ޔޫއޭއީއާއެކު ވެވުނު އެއްބަސްވުމުގެ ދަށުން ކިޑްނީ ޓްރާންސްޕްލާންޓް ކުރުމަށް ފޮނުވާ ފުރަތަމަ ބެޗް ކުރިއަށް އޮތް ދެމަހެއްހާ ދުވަހުގެތެރޭގައި ފޮނުވާލުމަށް މަސައްކަތް ކުރައްވަމުންދާކަމަށް އާސަންދަ ކުންފުނިން ވިދާޅުވެއްޖެއެވެ.
ކިޑްނީ ޓްރާންސްޕްލާންޓް ހެދުމަށް ޔޫއޭއީއާއެކު ރާއްޖެއިން އެއްބަސްވުމެއް ޤާއިމުކޮށްފައިވަނީ މިއަހަރުގެ ޖެނުއަރީ މަހުގެ 15 ވަނަ ދުވަހުއެވެ.
ރާއްޖެއިން ބޭރުން ދިވެހީން ފަރުވާ ހޯދާ ދާއިމީ ބޮޑެތި ބަލިތަކުގެ ތެރޭގައި ކިޑްނީ ބަލި މީހުން ނިސްބަތުން ގިނަކަން ފާހަގަކޮށްލެވެއެވެ. އަދި މީގެކުރިން ރާއްޖެއިން ބޭރުން ފަރުވާއަށް ދިވެހީން ގޮސްއުޅުނު ޤައުމުތަކުގެ ޤާނޫނުތައް ބައްޓަންކޮށްފައި ހުންނަގޮތުން ކިޑްނީ ޓްރާންސްޕްލާންޓްކުރުމުގައި ހުރަސްތަކެއް ހުރުންވެގެންދިޔައީ ކިޑްނީ ބަލި މީހުންގެ މާޔޫސްކަން އިތުރުކުރުވާކަމަށެވެ. އެހެންކަމުން މިކަމަށް ހައްލެއް ގެނައުމަށް ކިޑްނީ ޓްރާންސްޕްލާންޓްކުރުމުގެ ހުއްދަ އޮންނަ ޤައުމުތަކުގެ ތެރެއިން ޔޫއޭއީއާއެކު ކުރެވުނު މަޝްވަރާތަކަށްފަހު ކިޑްނީ ޓްރާންސްޕްލާންޓްކުރުމަށް ދިވެހީން އެޤައުމަށް ގެންދިޔުމާއި ގުޅޭ އެއްބަސްވުމެއް ސަރުކާރުންވަނީ މިހާރު ޤާއިމުކޮށްފައެވެ.
މިއަހަރުގެ ޖެނުއަރީ މަހުގެ ތެރޭގައި ސަރުކާރުން އެކުލަވާލި މިއެއްބަސްވުމުގެ ދަށުން މިކަމުގައި ޢަމަލުކުރާނެ އުސޫލު އެކުލަވާލުމާއި އިދާރީގޮތުން ކުރަންޖެހޭ މަސައްކަތްތައް މިހާރު ކުރަމުން އަންނަކަމަށް އާސަންދައިން ވިދާޅުވެއެވެ. ޕީއެސްއެމް ނިއުސްއަށް މަޢުލޫމާތު ދެއްވަމުން، އާސަންދައިން ވިދާޅުވީ މިބަލި ތަޙައްމަލުކުރަމުންދާ މީހުންގެ ރަޖިސްޓްރީގައި ތިބި، ޑޯނަރުން ނުލިބޭ ފަރާތްތަކުގެ ތެރެއިން 2 މީހަކު މިހާރު ޝޯޓްލިސްޓުކުރެވިފައިވާކަމަށެވެ. އަދި އުސޫލު އެކުލަވާލާ ނިމުމާއެކު ކުރިއަށް އޮތް ދެމަހެއްހާ ދުވަހުގެތެރޭގައި ކިޑްނީ ޓްރާންސްޕްލާންޓް ކުރަން ދެ މީހުން ފޮނުވާލެވޭނެކަމަށެވެ.
ރާއްޖެއިން ބޭރުން ސިއްޙީ ޚިދުމަތް ހޯދުމުގައި ވަކި ޤައުމެއްގައި ހުންނަ ސިއްޙީ ޚިދުމަތްދޭ ތަންތަނަށް އެކަނި ބަރޯސާވުމުގެ ބަދަލުގައި ފެންވަރު ރަނގަޅު ޚިދުމަތްދޭ އެހެން ޤައުމުތަކުން އާސަންދައިގެ ދަށުން ބޭސްފަރުވާކުރުމުގެ އިންތިޒާމް ހަމަޖެއްސެވުމަށް ސަރުކާރުންވަނީ ނިންމަވާފައެވެ. އެގޮތުން ޔޫއޭއީ އާއި ތައިލެންޑުން، އާސަންދައިގެ ދަށުން ބޭސްފަރުވާކުރެވޭނެ އިންތިޒާމު ހަމަޖައްސަވާ ރައީސުލްޖުމްހޫރިއްޔާ އެކަން ޢިއުލާނުކުރެއްވީ، އެމަނިކުފާނު މިދިޔަ އަހަރު ޗައިނާއަށް ކުރެއްވި ދަތުރުފުޅަށްފަހުގައެވެ.
ރައީސުލްޖުމްހޫރިއްޔާގެ މިނިންމެވުމާއެކު ކިޑްނީ ޓްރާންސްޕްލާންޓް ކުރަންޖެހޭ މީހުންގެ ތެރެއިން، "ފަސްޓް ޑިގްރީ" ނުވަތަ ޢާއިލާގެ ތެރެއިން މައިންބަފައިންނާއި ދަރިންނާއި އެއްބަނޑު އެއްބަފާ ފަރާތެއްގެ ކިޑްނީ ކްރޮސްމެޗު ދިމާނުވާ ޙާލަތްތަކުގައި ތިބި ގިނަ ބަޔަކަށް އުއްމީދުވަނީ އައުވެފައެވެ. ސަބަބަކީ މިވަގުތު ދިވެހީން ކިޑްނީ ޓްރާންސްޕްލާންޓްކުރަންދާ ޤައުމުތަކުގައި ފަސްޓްޑިގްރީ ޑޯނާއެއްގެ ކްރޮސްމެޗު ދިމާނުވާނަމަ ކިޑްނީ ޓްރާންސްޕްލާންޓު ކުރެވޭނެ ނިޒާމެއް އެޤައުމުތަކުގެ ޤާނޫނު ހުރިގޮތުން ނޯންނާތީއެވެ.
އެހެންނަމަވެސް ޔޫއޭއީގައި މިކަމަށް އޮންނަ ޚާއްސަ ބޯޑެއްގެ ބެލުމުގެ ދަށުން އިތުރު ތިމާގެ މީހަކަށްވެސް ކިޑްނީ ޑޮނޭޓްކުރެވޭނެ އިންތިޒާމު އޮންނަކަމަށާއި އެކަން ކުރުމުގައި އެޤައުމުން ބަލާ މައިގަނޑު އުސޫލުތަކުގެ ތެރޭގައި މުސްލިމަކަށްވުމާއި ދިވެއްސަކަށްވުން ހިމެނޭކަމަށް އާސަންދައިންވަނީ މީގެކުރިން ވިދާޅުވެފައެވެ.
ފަސްޓް ޑިގްރީގައި ނުހިމެނޭ ތިމާގެ މީހުން ޑޯނަރުންގެ ގޮތުގައި ތިބި 3 ޕޭޝަންޓުން ކިޑްނީ ޓްރާންސްޕްލާންޓުކުރުމަށް އެދި ރަޖިސްޓްރީވެފައިވާކަމަށްވެސް އާސަންދަ ކުންފުނިންވަނީ ކުރިން ވިދާޅުވެފައެވެ.