ސްޕެނިޝް ލަލީގާގައި ރޭ ސެވިއްޔާ އާއި ދެކޮޅަށް ބާސެލޯނާ ކުޅުނު މެޗު 4-1 ގެ ނަތީޖާއަކުން ބާސެލޯނާ މޮޅުވެ އެއްވަނައިގައި ރެއާލް މެޑްރިޑާއި ދެމެދުވާ ފަރަގު 2 ޕޮއިންޓަށް ކުޑަކޮށްފި އެވެ.
ބާސެލޯނާ މި މެޗުން މޮޅުވުމާއެކު އެ ޓީމަށް ވަނީ ލީގުގައި މިހާތަނަށް ކުޅުނު 23 މެޗުން 48 ޕޮއިންޓާއެކު ތާވަލުގެ ތިންވަނަ މަގާމު ލިބިފަ އެވެ. އެއްވަނައިގައި އޮތް ރެއާލް މެޑްރިޑަށް 23 މެޗުން ލިބިފައިވަނީ 50 ޕޮއިންޓެވެ. އަދި ދެވަނައިގައި އޮތް އެތްލެޓިކޯ މެޑްރިޑަށް ލިބިފައިވަނީ 49 ޕޮއިންޓެވެ.
ސެވިއްޔާގެ ދަނޑުގައި ކުޅުނު މި މެޗުގެ 7 ވަނަ މިނިޓުގައި ރޮބަޓް ލެވަންޑޯސްކީ ވަނީ ލަނޑެއް ޖަހާ ބާސެލޯނާއަށް ކުރި ހޯދަދީފަ އެވެ. މިއީ މި ސީޒަނުގައި އޭނާ ޖެހި 19 ވަނަ ލަނޑެވެ.
ނަމަވެސް އޭގެ މިނިޓެއް ފަހުން ސެވިއްޔާއިން ވަނީ ލަނޑެއް ޖަހާ މެޗުގެ ނަތީޖާ އެއްވަރުކޮށްފަ އެވެ. މި ލަނޑު އެ ޓީމަށް ކާމިޔާބު ކޮށްދީފައިވަނީ ރުބެން ވާގާސް އެވެ. މިއީ އޭނާ ސެވިއްޔާއަށް ކާމިޔާބުކޮށްދިން ފުރަތަމަ ލަނޑެވެ.
މި މެޗުގެ ދެވަނަ ހާފުގެ ކުޅުން ފެށުނުއިރު ދެ ޓީމު 1-1 ގެ ނަތީޖާއަކުން އެއްވަރުވެފައިވާއިރު ދެވަނަ ހާފު ބާސެލޯނާއިން ފަށާފައިވަނީ ބަދަލަކާއެކުގަ އެވެ. އެގޮތުން ހެންސީ ފްލިކް ވަނީ ފްރެންކީ ޑިޖޮން ގެ ބަދަލުގައި ފާރމިން ލޯޕޭޒް ކުޅެން އަރުވާފަ އެވެ.
ދެވަނަ ހާފުގެ ކުޅުން ފެށުނުތާ މިނިޓެއްވެސް ނުވަނީސް ބަދަލު ކުޅުންތެރިއެއްގެ ގޮތުގައި ކުޅެން އެރި ފާރމިން ލޯޕޭޒް ވަނީ ލަނޑެއް ޖަހާ ދެވަނަ ފަހަރަށް ބާސެލޯނާއަށް ކުރި ހޯދަދީފަ އެވެ.
ބާސެލޯނާ އިން މި މެޗުގައި ދެ ޓީމުގެ ދެމެދުގައިވާ ފަރަގު ބޮޑު ކޮށްފައިވަނީ މެޗުގެ 55 ވަނަ މިނިޓުގައި ރަފީނިއާ ކާމިޔާބުކޮށްދިން ލަނޑުންނެވެ.
މި މެޗުގެ ނަތީޖާ 3-1 އަށް ބަދަލުވިތާ ގިނައިރުތަކެއް ނުވަނީސް ބާސެލޯނާގެ ފާރމިން ލޯޕޭޒް އަށް ރެފްރީ ވަނީ ރަތް ކާޑު ދައްކާ ދަނޑުން ފޮނުވާލާފަ އެވެ. ވީޑިއޯ އެސްސްޓެންޓް ރެފްރީގެ އެހީއާއިއެކު ވީޑިއޯ ބެލުމަށްފަހު އޭނާއަށް ރަތްކާޑު ދައްކާފައިވަނީ ޖިބްރީލް ސޯ އަށް ކުރި ފައުލަކާއި ގުޅިގެން ފުރަތަމަ ދެއްކި ރީނދޫ ކާޑު ކެންސަލް ކުރުމަށްފަހުގަ އެވެ.
ބާސެލޯނާ އިން މި މެޗުގައި ޖެހި ހަތަރުވަނަ ލަނޑު މެޗުގެ 89 ވަނަ މިނިޓުގައި އެ ޓީމަށް ކާމިޔާބު ކޮށްދީފައިވަނީ އެރިކް ގާސިއާ އެވެ.