައީސުލްޖުމްހޫރިއްޔާވަނީ ނޭޕާލުގައި ހަމަޖެހުން ޤާއިމުވެ އޮތުމަށާއި ފާގަތި މުސްތަޤުބަލަކަށް އެދިވަޑައިގަންނަވާފައެވެ.

I wish to convey heartfelt felicitations and wishes to HE President Ramchandra Paudel @RcPaudelNepal, HE PM K.P. Sharma Oli @kpsharmaoli, the government, and the people of Nepal on their Republic Day. Today is a day of commemoration of the national unity alongside diversity… pic.twitter.com/6rmqLYLWtm

— Dr Mohamed Muizzu (@MMuizzu) May 28, 2025

ރައީސުލްޖުމްހޫރިއްޔާގެ މެސެޖްގައި، ރާއްޖެއާއި ނޭޕާލާއި ދެމެދު އޮންނަ ގާތްގުޅުން ބަދަހިވެ ދެޤައުމުގެ ރައްޔިތުންނަށްވެސް އޭގެ ފައިދާތައްވުމަށް އެދިވަޑައިގަންނަވާކަމަށް ވިދާޅުވިއެވެ.

ރާއްޖެއާއި ނޭޕާލާއި ދެމެދު ސިޔާސީ ގުޅުން ޤާއިމުކުރެވުނީ، 1 އޯގަސްޓް 1980 ގައެވެ. ރާއްޖެއާއި ސިޔާސީ ގުޅުން ޤާއިމުކުރި ފަހުން މިވީ 45 އަހަރު ތެރޭގައި ނޭޕާލުންވަނީ ރާއްޖޭގެ ތަރައްޤީއަށް އެކި ގޮތްގޮތުން އެހީތެރިކަން ފޯރުކޮށްދެއްވާފައެވެ. ވަކިން ޚާއްސަކޮށް ސިއްޙީ ދާއިރާއިން ޑޮކްޓަރުން ތަމްރީނުކުރުމަށާއި ސްޕެޝަލައިޒްވުމުގެ ފުރުސަތުތަކެއް މިމުއްދަތުގެ ތެރޭގައި ފަހިވެފައިވާކަން ފާހަގަކޮށްލެވެއެވެ.