ދަރިންނަކީ މާތް ﷲ ދެއްވާ އަމާނާތެއް ކަމަށާއި، އެ އަމާނާތާމެދު، ޤިޔާމަތް ދުވަހުން ސުވާލުކުރެވޭއިރު، ދަރިން ތަރުބިއްޔަތު ކުރުމުގައި ގަދަ އަޅާ މަސައްކަތް ކުރަންޖެހޭ ކަމަށް އިސްލާމިކް މިނިސްޓަރ ޑރ އަހުމަދު ޒިޔާދު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، ރަމަޟާން މަހުގެ ރޭތައް އިޙްޔާ ކުރެއްވުމަށް ކުރިއަށްގެންދަވާ ޕްރޮގްރާމްގެ މިއަހަރުގެ ފަހު ޖަލްސާގައި ރޭ ވާހަކަފުޅުދައްކަވަމުންނެވެ.
ރޭގެ އިޙްޔާ ފޯރަމްގައި ދަރުސް ދެއްވާފައިވަނީ، ދަރިން ތަރުބިއްޔަތު ކުރުމާ ބެހޭގޮތުންނެވެ. މިމައުޟޫއަށް ވާހަކަފުޅުދެއްކެވީ އިސްލާމިކް މިނިސްޓަރ ޑރ އަހުމަދު ޒިޔާދާއި، އައްޝައިޚް އަހުމަދު ފަހުމީ ދީދީއެވެ.
އިސްލާމިކް މިނިސްޓަރ އަހުމަދު ޒިޔާދު ވިދާޅުވީ، ދަރިން ހެޔޮގޮތުގައި ތަރުބިއްޔަތު ކުރުމަކީ، ދެ ދުނިޔޭގެ ސަވާބު މައިންބަފައިންނަށް ލިބޭނެ ހެޔޮކަން ބޮޑުވެގެންވާ އަމަލެއް ކަމަށެވެ.
ދަރިންނަކީ މާތް ﷲ ދެއްވާ އަމާނާތެއް ކަމަށާއި، އެ އަމާނާތާމެދު ރައްކާތެރިވެ، ދަރިން ފުރިހަމަ ގޮތުގައި ތަރުބިއްޔަތުކޮށްފި ނަމަ، ﷲ ރަހްމަތްފުޅުން މައިންބަފައިންނަށް، ސުވަރުގެ ލިބޭނެ ކަމަށް ހަދީސުން ސާބިތުވާ ކަމަށް މިނިސްޓަރ ވިދާޅުވިއެވެ. އެހެންނަމަވެސް މުޖުތަމަޢުގެ ހާލަތާމެދު ކަންބޮޑުވުން ފާޅުކުރައްވާ ވިދާޅުވީ، އެކި ދިމާއިން ތަފާތު ފިކުރުތަކާ ވިސްނުންތައް މުޖުތަމަޢުގައި އެނބުރެމުންދާ ކަމަށާއި، އެއީ ދަރިން ހެޔޮގޮތުގައި ތަރުބިއްޔަތު ކުރުމުގައި އޮތް ވަރަށް ބޮޑު ގޮންޖެހުމެއް ކަމަށެވެ.
ދަރިން އުޅޭ ނޫޅޭގޮތް ބެލުމުގެ ބަދަލުގައި ބައެއް މައިންބަފައިން، ދުނިޔަވީ އުފާތަކަށް ހެއްލި ދަރިންނާ މެދު ފަރުވާ ކުޑަކުރަމުންދާ ކަމަށް މިނިސްޓަރ ވިދާޅުވިއެވެ. އަދި 7 އަހަރާ 10 އަހަރާ ދެމެދަކީ، ދަރިންނަށް އެންމެ ސަމާލުކަން ދޭންޖެހޭ އުމުރުފުރާ ކަމަށާއި، އެ އުމުރުގައި ދަރިންނަށް ރަގަޅު ހެޔޮ އާދަތައް ދަސްކޮށްދިނުން މުހިންމު ކަމަށް ވިދާޅުވިއެވެ. އެގޮތުން ލަދުވެތިކަމަކީ ދަރިންނަށް ދަސްކޮށްދެން ޖެހޭ އެންމެ މުހިންމު އެއް އާދަކަމަށްވެސް މިނިސްޓަރ ވިދާޅުވިއެވެ. އަދި ލަތުވެތިކަމަށްފަހު، އެހެން މީހުންނަށް އިޙްތިރާމް ކުރުމުގެ އާދައަކީވެސް ދަރިންނަށް ދަސްކޮށްދެންޖެހޭ މުހިންމު އާދައެއް ކަމަށް މިނިސްޓަރ ވިދާޅުވިއެވެ.
އައްޝައިޚް އަޙުމަދު ފަހުމީ ދީދީގެ ވާހަކަގައި ދަރިންނަށް އިސްލާމީ ތަރުބިއްޔަތު ދިނުމުގެ މުހިއްމުކަމުގެ މައްޗަށް އަލި އަޅުއްވާލެއްވިއެވެ. ހަތަރު ކަމަކަށް ދަރިންގެ ހިތުގައި ލޯބި ޖައްސަން ޖެހޭ ކަމަށާއި، އެގޮތުން ކީރިތި ރަސޫލާ މުހައްމަދުއް ސައްލައްﷲ އަލައިހި ވަސައްލަމަގެ މައްޗަށް ލޯބިވުމަށް ދަރިންނަށް ދަސްކޮށްދިނުމަކީ ތަރުބިއްޔަތުގެ އެންމެ މުހިންމު އެއް ރުކުން ކަމަށް ވިދާޅުވިއެވެ. ރަސޫލާއާއި ސަހާބީންނަށްފަހު، ރަސޫލާގެ އަހުލުބައިތުންގެ މައްޗަށް ލޯބި ޖެއްސުމަށާއި، ގުރުއާނުގެ މައްޗަށް ދަރިންގެ ހިތްތައް ލެންބުމަށް މައިންބަފައިން މަސައްކަތް ކުރަންޖެހޭ ކަމަށް ވިދާޅުވިއެވެ.
އިސްލާމީ ތަރުބިއްޔަތުގެ އިތުރުން، އިލްމީ ނަޒަރަކުން ދަރިން ތަރުބިއްޔަތު ކުރުމުގެ މައްޗަށްވެސް ފަހުމީ އަލިއަޅުއްވާލެއްވިއެވެ. އެގޮތުން ދަރިން ތަރުބިއްޔަތު ކުރުމުގެ ނަމުގައި މައިންބަފައިން ކުރާ ބައެއް ކުށްތައް ފާހަގަކުރައްވާ ދީނީގޮތުން ދަރިން ތަރުބިއްޔަތު ކުރުމުގައި އަމަލުކުރަންވީ ރަނގަޅު ގޮތްތައް ވިދާޅުވެ ދެއްވިއެވެ.
ރޭގެ ޖަލްސާގައި މިނިސްޓަރ ޒިޔާދު ވަނީ ރަމަޟާން މަހަށް ޚާއްސަކޮށް ސަރުކާރުން ކުރިއަށްގެންދެވި ހަރަކާތްތަކުގެ މައްޗަށް ޖުމްލަ ގޮތެއްގައި ބައްލަވާލައްވާފައެވެ. އަދި ރަމަޟާން މަސް ނިމިގެންދާއިރު، ދީނީ އަޅުކަމުގެ އީދެއްގެ އިހްސާސް، ރަމަޟާންމަހުގެ ތެރޭގައި ގެނެސްދެވުނުކަމަށް އުންމީދުކުރައްވާ ކަމަށް ވިދާޅުވިއެވެ.