ވަޤުފް ފަންޑަށް ފައިސާ ހޯއްދެވުމަށް، ޢިމާރާތްކުރައްވާ ޢިމާރާތް "ވަޤުފު ބިލްޑިންގ" ގެ ބައިތައް ފުރަތަމަ ކުއްޔަށް ދޫކުރެއްވުމަށް ހަމަޖެހިފައިވަނީ ސަރުކާރުގެ އޮފީސްތަކަށާއި، ސަރުކާރު ޙިއްޞާވާ ކުންފުނިތަކަށް ކަމަށް އިސްލާމިކް މިނިސްޓްރީން ވިދާޅުވެއްޖެއެވެ.
ވަޤުފް ފަންޑަކީ، މިސްކިތްތައް ޢިމާރާތްކުރެއްވުމާއި މިސްކިތްތައް މަރާމާތުކުރެއްވުމާއި، ބެލެހެއްޓެވުމަށްޓަކައި ފައިސާ ލިބޭނެ އިތުރު ވަޞީލަތްތައް ޤާއިމްކުރެއްވުމަށް އުފައްދަވާފައިވާ ފަންޑެކެވެ.
ވަޤުފް ބިލްޑިންގެ ބައިތައް ކުއްޔަށް ދޫކުރައްވައިގެން، މިހާރުގެ ކުލީގެ ރޭޓަށް ބަލާއިރު ވަޤުފް ފަންޑަށް އަހަރެއްގެ މައްޗަށް، 30 މިލިއަން ރުފިޔާ ލިބޭނެކަމަށް އިސްލާމިކް މިނިސްޓްރީން ލަފާކުރައްވައެވެ.
ވަޤުފް ބިލްޑިންގ އިމާރާތްކޮށްފައިވަނީ މާފަންނު މަދަރުސާގެ ހުޅަނގުފަރާތުގައެވެ. 10 ބުރީގެ މި އިމާރާތުގެ މަސައްކަތް މި މަހުގެ ނިޔަލަށް ނިމޭއިރު، މިހާރު ނުނިމި ހުރި މަސައްކަތަކީ ގްރައުންޑް ފްލޯގައި ކުރަން ހުރި ކުދިކުދި މަސައްކަތްތަކެވެ.
24 މިލިއަން ރުފިޔާ ޚަރަދުކުރައްވައިގެން ސަރުކާރުން ބިނާކުރެއްވި، މި ޢިމާރާތުގެ މަސައްކަތް ފަށްޓަވާފައިވަނީ 2014 ވަނަ އަހަރުގެ ފެބުރުއަރީ މަހުގައެވެ. މި މަސައްކަތް ކުރައްވަނީ އެމް.ޓީ.ސީ.ސީއާ ޙަވާލުކުރައްވައިގެންނެވެ.
މިއީ ވަރަށް މާތް މަޤްޞަދެއްގައި ބިނާ ކުރެއްވި ޢިމާރާތެއްކަމަށާއި ޢިމާރާތް ކުއްޔަށް ދޫކުރައްވައިގެން ލިބިވަޑައިގަންނަވާ ހުރިހާ ފައިސާއެއްވެސް ޖަމާކުރައްވާނީ ވަޤުފް ފަންޑަށްކަމަށް އިސްލާމިކް މިނިސްޓްރީން ހާމަކުރައްވައެވެ.
އިސްލާމިކް މިނިސްޓަރ ޑރ. އަޙްމަދު ޒިޔާދު ވިދާޅުވީ، ޢިމާރާތުގެ ފަންގިފިލާތައް، ސަރުކާރުގެ އޮފީސްތައް ހިންގެވުމަށާއި، ސަރުކާރު ޙިއްޞާވާ ކުންފުނިތަކަށް ކުއްޔަށް ދެއްވުމަށް މި ވަގުތަށް ނިންމެވީ، ބައެއް އޮފީސްތައް ހިންގަވަމުން ގެންދަވާ ޖާގަތައް ކުޑަވެ، ވަޤުފް ބިލްޑިންގއަށް ބަދަލުވުމަށް އެ ފަރާތްތަކުން ޝައުޤުވެރިކަން ފާޅުކުރައްވަމުން ގެންދަވާތީ ކަމަށެވެ.
ފިނޭންސް މިނިސްޓްރީން ބޭނުންފުޅުވެގެން، ވަޤުފު ބިލްޑިންގެ 3 ފަންގިފިލާއެއް މިހާރުވެސް ދޫކުރައްވާފައިވާކަން ފާހަގަކުރެވެއެވެ.
އިސްލާމިކް މިނިސްޓަރ އަޙްމަދު ޒިޔާދު ވިދާޅުވީ، ކުއްޔަށް ދެއްވާ އަގުތައް ވަރަށް އަވަހަށް އެނގިގެންދާނެ ކަމަށާއި، ކުއްޔަށް ދޫކުރެއްވުމާ ގުޅޭ އުޞޫލެއް މިހާރު އެކުލަވާލައްވަމުން ގެންދަވާ ކަމަށެވެ.
އެތަނުގައި ހިންގަވާ ސަރުކާރު އޮފީސްތަކުންވެސް، ކުލި ދައްކަވާނެ ކަމަށާއި، އެ ފައިސާ ޖަމާކުރެވޭނީ ވަޤްފް ފަންޑަށް ކަމަށް މިނިސްޓަރ ވިދާޅުވިއެވެ. މިވަގުތު ހަމައެކަނި، ސަރުކާރުގެ އޮފީސްތަކަށާއި، ކުންފުނިތަކަށް ކުއްޔަށް ދެއްވަން ނިންމެވިނަމަވެސް ދެވަނަ ބުރުގައި އަމިއްލަ ފަރާތްތަކަށްވެސް ކުއްޔަށް ދޫކުރައްވާނެކަމަށް އިސްލާމިކް މިނިސްޓްރީން ވިދާޅުވެއެވެ.