އިނގިރޭސި ޕްރިމިއަރ ލީގުގައި ރޭ ޓޮޓްނަމް ހޮޓްސްޕަރ އަތުން 1-0 ގެ ނަތީޖާއަކުން ޗެލްސީ މޮޅުވެއްޖެއެވެ.
މި މެޗުން ޗެލްސީ މޮޅުވުމާއިއެކު އެ ޓީމަށް ވަނީ ލީގުގައި މިހާތަނަށް ކުޅުނު 30 މެޗުން ލިބިފައިވާ 52 ޕޮއިންޓާއެކު ތާވަލުގެ ހަތަރުވަނަ މަގާމް ލިބިފައެވެ. އަދި މި ނަތީޖާއާއިއެކު ކުރިއަށް އޮތް ފުޓްބޯޅަ ސީޒަނުގެ ޔުއެފާ ޗެމްޕިއަންސް ލީގުން ފުރުސަތު ލިބޭނެ ޓީމުތަކުގެ ތެރޭގައި ވަނީ ވާދަވެރިކަން ބޮޑުވެފަ އެވެ. މި މެޗުން ބަލިވި ޓޮޓްނަމް ހޮޓްސްޕަރއަށް ލިބިފައިވާ 34 ޕޮއިންޓާއެކު އެ ޓީމު އޮތީ ތާވަލުގެ 13 ވަނައިގަ އެވެ.
ލަންޑަނުގެ ސްޓެމްފަޑް ބްރިޖުގައި ކުޅުނު މި މެޗުގައި ދެ ޓީމުގެ ފަރާތުންވެސް ވާދަވެރި ކުޅުމެއް ފެނިގެންގޮސްފައިވާއިރު، އަނިޔާގެ ސަބަބުން ކުޅުމާއި ދުރުގައި ހުރި ޗެލްސީގެ ފޯވާޑް ނިކޮލަސް ޖެކްސަންގެ އިތުރުން ކޯލް ޕާމާ ވަނީ މި މެޗުގެ ފުރަތަމަ އެގާރައިގައި ހިމެނިގެ ކުޅެފައެވެ.
މި މެޗުގެ ފުރަތަމަ ހާފުގައި ޗެލްސީއަށް ލަނޑު ޖަހާނެ ރަނގަޅު ފުރުސަތުތަކެއް ލިބުނު ނަމަވެސް އެ ޓީމަށް ވަނީ އެ ފުރުސަތުތަކުގެ ބޭނުން ހިފޭ ގޮތް ނުވެފަ އެވެ.
ޗެލްސީން މި މެޗުގައި ޖެހި ހަމައެކަނި ލަނޑު ދެވަނަ ހާފުގެ ކުޅުން ފެށުނުތާ ފަސްވަނަ މިނިޓުގައި ކޯލް ޕާމާ ދިން ޕާހަކުން ކާމިޔާބުކޮށްފައިވަނީ އާޖެންޓީނާގެ މިޑްފީލްޑަރު އެންޒޯ ފެނާންޑޭޒް އެވެ.
އަދި މި ލަނޑު ޗެލްސީން ޖެހިތާ ގިނައިރުތަކެއް ނުވަނީސް މޮއިސެސް ކައިސޭޑޯ ވަނީ އިތުރު ލަނޑެއް ލަނޑެއް ޖަހާ މެޗުގެ ފަރަގު ބޮޑުކޮށްފަ އެވެ. ނަމަވެސް ހަތަރު މިނިޓް ވަންދެން ވީޑިއޯ ބެލުމަށްފަހު ރެފްރީ ވަނީ ލަނޑު ޖެހުމުގެ ކުރިން ޗެލްސީގެ ކުޅުންތެރިއަކު އޮފްސައިޑްވި ކަމަށް ނިންމާ އެ ނިންމުން ބަދަލުކޮށްފަ އެވެ.
ޓޮޓްނަމް ހޮޓްސްޕަރގެ ކޯޗު ޕޮސްޓެކޮގްލޫ ބަދަލުތަކެއް ގެނެސް އެ ޓީމުގެ ކުޅުން އިތުރަށް ވަރުގަދަ ކުރިތާ ގިނައިރުތަކެއް ނުވަނީސް ޕާޕޭ މަޓަރސާ ވަނީ 20 ޔާޑު ދުރުން ފޮނުވާލި ހަމަލައެއް ޗެލްސީގެ ގޯލުގެ ތެރެއަށް ވައްދާފަ އެވެ. ނަމަވެސް ރެފްރީ ވަނީ އެއީ އޮފްސައިޑް ލަނޑެއް ކަމަށް ނިންމާފަ އެވެ.
މި މެޗުން ޓޮޓްނަމް ހޮޓްސްޕަރ ބަލިވުމާއިއެކު 2008 ވަނަ އަހަރަށްފަހު ފުރަތަމަ ފަހަރަށް ޕްރިމިއާ ލީގުގެ ގަދަ ދިހައެއްގައި ނުހިމެނޭނެ ކަމުގެ ބިރު އެ ޓީމަށް ވަނީ ހީވެފައެވެ.