ކޮސްކެޕް، ސައުތު އޭޝިޔާ ސްޓިއަރިން ކޮމެޓީގެ 25 ވަނަ ބައްދަލުވުން މިއަދު ރާއްޖޭގައި ފަށައިފިއެވެ.
ސާކުގެ 7 ޤައުމު ހިމެނޭ ކޯޕަރޭޓް ޑިވްލޮޕްމަންޓް އޮފް އޮޕަރޭޝަނަލް ސޭފްޓީ އެންޑް ކޮންޓިނިއުއިން އެއަރވާދިނަސް ޕްރޮގްރާމް، " ކޮސްެކެޕަކީ " ސަރަޙައްދުގެ ޤައުމުތަކުގެ އުދުހުމުގެ ދާއިރާގެ ތަރައްޤީއަށް މަސައްކަތް ކުރުމަށް ހިންގާ ޕްރޮގްރާމެކެވެ. ޚާއްޞަކޮށް ވައިގެ ދަތުރުފަތުރުގެ ސަލާމަތްތެރިކަން އިތުރުކުރުމުގެ ފަންނީ ލަފާދިނުމަކީ މި ޕްރޮގްރާމްގެ ދަށުން ކުރަމުން އަންނަ ކަމެކެވެ. img:http://s2.psmnews.mv/images/660x400/14690175697867.jpg|ކޮސްކެޕްގެ ބައްދަލުވުމުގެ ބައިވެރިން - ފޮޓޯ: ޕީއެސްއެމް ނިއުސް
ޕެރެޑައިސް އައިލެންޑް ރިޒޯޓްގައި 3 ދުވަހުގެ މުއްދަތަށް ކުރިއަށްގެންދާ މި ބައްދަލުވުން ފަށްޓަވައިދެއްވާ ވާހަކަދައްކަވަމުން ޓޫރިޒަމް މިނިސްޓަރުގެ ނާއިބު، ޙުސައިން ޟިރާރު ވިދާޅުވީ ދެކުނު އޭޝިޔާ ސަރަޙައްދަކީ އޭވިއޭޝަންގެ ދާއިރާ އެންމެ ބާރަށް ކުރިއަރަމުން އަންނަ އެއް ސަރަޙައްދު ކަމަށާއި، އޭވިއޭޝަންގެ ދާއިރާއިން ލިބޭ ފައިދާ އިތުރުކޮށްގެން ނޫނީ މިދާއިރާއަށް ތަރައްޤީ ނުގެނެވޭނެ ކަމަށެވެ.
ރާއްޖެއަކީ އޭޝިޔާ ޕެސިފިކް ޤައުމުތަކުގެ ތެރެއިން ޖީ.ޑީ.ޕީގައި އޭވިއޭޝަން ސިނާޢާތުގެ ޙިއްޞާ އެންމެބޮޑު ޤައުމުކަން ފާހަގަކުރެވެއެވެ. އަދި އިބްރާހީމް ނާޞިރު އިންޓަރނޭޝަނަލް އެއަރޕޯޓާއި ގަން އިންޓަނޭޝަނަލް އެއަރޕޯޓް ބޮޑުކުރުމަށް ހިންގަވާ މަޝްރޫޢުގެ މައްޗަށް އަލިއަޅުއްވާލައްވައި، މި ދާއިރާއަށް ކުރިއެރުން އޮތީ ޢުމުރާނީ ވަޞީލާތްތައް ޤާއިމްކުރުން ކަމަށް ވިދާޅުވިއެވެ.
ކޮސްކެޕްގެ މިދައުރުގެ ޗެއަރޕާސަންކަން ކުރައްވަމުން އަންނަ އިންޑިޔާގެ ފަރާތުން، އެމް.ސައްތިޔަވަތީ ވިދާޅުވީ، ދެކުނު އޭޝިޔާ ސަރަޙައްދަކީ ދުނިޔޭގައި އެންމެ ބާރު ސްޕީޑްގައި ވައިގެ ދަތުރުފަތުރުގެ ދާއިރާ ކުރިއަރަމުން އަންނަ ސަރަޙައްދު ކަމަށާއި، އިންޑިޔާއިން އެކަނިވެސް އަހަރަކު 12 އިންސައްތައިގެ ކުރިއެރުން ހޯދަމުންދާ ކަމަށެވެ.
ކޮސްކެޕްގެ މިފަހަރުގެ ބައްދަލުވުމުގައި ދެކުނު އޭޝިޔާގެ 7 ޤައުމުގެ މަންދޫބުންގެ އިތުރުން، ޕްރޮގްރާމަށް މާލީ އެހީތެރިކަން ފޯރުކޮށްދޭ ފަރާތްތަކާއި، ރާއްޖޭގެ އޭވިއޭޝަން ސިނާޢަތުގައި ޙަރަކާތެރިވާ ބޭފުޅުން ބައިވެރިވެވަޑައިގަންނަވައެވެ.