ޞައްޚަ ލިޔެކިޔުން ނެތި ޕާކިސްތާނަށް ނުޤަވާޢިދުން ހިޖުރަކޮށްގެން ދިރިއުޅޭ މީހުންނާއި، އަފްޣާނިސްތާނުގެ ރައްޔިތު ކަމުގެ ކާޑު އޮތް މީހުން ޕާކިސްތާނުން ފޭބުމަށް އެ ޤައުމުގެ ދާޚިލީ ވުޒާރާއިން އަންގައިފިއެވެ. އެ ވުޒާރާއިން ބުނީ، އެ ޤައުމުގައި ނުޤަވާޢިދުން ދިރިއުޅޭ މީހުން ޤައުމު ދޫކޮށް އަމިއްލަ ވަޒަނަށް ދިޔުމަށް މާރިޗު 31ވަނަ ދުވަހާ ހަމައަށް މުހުލަތު ދީފައިވާނެ ކަމުގައެވެ. އަދި، އޭޕްރިލް 1ވަނަ ދުވަހުން ފެށިގެން އެ ފަދަ މީހުން ހޯދައި ޑީޕޯޓު ކުރަން ފަށާނެ ކަމުގައެވެ.
ޕާކިސްތާނުގައި ދިރިއުޅޭ އަފްޣާނިސްތާނުގެ ރައްޔިތު ކަމުގެ ކާޑު އޮތް މީހުން އެ ޤައުމުން ފޭބުމަށް އަމުރު ކޮށްފައި މި ވަނީ ދެ ޤައުމުގެ ދެމެދުގައި މަސްރަޙު ހޫނުވެފައިވާ ދަނޑިވަޅެއްގައެވެ. ޕާކިސްތާނުން ޤަބޫލު ކުރާ ގޮތުގައި، އެ ޤައުމުގައި ދެމުންދާ ނިރުބަވެރި ޙަމަލާތަކުގެ ފަހަތުގައި ތިބީ، އަފްޣާނިސްތާނުގެ ސަރުކާރުން ޙިމާޔަތާއި ރައްކާތެރިކަން ފޯރުކޮށްދޭ ނިރުބަވެރި ޖަމާޢަތްތަކެވެ. ނަމަވެސް، އަފްޣާނިސްތާނުގެ ވެރިކަން ކުރާ ޠާލިބާނުންގެ ސަރުކާރުން މި ތުހުމަތު ދޮގު ކުރެއެވެ.
"މިއަދާ ހަމައަށް ޕާކިސްތާނުން ދިޔައީ އެންމެ ފުރިހަމަ ގޮތުގައި މެހުމާންދާރީ އަދާ ކުރަމުން އަދި ދަޢުލަތެއްގެ ވާޖިބުތައް އެންމެ ފުރިހަމައަށް އަދާކުރަމުން،" ޕާކިސްތާނުގެ ދާޚިލީ ވުޒާރާއިން ނެރުނު ބަޔާނެއްގައި ބުނެފައިވެއެވެ. "އަޅުގަނޑުމެން ތަކުރާރު ކުރަން، ޕާކިސްތާނުގައި ދިރިއުޅޭ ހުރިހާ ރައްޔިތުން ވެސް ޤާނޫނީ ގޮތުން ފުރިހަމަ ކުރަން ޖެހޭ އިޖުރާޢަތްތައް ފުރިހަމަ ކުރަން ޖެހޭނެ."
ޞައްޙަ ލިޔެކިޔުންތައް ނެތި ޕާކިސްތާނަށް ހިޖުރަކޮށް، ނުޤަވާޢިދުން ދިރިއުޅެމުންދާ މީހުން ހޯދައި، އެ މީހުންގެ ވަޒަނަށް ޑީޕޯޓު ކުރުމަށް އެ ޤައުމުގެ ސަރުކާރުން ޚާއްޞަ އޮޕަރޭޝަނެއް ފަށާފައި ވަނީ 2023ވަނަ އަހަރުއެވެ. އެ ޤައުމުގައި ނުޤަވާޢިދުން ދިރިއުޅޭ މީހުންގެ ތެރެއިން އެންމެ ގިނައީ އަފްޣާނިސްތާނުގެ ރައްޔިތުންނާއި ރެފިއުޖީންނެވެ. ޕާކިސްތާނުގެ ދާޚިލީ ވުޒާރާއިން ބުނީ، ޑީޕޯޓު ކުރުމުގައި އެންމެ ފުރަތަމަ އިސްކަން ދޭނީ ޞައްޙަ ލިޔެކިޔުންތައް ނެތި ނުޤަވާޢިދުން ދިރިއުޅޭ މީހުންނަށް ކަމުގައެވެ.
އެކުވެރި ދައުލަތްތައް (އދ)ން ހާމަކޮށްފައިވާ ތަފާސްހިސާބުތަކުން ފެންނަ ގޮތުގައި އަފްޣާނިސްތާނުގެ ރައްޔިތު ކަމުގެ ކާޑު އޮތް 800,000ށްވުރެ ގިނަ މީހުން މި ވަގުތު ދަނީ ޕާކިސްތާނުގައި ދިރިއުޅެއެވެ. އަދި، ޕާކިސްތާނުގެ ސަރުކާރުގައި ރަޖިސްޓަރީވެ، 'ޕްރޫފް އޮފް ރެސިޑެންސް' (ޕީއޯއާރް) ކާޑު ދޫކޮށްފައިވާ އަފްޣާނިސްތާނުގެ 1.3 މިލިޔަން ރައްޔިތުން ޕާކިސްތާނުގައި ދިރިއުޅޭ ކަން އެ ޤައުމުގެ ރަސްމީ އިދާރާތަކުން ވަނީ ހާމަކޮށްފައެވެ. ޕާކިސްތާނުގެ ދާޚިލީ ވުޒާރާގެ އެންމެ ފަހުގެ އެންގުމަށް ފަހު، ޕީއޯއާރް ކާޑު ދޫކޮށްފައިވާ މީހުންނާ މެދު އަމަލު ކުރާނެ ގޮތް ސާފެއް ނޫނެވެ.
އދން ބުނީ، 2023ވަނަ އަހަރުގެ އޮޕަރޭޝަނާ ގުޅިގެން ޕާކިސްތާނުގައި ދިރިއުޅެމުން ދިޔަ އަފްޣާނިސްތާނުގެ ރައްޔިތުންގެ ތެރެއިން 800,000ށްހާ މީހުން އެނބުރި ޤައުމަށް ދަތުރު ކޮށްފައިވާ ކަމުގައެވެ. ރަޝިޔާއާއި އެމެރިކާގެ އިސްތިޢުމާރީ ސިފައިން އަފްޣާނިސްތާނަށް އަރައި ކޮށްފައިވާ ހަނގުރާމަތަކާ ގުޅިގެން އެ ޤައުމުން 2.8 މިލިޔަނަށް ވުރެ ގިނަ މީހުން ޕާކިސްތާނަށް ހިޖުރަ ކޮށްފައިވާ ކަމުގައި ވެސް އދން ބުންޏެވެ.
މި ވަގުތު ޕާކިސްތާނުގައި ދިރިއުޅެމުންދާ އަފްޣާނިސްތާނުގެ ރައްޔިތުންގެ ތެރޭޭގައި އެމެރިކާއަށް ހިޖުރަ ކުރުމުގެ ފުރުޞަތު ދީފައިވާ، އަދި އެ ކަމުގެ އިދާރީ މަރުޙަލާތައް ހިނގަމުންދާ އެތަކެއް ސަތޭކަ ބަޔަކު ހިމެނެއެވެ. އެ މީހުންނަށް އެމެރިކާއަށް ހިޖުރަ ކުރުމުގެ ފުރުޞަތު ދިނުމަށް ނިންމާފައި ވަނީ 2021ވަނަ އަހަރުގެ އޮގަސްޓު މަހު، އަފްޣާނިސްތާނުގެ ޤާނޫނީ ސަރުކާރު ވައްޓައިލައި ނިރުބަވެރި ޖަމާޢަތް، ޠާލިބާނުން އެ ޤައުމުގެ ވެރިކަން ފޭރިގަތުމާ ގުޅިގެންނެވެ.