ސްޕޯޓްސް ނޭޗަރއިން އިންތިޒާމުކޮށްގެން ފިތުރު ޢީދަށް ޚާއްސަކޮށްގެން ބޭއްވި އޯޕަން 9 ބޯލް ޑަބަލްސް ބިލިއާޑް މުބާރާތުގެ ޗެމްޕިއަންކަން ޝަޒީން އަބްދުއްސަމަދު އާއި ހުސެއިން ފަޔާޒްގެ ޕެއާއިން ހޯދައިފިއެވެ.
އަޙްމަދު ޝިހާދު އާއި ހަސަން ޝާޒް މުޙައްމަދުގެ ޕެއާއާ ބައްދަލުކޮށް ޝަޒީން އާއި ފަޔާޒްގެ ޕެއާއިން މުބާރާތުގެ އެއްވަނަ ހޯދީ ނުވަ ފްރޭމް ތިން ފްރޭމުން ފައިނަލް މެޗު ކާމިޔާބުކޮށްގެންނެވެ. މިދިޔަ ހޯމަ ދުވަހުގެ ހަވީރުން ފެށިގެން ރޭގެ ނިޔަލަށް މާލޭ ޕޫލް ބިލިއާޑް ހޯލުގައި ކުރިއަށްގެންދިޔަ މި މުބާރާތުގެ ތިންވަނަ ހޯދީ އަބްދުﷲ އަފީފް އާއި މުޙައްމަދު ދުންޔާޒްގެ ޕެއާއިންނެވެ.
64 ބައިވެރިންގެ މެދުގައި ކުރިއަށްދިޔަ މި މުބާރާތުގައި ގައުމީ ބިލިއާޑް ޓީމުގެ ގިނަ ކުޅުންތެރިތަކެއް ބައިވެރިވިއިރު، ފައިނަލް މެޗުގައި ކުޅުނު ހަސަން ޝާޒް މުޙައްމަދު ބުނީ މިފަދަ މުބާރާތެއް ބޭއްވުމަކީ ބިލިއާޑް ކުޅުންތެރިންނަށް ކުރިއެރުމަށް ލިބޭ ވަރަށް ބޮޑު ފުރުސަތެއް ކަމަށެވެ.
ސްވިމިންގެ އިތުރުން ބިލިއާޑުގެ ކޯޗެއްގެ ދައުރު އަދާކުރާ ސްޕޯޓްސް ނޭޗަރގެ ޗެއާމަން އަސްލަމް އަބްދުﷲ ބުނީ މިއީ ޢީދާ ދިމާކޮށްގެން މިގޮތަށް ބޭއްވި ފުރަތަމަ މުބާރާތް ކަމަށާއި، ކުރިއަށް އޮތް ތަނުގައި މިފަދަ މުބާރާތްތައް ބާއްވަން މަސައްކަތްކުރާނެ ކަމަށެވެ. އަސްލަމް ބުނީ މިފަދަ މުބާރާތެއް ބޭއްވުމުގެ މަގުސަދަކީ ޕޫލް ބިލިއާޑް ކުރިއަރުވައި، ބައިވެރިންގެ މެދުގައި ގުޅުން ބަދަހިކޮށް، އެކުވެރިކަން އާލާކުރުން ކަމަށެވެ.
މި މުބާރާތުގެ ޗެމްޕިއަން ޓީމަށް 3000 ރުފިޔާ، ރަނަރަޕް ޓީމަށް 1500 ރުފިޔާ އަދި ތިންވަނައަށް 1000 ރުފިޔާ ވަނީ ދީފައެވެ. ސްޕޯޓްސް ނޭޗަރ އަކީ ސްވިމިންގެ ހަރަކާތްތަކަށް ޚާއްސަ ޖަމުއިއްޔާއެކެވެ.