ޗައިނާ މޯލްޑިވްސް ފްރެންޑްޝިޕް ބްރިޖްގެ އެންމެ އެތެރޭގެ މަންޒަރުތައް ދައްކާލައިފިއެވެ.
ޗައިނާ މޯލްޑިވްސް ފްރެންޑްޝިޕް ބްރިޖްގެ މަސައްކަތް، ތިން ސައިޓެއްގައި ކުރިއަށްދެއެވެ. އެއީ ލޮނުޒިޔާރަތްކޮޅުގައި ޤާއިމްކޮށްފައިވާ މާލޭ ސައިޓާއި، ހުޅުލޭ ރަންވޭގެ ދެކުނު ފަރާތުން ހުޅުލޭގައި ޤާއިމްކޮށްފައިވާ ހުޅުލޭ ސައިޓާއި، ހުޅުމާލޭ ދެވަނަ ފިޔަވަހީގައި ހަދާފައިވާ ހުޅުމާލޭ ސައިޓެވެ. މީގެތެރެއިން ނޫސްވެރިންނަށް ދައްކާލާފައިވަނީ މާލޭ ސައިޓެވެ. ބްރިޖްގެ މައިގަނޑު ބޮޑެތި މަސައްކަތްތަކާއި، މަސައްކަތްކުރާ މީހުންގެ އެކޮމޮޑޭޝަން ބޮލްކް ޤާއިމްކޮށްފައިވަނީ މި ސައިޓްގައެވެ. މާލޭ ސައިޓްގައި ކުރިއަށްގެންދާ މަސައްކަތްތަކުގެ ތެރޭގައި ޓްރެސެލް ބްރިޖްގެ މަސައްކަތާއި، ކޮންކްރީޓްގެ މަސައްކަތްތަކާއި، ތަނބު ޖެހުމަށް ބޭނުންކުރާ ހޮޅިތައް، ބިމު އަޑިއަށް ފައްތައިގެން ތަޙްލީލްކުރުމުގެ މަސައްކަތް ހިމެނެއެވެ.
img:http://s2.psmnews.mv/images/660x400/14687732590558.jpg|ބްރިޖުގެ މަސައްކަތް ކުރިއަށްދާ ސަރަހައްދު- ފޮޓޯ: ޕީއެސްއެމް
މާލޭ ސައިޓްގައި މިހާރުވެސް ވަނީ 3 ސަރަޙައްދެއްގައި ޓެސްޓްކުރުމުގެ ގޮތުން ބައެއް ޕައިލްސްތައް ޖަހާފައެވެ. މިއީ ބްރިޖްގެ ތަނބުތައް ޖެހުމުގައި ކޮލިޓީ ބެލެހެއްޓުމަށް ކުރަމުންދާ މަސައްކަތެކެވެ. ކޮލިޓީ ބެލެހެއްޓުމަށްޓަކައި، ޢަމަލީ ގޮތުން މަސައްކަތް ކުރަމުންދަނީ ސީސީސީސީ ހައިވޭ ކުންފުނިންނެވެ.
ލޮނުޒިޔާރަތްކޮޅުން ފެށިގެން އަޅަމުންދާ ޓްރެސެލް ބްރިޖްގެ މަސައްކަތް މިހާރު ވަނީ ނިންމާލާފައެވެ. އަދި ޓްރެސެލް ބްރިޖް މައްޗަށް އެރުމުގެ ފުރުޞަތު ހައުސިންގ މިނިސްޓްރީން ނޫސްވެރިންނަށް ދެއްވާފައިވެއެވެ. ޓްރެސެލް ބްރިޖަކީ އަސްލު ބްރިޖް ހެދުމުގައި ބޭނުންކުރާ ވަގުތީ ބްރިޖެކެވެ. ދަނގަނޑު ފިލާ އަޅައިގެން ހަދާފައިވާ ޓްރެސެލް img:http://s2.psmnews.mv/images/660x400/14687732590558.jpg|ބްރިޖުގެ މަސައްކަތް ކުރިއަށްދާ ސަރަހައްދު- ފޮޓޯ: ޕީއެސްއެމް ބްރިޖްވެސް ސިފަވެގެންދަނީ އަސްލު ބްރިޖެއްގެ ސިފައިގައެވެ. ފުޅާ މިނުގައި ވިއްސަކަށް ފޫޓް ހުންނައިރު، ޓްރެސެލް ބްރިޖްގެ އެންމެ އުސް ހިސާބު، މޫދުގެ ލޮނުގަނޑަށްވުރެ ސާޅީހަކަށް ފޫޓް އުސްކަން ފާހަގަކުރެވެއެވެ. ޓްރެސެލް ބްރިޖްގެ ކޮޅު މިހާރު ވަނީ ލޮނުޒިޔާރަތްކޮޅުން ފުރަތަމަ ޖެހޭ ޕްލެޓް ފޯމާ ހިސާބަށް ގެންގޮސްފައެވެ. މިއާއެކު ޓްރެސެލް ބްރިޖާއި، ޕްލެޓްފޯމްތަކާ ގުޅުވާލުމުގެ މަސައްކަތް މިހާރު ކުރިއަށްދާކަން ފާހަގަކޮށްލެވެއެވެ.
img:http://s3.psmnews.mv/images/660x400/14687732716771.jpg|ބްރިޖުގެ މަސައްކަތް ކުރިއަށްދާ ސަރަހައްދު- ފޮޓޯ: ޕީއެސްއެމް
ބްރިޖުގެ މަސައްކަތް ކުރިއަށްދާގޮތް ދައްކާލުމަށް، ނޫސްވެރިންނާއެކު ހައުސިން މިނިސްޓަރގެ ނާއިބު ޢަބްދުﷲ މުއްތަލިބާއި، ޕްރޮޖެކްޓްގެ ހެޑް މިސްޓަރ ލިމް ވަޑައިގެންނެވިއެވެ. އަދި ހައުސިންގ މިނިސްޓްރީއާއި، ސީސީސީސީ ސެކަންޑް ހާބަރ އިންޖިނިއަރިންގެ ޓީމްވެސް ބައިވެރިވިއެވެ. ޓްރެސެލް ބްރިޖަށް ނޫސްވެރިން އެރުމުގެ ކުރިން މިސްޓަރ ލިމް ވަނީ ސައިޓްގައި ކުރިއަށްދާ މައިގަނޑު މަސައްކަތްތަކުގެ ޚުލާޞާއެއް ނޫސްވެރިންނާ ޙިއްޞާކުރައްވާފައެވެ.
ޓްރެސެލް ބްރިޖުގައި ނޫސްވެރިންނަށް މަޢުލޫމާތުދެއްވަމުން ހައުސިން މިނިސްޓަރގެ ނާއިބު ޢަބްދުﷲ މުއްތަލިބު ވިދާޅުވީ، ބްރިޖްގައި މިވަގުތު ކުރިއަށްދާ މަސައްކަތްތަކުގެ ތެރެއިން، ތަނބުތައް ޖެހުމުގެ ޢަމަލީ މަސައްކަތް ފެށިފައިވާ ކަމަށާއި، މިހާރުވެސް ދެ ޕައިލް ކަނޑު އަޑިއަށް ޖަހާފައިވާކަމަށެވެ.
ޕީ.އެސް.އެމުން ދެންނެވި ސުވާލަކަށް ޖަވާބު ދެއްވަމުން މުއްތަލިބު ވިދާޅުވީ، ބްރިޖްގެ ޓައިމްލައިންގައި ކަނޑައަޅާފައިވާ ތާވަލާ އެއްގޮތަށް ހުރިހާ މަސައްކަތެއްވެސް ކުރިއަށްދާ ކަމަށެވެ. އަދި ސެޕްޓެމްބަރު މަހުގެ ނިޔަލަށް ތަނބުތަކުގެ ކޮޅުތައް ލޮނުގަނޑުމަތިން ފެންނަށް ފަށާނެ ކަމަށެވެ.
img:http://s4.psmnews.mv/images/660x400/14687736272453.jpg|ބްރިޖުގެ މަސައްކަތް ކުރިއަށްދާ ސަރަހައްދު- ފޮޓޯ: ހައުސިންގ މިނިސްޓްރީ
ބްރިޖްގައި ޖުމްލަ 5 ތަނބު ހިމެނޭއިރު، ކޮންމެ ތަނބެއްގައި 7 ޕައިލް ހިމެނޭނެއެވެ. ޕައިލް ހުންނަނީ ވަށް ހޮޅިއެއް ގޮތަށެވެ. ނަމަވެސް މިއީ 4 އިންޗީގެ ބޯ މިނުގެ ޕައިލްތަކެކެވެ. ޕައިލެއްގެ ފުޅާ މިނުގައި 10 ފޫޓް ހުރެއެވެ. އަދި މިއިން ކޮންމެ ޕައިލަކަށް ވަށްކޮށް ހުންނަ ކޮންކްރީޓް ސްޓްރަކްޗަރއެއް ފައްތާނެއެވެ. އޭގެ ފުރަތަމަ ސްޓްރަކްޗަރ ހެދުމުގެ މަސައްކަތް މިހާރުވެސް ސައިޓްގައި ކުރިއަށް އެބަދެއެވެ.
މުއްތަލިބު ވިދާޅުވީ، ހުޅުލެއާވީކޮޅުން ހަދާ ޓްރެސެލް ބްރިޖްގެ މަސައްކަތްވެސް ވަރަށް އަވަހަށް ނިންމާލެވޭނެ ކަމަށެވެ. އަދި ހުޅުމާލޭ ސައިޓަކީ މިކަމަށް ޚާއްޞަ ލެބޯޓްރީއެއް ޤާއިމްވެފައިވާ ތަނެއް ކަމަށާއި، އެތަނުގެ މަސައްކަތްވެސް ވަރަށް ބާރަށް ކުރިއަށްދާކަމަށެވެ.
ބްރިޖްގެ މަސައްކަތް ކުރުމަށްޓަކައި ގިނަ އަދަދެއްގެ ކްރޭނާއި ވެހިކަލްތައް އޮޕަރޭޓްކުރަމުންދެއެވެ. ރާއްޖޭގައި މިހާތަނަށް ބޭނުންކުރާ އެންމެ ބޮޑު ކްރޭންވެސް ބޭނުންކުރަމުންދަނީ ބްރިޖްގެ މަސައްކަތުގައެވެ.
ޗައިނާ ސަރުކާރުގެ ބޮޑު އެހީތެރިކަމެއް މި މަޝްރޫއަށް ލިބިގެންދާއިރު، މި މަޝްރޫޢު ކުރިއަށްދަނީވެސް ޗައިނާ ސަރުކާރުގެ ބެލުމުގެ ދަށުންނެވެ. ބްރިޖް އެޅުމަށް 210 މިލިއަން ޑޮލަރު ޚަރަދުވެއެވެ. އޭގެތެރެއިން 124 މިލިއަން ޑޮލަރަކީ ޗައިނާ ސަރުކާރުގެ ހިލޭ އެހީއެވެ. ބާކީ 12.6 މިލިއަން ޑޮލަރަކީ ދިވެހި ސަރުކާރުގެ ބަޖެޓުން ކުރައްވާ ހޭދައެވެ.
ޗައިނާ ސަރުކާރުން ދިން 124 މިލިޔަން ޑޮލަރުގެ ހިލޭ އެހީގެ އިތުރަށްވެސް ޗައިނާ ސަރުކާރުން ލުއި ލޯނުގެ ގޮތުގައި މާލީ އެހީތެރިކަން ލިބިދިނުމަށް ހަމަޖެހިފައިވެއެވެ. އަދި ބްރިޖްގެ ޢަމަލީ މަސައްކަތް ނިންމުމަށްފަހުވެސް، 3 އަހަރު ވަންދެން ބްރިޖްގެ މެއިންޓަނަންސްގެ ހުރިހާ ކަމެއްވެސް ކުރުމަށް ހަމެޖެހިފައިވަނީ ޗައިނާ ސަރުކާރުގެ ފަރާތުންނެވެ.
ޕީ.އެސް.އެމާ ވާހަކަދެއްކި ސީ.ސީ.ސީ.ސީ ސެކަންޑް ހާބަރ އިންޖިނިއަރިންގެ އޮފިޝަލުން ވިދާޅުވީ، މި ބްރިޖަކީ ޤަރުނަކަށްވުރެ ގިނަ ދުވަހު ބޭނުންކުރެވޭ ފެންވަރުގައި ހަދަމުން އަންނަ ބްރިޖެއް ކަމަށާއި، ބްރިޖްގެ މަސައްކަތްތަކީ އެ ކުންފުނިން މި ވަގުތަށް އެންމެ އިސްކަން ދީފައިވާ މަޝްރޫޢުކަމަށެވެ.