އިނގިރޭސި ޕްރިމިއާ ލީގުގައި ރޭ މެންޗެސްޓަރ ސިޓީ އާއި ދެކޮޅަށް ލިވަޕޫލް ކުޅުނު މެޗު 2-0 ގެ ނަތީޖާއަކުން ލިވަޕޫލް މޮޅުވެ ތާވަލުގެ ކުރީގައި 11 ޕޮއިންޓުގެ ލީޑެއް ހޯދައިފި އެވެ.
މެންޗެސްޓަރ ސިޓީގެ އިއްތިހާދު ސްޓޭޑިއަމްގައި ކުޅުނު މި މެޗުން ލިވަޕޫލް މޮޅުވުމާއެކު އެ ޓީމަށް ވަނީ ލީގުގައި މިހާތަނަށް ކުޅުނު 27 މެޗުން 64 ޕޮއިންޓު ލިބިފަ އެވެ. ދެވަނައިގައި އޮތް އާސެނަލް އަށް 26 މެޗުން ލިބިފައިވަނީ 53 ޕޮއިންޓެވެ.
ލިވަޕޫލް އަށް ތާވަލުގެ ކުރީގައި މިހާ ބޮޑު ލީޑެއް ލިބިފައިވަނީ މި ހަފްތާގައި ވެސްޓްހޭމް ޔުނައިޓެޑް އަތުން އާސެނަލް ބަލިވުމާއި ގުޅިގެންނެވެ. އަދި މިހާރުވެސް އާސެނަލް އެއް މެޗު މަދުން ކުޅެފައިވާއިރު އެ މެޗުން މޮޅުވެއްޖެނަމަ އެ ފަރަގު 8 ޕޮއިންޓަށް ކުޑަވެގެންދާނެ އެވެ.
ސިޓީގެ އަމިއްލަ ދަނޑުގައި ކުޅުނު މި މެޗު ފަށައިގެން އެ ޓީމުން ރަގަޅު ކުޅުމެއް ދެއްކި ނަމަވެސް މެޗުގެ 14 ވަނަ މިނިޓުގައި ލިވަޕޫލް އިން ލަނޑެއް ޖެހުމާއިއެކު އެ ޓީމުގެ ކުޅުމަށް ވަނީ ބަދަލުތަކެއް އައިސްފަ އެވެ. މި ލަނޑު އެ ޓީމަށް ކާމިޔާބުކޮށްދީފައިވަނީ މުހައްމަދު ސަލާ އެވެ. މިއީ މި ސީޒަނުގައި އޭނާ ޖެހި 30 ވަނަ ލަނޑެވެ.
މި ލަނޑާއެކު ސަލާ ވަނީ ލިވަޕޫލް އާއިއެކު ފަސް ސީޒަނެއްގައި 30 އަށްވުރެ ގިނަ ލަނޑު އެއް ސީޒަނެއްގައި ޖަހާފަ އެވެ. އަދި މީގެ ކުރިން މި ރިކޯޑް ހަދާފައިވާ ލިވަޕޫލްގެ ކުޅުންތެރިންނަކީ ރޮޖަރ ހަންޓް އާއި އިއާން ރަޝް އެވެ.
އަދި މެޗުގެ ފުރަތަމަ ހާފުގެ ކުޅުން ނިމެން 8 މިނިޓަށް ވެފައިވަނިކޮށް ސަލާ ދިން ބޯޅަ އަކުން ޑޮމިނިކް ސޮބޮޒްލާއީ ވަނީ އިތުރު ލަނޑެއް ޖަހާ މެޗުގެ ނަތީޖާ 2-0 އަށް ބަދަލުކޮށްފަ އެވެ. މި މެޗުގައި ސަލާ ޖެހި ލަނޑަކީ ސޮބޮޒްލާއީގެ އެސިސްޓަކުން ޖަހާފައިވާ ލަނޑެކެވެ.
އަނިޔާގެ މައްސަލަތައް އިންތިހާއަށް ކުރިމަތިވެފައިވާ މެންޗެސްޓަރ ސިޓީއަށް މި މެޗުގައިވެސް އެދެވޭ ކުޅުމެއް ދެއްކިފައިނުވާއިރު އެ ޓީމުގެ އެންމެ މުހިންމު ކުޅުންތެރިޔާގެ ގޮތުގައި މިވަގުތު ހުރި އާލިން ހާލަންޑް އަށް ލިބިފައިވާ އަނިޔާގެ ސަބަބުން އޭނާވެސް މި މެޗުގައި ނުކުޅެ އެވެ.
އިއްތިހާދު ސްޓޭޑިއަމަކީ ފަހަކަށް އައިސް ލިވަޕޫލް އަށް ފަސޭހަ ތަނަކަށް ނުވި ނަމަވެސް ރޭގެ މެޗުގައި އެ ޓީމު ފެނިގެންގޮސްފައިވަނީ މުޅިން ތަފާތު ކޮށެވެ. މި ދަނޑުގައި އެންމެ ފަހުން ލިވަޕޫލް ކުޅުނު 15 މެޗުގެ ތެރެއިން އެ ޓީމަށް މޮޅުވެވިފައިވަނީ އެންމެ ފަހަރަކު އެވެ.