ޢުމްރާގެ އަޅުކަމަށްފަހު ރޯގާޖެހި ބޮޑުވަރުވާނަމަ ޑޮކްޓަރަށް ދެއްކުމަށް އިލްތިމާސްކޮށްފި

ޢުމްރާގެ އަޅުކަމަށްފަހު އަންނަ ފަރާތްތަކުން ރޯގާޖެހި ބޮޑުވަރުވާނަމަ ލަސްނުކޮށް ޑޮކްޓަރަށް ދައްކުމަށް ހެލްތް ޕްރޮޓެކްޝަން އޮތޯރިޓީ އެޗްޕީއޭއިން އިލްތިމާސްކޮށްފިއެވެ.

މި ރަމަޟާން މަހު ފަހު ދިހައެއްގައި ޢުމްރާގެ އަޅުކަން އަދާކުރުމަށް ޙައްޖު ކޯޕަރޭޝަންގެ ހަވާލުގައި ޖުމްލަ 577 މީހުން ޢުމްރާއަށް ދިޔައެވެ. ހައްޖު ކޯޕަރޭޝަން އިތުރުން، އަމިއްލަ ކުންފުނިތަކުގެ ހަވަލުގައިވެސް އެތައް ބަޔަކު ރަމަޟާންމަހު ޢުމްރާގެ އަޅުކަމަށް ދިޔައެވެ. އަދި ޢުމްރާގެ މަތިވެރި އަޅުކަމަށްފަހު ޢުމްރާވެރިން މިހާރު ވަނީ ރާއްޖެ އަންނަން ފަށާފައެވެ.

ޢާއްމުގޮތެއްގައި ޙައްޖާއި ޢުމްރާގެ އަޅުކަމަށްފަހު އަންނަ މީހުންނަށް ރޯގާ ޖެހެއެވެ. އެހެންކަމުން އެފަރަތްތަކުން ސަމާލުކަންދޭންވީ ކަންކަން އެޗްޕީއޭއިން މިހާރު ހަނދާންކޮށްދެއްވާފައެވެ.

އެޗްޕީއޭއިން ވަނީ ޢުމްރާއަށްފަހު އަންނަ މީހުން އަރިދަފުސް ރޯގާޖެހި ކެއްސާ، ކިނބިހި އަޅާއިރު އަނގައާއި ނޭފަތް ނިވާކުރުމަށް އިލްތިމާސްކުރައްވާފައެވެ. އަދި ޓިޝޫފަދަ ތަކެތި ބޭނުންކުރުމަށްފަހު ރައްކާތެރި ގޮތުގައި އެތަކެތި ނައްތާލުމަށާއި ސައިބޯނި ލައިގެން ގިނައިން އަތް ދޮވުމަށް ވެސް ވަނީ އިލްތިމާސްކުރައްވާފައެވެ.

Welcoming home the Umrah pilgrims after their spiritual journey during the month of Ramadan pic.twitter.com/KOiFHyMc4J

— Maldives Airports Company Ltd (@MACLmedia) April 4, 2025

އެޗްޕީއޭއިން ވިދާޅުވީ ޢުމްރާއިން އެނބުރި އަންނަތާ 14 ދުވަހުގެ ތެރޭގައި ހުން އައިސް ކެއްސައި ނޭވާލާން އުނދަގޫވެ މޭގައި ރިއްސުންފަދަ އަލާމާތެއް ފެނިއްޖެނަމަ ލަސްނުކޮށް ޑޮކްޓަރަށް ދެއްކުމަށެވެ. އަދި ރޯގާ ނޫން އެހެން ބައްޔެއްގެ އަލާމާތެއް ފެންނަނަމަވެސް ޑޮކްޓަރަށް ދެއްކުމަށްވެސް އެޗްޕީއޭއިން އިލްތިމާސްކުރައްވައެވެ.

އެޗްޕީއޭއިން ވިދާޅުވީ ޑޮކްޓަރަށް ދައްކާއިރު ޙައްޖު ނުވަތަ ޢުމްރާއިން އެނބުރި އައި މީހެއްކަމުގެ މައުލޫމާތު ދޭންވާނެ ކަމަށެވެ.

ޢުމްރާއިން އެނބުރި އައުމަށްފަހު ސަމާލުކަން ދޭންވީ މުހިއްމު ކަންކަން. 🕋 pic.twitter.com/ogxSMTjQJ8

— Health Protection Agency (@HPA_MV) April 5, 2025

ހުމާއި، އަރިދަފުސް ރޯގާ ޖެހިއްޖެނަމަ ގޭގައި ދެވިދާނެ ފަރުވާ

* ގިނަގިނައިން ދިޔާތަކެތި ބޭނުންކުރުން
* އަރާމުކުރުން
* ހުން ގަދަނަމަ ގައިގައި ފެން އުނގުޅުން
* ޕެރެސެޓަމޯލް ފިޔަވައި އެހެން ބޭހެއް ޑޮކްޓަރެއްގެ މަޝްވަރާއާ ނުލައި ބޭނުން ނުކުރުން

ޢުމްރާގެ އަޅުކަމަށްފަހު އުމްރާވެރިން ރާއްޖެ އައުމަށް ހަމަޖެހިފައިވަނީ މި މަހު 4،5 އަދި 7ވަނަ ދުވަހުއެވެ.