ޣައްޒާ ފޭރިގަތުމަށް ފަހު، ތަރައްޤީ ކުރަން މެދުއިރުމަތީގެ ޤައުމުތަކާ ޙަވާލު ކުރެވިދާނެ: ޓްރަމްޕް

ފަލަސްޠީނުގެ ޣައްޒާ ފޭރިގަތުމަށް ފަހު، އެ ތަން ތަރައްޤީ ކުރުމުގެ މަސައްކަތް މެދުއިރުމަތީގެ ޤައުމުތަކާ ޙަވާލު ކުރުމަށް ވިސްނަވަމުން ގެންދަވާ ކަމުގައި އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ. އޭނާ މި މޭރުމުން ވާހަކަފުޅު ދައްކަވާފައި މި ވަނީ، ޣައްޒާ ފޭރިގަތުމަށް ފަހު، އެއީ އެމެރިކާގެ ބިމަކަށް ހަދައި، ފަލަސްޠީނުގެ ރައްޔިތުން އެ މީހުންގެ ވަޒަނުން ބޭރު ކުރާނެ ކަމަށް ވިދާޅުވުމާ ގުޅިގެން އޭނާއަށް ބޮޑެތި ފާޑުކިޔުންތަކެއް އަމާޒުވަމުންދާ ދަނޑިވަޅެއްގައެވެ.

ޣައްޒާ ފޭރިގަންނަން ބޭނުންވާ ކަން ޓްރަމްޕް ހާމަ ކުރައްވާފައި ވަނީ، ފަލަސްޠީނުގެ ބިންތަކަށް ވެރިވެގަނެ، ފަލަސްޠީނުގެ ރައްޔިތުންގެ މައްޗަށް އިސްތިޢުމާރީ ވެރިކަމެއް ހިންގަމުންދާ ޒަޔަނިސްޓު އިސްރާއީލުގެ ހައްދުފަހަނަ އެޅި ބޮޑުވަޒީރު ބެންޖަމިން ނަތަންޔާހޫއާ އެކު ބޭއްވެވި ބައްދަލުވުމަކަށް ފަހުއެވެ. އޭނާ ފުރަތަމަ ހުށަހެޅުއްވީ، ޣައްޒާގެ ރައްޔިތުން މިޞްރާއި އުރުދުނަށް ބަދަލު ކުރުމަށެވެ. ނަމަވެސް، ޢަރަބި ޤައުމުތަކުން އެ ކަމަށް އިންކާރު ކުރުމުން، ނިރުބަވެރި ނަތަންޔާހޫ ވަނީ ސަޢޫދީ ޢަރަބިއްޔާގައި ފަލަސްޠީނުގެ ރައްޔިތުންގެ ދައުލަތެއް ޤާއިމުކޮށް، ވަަޒަންވެރި ކުރުވުމަށް ހުށަހަޅާފައެވެ. ނަމަވެސް، ޢަރަބި ޤައުމުތަކާއި އިސްލާމީ ޤައުމުތަކުން ވަނީ މި ކަން ކުށްވެރި ކޮށްފައެވެ. އޭގެ ތެރޭގައި ދިވެހިރާއްޖެ ވެސް ހިމެނެއެވެ.

"ޣައްޒާ ގަތުމަށް ފަހު، އެ ތަނުގެ މިލްކުވެރިކަން ހޯދަން އަޅުގަނޑު ބޭނުން،" ޓްރަމްޕް ވިދާޅުވިއެވެ. "އަޅުގަނޑުމެން އެ ތަން އާރާސްތު ކުރުމުގެ ތެރޭގައި، އެ ތަނުގެ ބައެއް ސަރަޙައްދުތައް ތަރައްޤީ ކުރުމަށް މެދުއިރުމަތީގެ ޤައުމުތަކާ ޙަވާލު ކުރެވިދާނެ، އެހެން މީހުންނަށް ވެސް އެކަން ކުރެވިދާނެ، ނަމަވެސް އަޅުގަނޑުމެން ބޭނުންވާ ގޮތަކަށް. އެ ތަން ފޭރިގަތުމަށް ބޭނުންވާ ކަމާ މެދު އެއްވެސް ޝައްކެއް ނެތް، އަދި ޙަމާސުން އެ ތަނަށް އަލުން އަނބުރާ އައުމުގެ ފުރުޞަތެއް ނުދެވޭނެ."

ޣައްޒާ އޮތީ ސުންނާފަތިކޮށް ބިމާ ހަމަކޮށްލާފައި

ޓްރަމްޕް މި މޭރުމުން ވިދާޅުވެފައި ވަނީ، އެމެރިކާގެ ނިއު އޯލީންސަށް ފުރާވަޑައިގެންނެވުމުގެ ކުރިން ނޫސްވެރިންނާ ވާހަކަފުޅު ދައްކަވަމުންނެވެ. "އެނބުރި ދާނެ ތަނެއް، އެއްޗެއް ނެތް. އެ ތަން އޮތީ ސުންނާފަތިވެފައި. ބާކީ ހުރި އިމާރާތްތައް ވެސް ތަލައިލެވޭނެ. ހުރިހާ އެއްޗެއް ސުންނާފަތި ކޮށްލެވޭނެ،" އޭނާ ވިދާޅުވިއެވެ. ޣައްޒާގެ ބައެއް ރެފިއުޖީންނަށް އެމެރިކާއަށް ހިޖުރަ ކުރުމުގެ ފުރުޞަތު ދިނުމާ މެދު ވިސްނަވަމުން ގެންދަވާ ކަމުގައި ވެސް އޭނާ ވިދާޅުވިއެވެ.

ޣައްޒާގެ ޢާންމު ރައްޔިތުންގެ ގެދޮރާއި ޢުމްރާނީ ވަސީލަތްތައް ސުންނާފަތިކޮށް ބިމާ ހަމަކޮށްލާފައި ވަނީ އެ ސަހަރުގެ ރައްޔިތުންގެ ނަސްލުހޭދު ކުރުމަށް ޔަހޫދީ ފައުޖުން ހިންގި ލާއިންސާނީ ޢުދުވާނުގެ ތެރެއިންނެވެ. އެ ޢުދުވާން ހިންގާފައި ވަނީ އެމެރިކާގެ އެއްބާރުލުމާއި އެހީތެރިކަމާ އެކުގައެވެ. އެމެރިކާއިން ފޯރުކޮށްދެމުންދާ ނުރައްކާތެރި އަދި ފަނާކުރަނިވި ހަތިޔާރުތައް ބޭނުން ކޮށްގެންނެވެ. ފަލަސްޠީނުގެ މުސްލިމުންގެ ނަސްލު ނައްތައިލުމަށް ޔަހޫދީން ހިންގަމުންދާ ޖަރީމާގެ އެންމެ ބޮޑު މަދަދުގާރަކީ އެމެރިކާއެވެ.

ޔަހޫދީންގެ ޤަތުލުޢާންމު ފަށާފައި ވަނީ 2023ވަނަ އަހަރުގެ އޮކްޓޫބަރު މަހުގެ 7ވަނަ ދުވަހުއެވެ. ޢުދުވާން ހިންގުން މެދުކަނޑައިލާފައި ވަނީ ޣައްޒާގައި ވެރިކަން ކުރާ ޙަމާސް ޖަމާޢަތާއި ޔަހޫދީންނާ ދެމެދު ޖަނަވަރީ 19ވަނަ ދުވަހު އަމަލު ކުރަން ފެށި ސުލްޙައިގެ އެއްބަސްވުމެއްގެ ދަށުންނެވެ. ޔަހޫދީ ފައުޖުގެ ޤަތުލުޢާންމުގައި ޝަހީދު ކޮށްލާފައިވާ މީހުންގެ އަދަދު 61,700ށް އުފުލިފައިވާއިރު، ޒަޚަމު ކޮށްލާފައިވާ މީހުންގެ އަދަދު 111,000ށް އަރާ ކަމުގައި ޣައްޒާގެ މީޑިޔާ އޮފީހުން ހާމަކުރިއެވެ. އެ އަދަދުތައް އަދިވެސް ދަނީ އުފުލެމުންނެވެ. އދން ބުނީ، ޣައްޒާގެ ރައްޔިތުންގެ ގެދޮރާއި އުމްރާނީ ވަސީލަތްތަކުގެ ތެރެއިން ތިންބައިކުޅަ ދެބައި ސުންނާފަތިކޮށް ބިމާ ހަމަކޮށްލާފައިވާ ކަމުގައެވެ.

ޣައްޒާ ފޭރިގަތުމާ މެދު ޢަރަބިންނާ މަޝްވަރާ ކުރަން ޓްރަމްޕް ބޭނުންވޭ

ޣައްޒާ ފޭރިގަނެ، އެ ތަނުގެ މިލްކުވެރިކަން ހޯދުމަށް ބޭނުންވާ ކަން ޓްރަމްޕް ދެވަނަ ފަހަރަށް ހާމަކުރެއްވުމާ އެކު ޙަމާސުން ވަނީ އެ ކަން އެންމެ ހަރުކަށި އިބާރާތުން ކުށްވެރި ކޮށްފައެވެ. "ޣައްޒާއަކީ ގަނެވިއްކޭނެ ފަދަ މުދާގަނޑެއް ނޫން. އެއީ، [ޔަހޫދީން] ވެރިވެގަނެފައިވާ ފަލަސްޠީނުގެ ބިންތަކުގެ ތެރެއިން މުހިންމު ބިމެއް،" އެ ޖަމާޢަތުގެ އިސް އޮފިޝަލެއް ކަމުގައިވާ ޢިއްޒަތު އަލް-ރަޝަޤު ވިދާޅުވިއެވެ.

ޣައްޒާ ފޭރިގަތުމާ ގުޅޭ ގޮތުން މަޝްވަރާ ކުރެއްވުމަށް ބައެއް ޢަރަބި ޤައުމުތަކުގެ ވެރިންނާ ބައްދަލު ކުރެއްވުމަށް ޓްރަމްޕް ގެންދަވަނީ މަސައްކަތް ކުރައްވަމުންނެވެ. މި ކަން ހާމަ ކޮށްފައި ވަނީ ޒަޔަނިސްޓު އިސްރާއީލުގެ ނިރުބަވެރި ރައީސް އައިޒެކް ހެރްޒޮގެވެ. އޭނާ ބުނީ، އެ ކަމާ ގުޅޭ ގޮތުން މަޝްވަރާ ކުރުމަށް ޓްރަމްޕް އުރުދުންގެ ރަސްގެފާނާއި މިޞްރުގެ ރައީސާ ބައްދަލު ކުރައްވަން ހަމަޖެހިފައިވާ ކަމުގައެވެ. މީގެ އިތުރުން، ސަޢޫދީ ޢަރަބިއްޔާގެ ވަލީއަޙުދާ ބައްދަލު ކުރެއްވުމަކީ އެކަށީގެންވާ ކަމެއް ކަމުގައި ވެސް އޭނާ ބުންޏެވެ.

އުރުދުންގެ ރަސްގެފާނު ޢަބްދުالله އެމެރިކާގެ ވެރިރަށް ވޮޝިންގޓަނަށް ވަޑައިގަންނަވައި، ފެބުރުވަރީ 11ވަނަ ދުވަހު ޓްރަމްޕާ ބައްދަލު ކުރެއްވުމަށް އޮތީ ހަމަޖެހިފައެވެ. ނަމަވެސް، މިޞްރުގެ ރައީސާއި ސަޢޫދީ ވަލީއަޙުދާ ބައްދަލު ކުރައްވަން ނިންމަވާފައިވާ ތާރީޚުތައް ސާފެއް ނޫނެވެ. އަދި، އެމެރިކާ ސަރުކާރުން އެ ކަން ކަށަވަރު ކޮށްދީފައެއް ވެސް ނެތެވެ.