ރެއާލް މެޑްރިޑުގެ ފޯވާޑް ލައިނުގެ ކުޅުންތެރިން އެކުވެރިކަން ކުޑަވެ ކޯޅޭތީވެ ކޯޗު ކާލޯ އެންޗެލޯޓީ އެކަމާ ކަންބޮޑުވެ، ކުޅުންތެރިންނަށް އިންޒާރެއް ދީފިއެވެ.
ސްޕޭނުގެ މީޑިއާތަކުން މިކަން ކަށަވަރުކޮށްދެމުން ބުނެފައިވަނީ ކުޅުންތެރިން ކޯޅި ޓީމަށް އޭގެ ގެއްލުންވާނަމަ އެ ކުޅުންތެރިއަކު މީގެ ފަހުން ބެންޗަށް ބަދަލުކުރާނެ ކަމަށެވެ.
ރެއާލް އަކީ ޔޫރަޕުގައި އޮތް އެންމެ ވަރުގަދަ އެޓޭކިން ލައިން އޮތް އެއް ޓީމެވެ. ފްރާންސްގެ ކެޕްޓަން ކީލިއަން އެމްބާޕޭ އާއި ފީފާއިން ހޮވި ހުސްވި ސީޒަނުގެ ދުނިޔޭގެ އެންމެ މޮޅު ކުޅުންތެރިޔާ ބްރެޒިލްގެ ވިނީޝިއަސް ޖޫނިއާ އާއި އެ ގައުމުގެ ރޮޑްރީގޯ އާއި އިނގިރޭސި އެޓޭކިން މިޑްފީލްޑަރު ޖޫޑް ބެލިންހަމަކީ އެޓޭކުގެ އެންމެ އިސް ކުޅުންތެރިންނެވެ.
ނަމަވެސް ކޯޗު އެންޗެލޯޓީ މި ކުޅުންތެރިންނާ މެދު އެންމެ ބޮޑަށް ހިތްހަމަ ނުޖެހުނީ އެތްލެޓިކޯ މެޑްރިޑާ ދެކޮޅަށް ކުޅުނު މެޗު އެއްވަރުވެ ރެއާލް އަށް ސްޕެނިޝް ލީގުގައި ލިބިފައިވާ ލީޑް އެއް ޕޮއިންޓަށް ހަނިވުމުންނެވެ.
ސްޕޭނުގެ މީޑިއާތަކުން ބުނަނީ އެންޗެލޯޓީ ހިތްހަމަ ނުޖެހުނު އަނެއް ކަމަކީ ދަނޑުމަތީގައި އޭނާ ހަވާލުކޮށްފައިވާ ޒިންމާތަކާ ހިލާފަށް ކުޅުންތެރިން މަސައްކަތް ކުރުން ކަމަށެވެ. މިހެންވެ ބްރެޒިލްގެ ފޯވަޑް ވިނީޝިއަސް ޖޫނިއާއަށް މިހާރު އަންގާފައިވަނީ އިސް ފޯވަޑެއްގެ ގޮތުގައި ކުޅޭއިރު އަރިމަތިން ކުޅޭ ކުޅުންތެރިއަކަށް އޭނާ ބަދަލު ނުވުމަށެވެ. އެންޗެލޯޓީ ބޭނުންވަނީ ދެ އަރިމަތި ކީލިއަން އެމްބާޕޭ އާއި ރޮޑްރީޑޯ އަށް ހުސްކުރުމަށެވެ. އަދި މި ކުޅުންތެރިންގެ ފަހަތުން ބެލިންހަމް ސަޕޯޓިން ރޯލެއް ކުޅުމަށެވެ.
ނަމަވެސް އެތްލެޓިކޯ މެޑްރިޑް މެޗުގެ އިންޓަވަލް ވަގުތު ކުޅުންތެރިން ޗޭންޖިން ރޫމަށް ދިޔައީ އެކަކު އަނެކަކަށް ވަރަށް ބޮޑަށް ޝަކުވާ ކުރަމުންނެވެ. ހާއްސަކޮށް ފޯވަޑް ލައިނުގައި ހަރަކާތްތެރިވާ ކުޅުންތެރިންނެވެ.
ސްޕޭނުގެ މީޑިއާތަކުން ބުނަނީ ޗެމްޕިއަންސް ލީގުގައި މިރޭ އިނގިރޭސިވިލާތުގެ މެންޗެސްޓާ ސިޓީއާ ދެކޮޅަށް ނުކުންނައިރު އޭނާގެ އިރުޝާދުތަކާއި ހިލާފުވާނަމަ ލަސް ނުކޮށް ކުޅުންތެރިން ބާލާނެ ކަމަށް އެންޗެލޯޓީ ބުނެފައިވާ ކަމަށެވެ.
ރެއާލް މެޑްރިޑުގެ އެޓޭކިން ޑިޕާޓްމަންޓްގައި މައްސަލަ ޖެހިގެން އުޅެނީ މި ސީޒަނަށް އެމްބާޕޭ ގެނައުމުންނެވެ. އޭނާ އައުމާއެކު ބެލިންހަމާއި ވިނީޝިއަސް އަށް ކުރިން ގޯލު ޖަހަން ލިބޭ ފުރުސަތުތައް މިހާރު ނުލިބުމާއި ކުޅުންތެރިންގެ މެދުގައި ދަނޑުމަތީގައި އަދި ދަނޑުން ބޭރުގެ ގުޅުން ވެސް ރަނގަޅު ނޫން ކަމަށްވެ އެވެ.
ނަމަވެސް ސީޒަނުގެ ކުރީކޮޅު ފޯމު ދަށްވި ނަމަވެސް މިހާރު ފޯމުގައި ހުރެ އެންމެ ރަނގަޅަށް ގޯލު ޖަހަމުންދާ ކުޅުންތެރިއަކީ އެމްބާޕޭ އެވެ. މިހެންވެ ރެއާލްގެ ކޯޗާއި މެނޭޖްމަންޓުން އޭނާއަށް ވަރަށް ބޮޑަށް އިތުބާރު ކުރާ ކަމަށް ވެސް ސްޕޭނުގެ ނޫސްތަކުން ބުނެ އެވެ.