ޚަބަރު

އެސްޓަން ވިލާ އަތުން ބަލިވެ ޓޮޓްނަމްވެސް އެފްއޭ ކަޕުން ކަޓައިފި


އިނގިރޭސި އެފްއޭ ކަޕްގައި ރޭ އެސްޓަން ވިލާ އާއި ދެކޮޅަށް ޓޮޓްނަމް ހޮޓްސްޕަރ ކުޅުނު މެޗުން 2-1 ގެ ނަތީޖާއަކުން ޓޮޓްނަމް ހޮޓްސްޕަރ ބަލިވެ މުބާރާތުގެ ހަތަރުވަނަ ބުރުން ކަޓައިފި އެވެ.

މި މެޗުން ޓޮޓްނަމް ހޮޓްސްޕަރ ބަލިވެ އެފްއޭ ކަޕުން ކަޓާފައިވާއިރު ޕޮސްޓެކޮގްލޫގެ އިރުޝާދުގެ ދަށުން ކުޅެމުންދާ ޓޮޓްނަމް ހޮޓްސްޕަރ ވަނީ މީގެ ހަތަރު ދުވަސް ކުރިން ކަރަބާއޯ ކަޕްގެ ސެމީ ފައިނަލުގައި ލިވަޕޫލް އަތުން ބަލިވެ އެ މުބާރާތުން ވެސް ކަޓާފަ އެވެ. އަދި އެ ޓީމު މިވަގުތު ޕްރިމިއާ ލީގުގެ 14 ވަނައިގައި އޮތްއިރު ކޯޗަށް ގިނަ ބަޔަކު ވަނީ ފާޑު ކިޔާފަ އެވެ.

އެސްޓަން ވިލާގެ ވިލާ ޕާކުގައި ސާޅީސް ހާހަށްވުރެ ގިނަ މީހުންގެ ކުރިމަތީގައި ކުޅުނު މި މެޗުގެ ފުރަތަމަ މިނިޓުގައި އެސްޓަން ވިލާއިން ވަނީ ލަނޑެއް ޖަހާ ކުރި ހޯދާފަ އެވެ. މި ލަނޑަކީ މޯގަން ރޮޖާސް ދިން ބޯޅަ އަކުން ޖެކޮބް ރަމްސޭ ވަރަށް ބާރަށް ފޮނުވާލި ހަމަލައަކުން ކާމިޔާބުކޮށްފައިވާ ލަނޑެކެވެ.

މެޗުގެ ފުރަތަމަ ހާފުގެ ކުޅުން ނިމުނުއިރު 1-0 ގެ ނަތީޖާއަކުން އެސްޓަން ވިލާ ކުރީގައި އޮތްއިރު އެ ޓީމުން ވަނީ ދެވަނަ ހާފުގެ ކުޅުން ފެށުނުތާ 19 ވަނަ މިނިޓުގައި އިތުރު ލަނޑެއް ޖަހާ ދެ ޓީމުގެ ދެމެދުގައިވާ ފަރަގު ބޮޑުކޮށްފަ އެވެ.

އެސްޓަން ވިލާ އަށް މި ލަނޑު ކާމިޔާބުކޮށްދީފައިވަނީ މޯގަން ރޮޖާސް އެވެ. މިއީ މި ސީޒަނުގައި އޭނާ ޖެހި 11 ވަނަ ލަނޑެވެ.

އުނެއި އެމެރީ ވަނީ އެސްޓަން ވިލާގެ ދެވަނަ ލަނޑާއެކު ލޯނެއްގެ ދަށުން އެ ޓީމާއި ދާދި ފަހުން ކުޅުނު މާކަސް ރަޝްފޯޑް ކުޅެން އަރުވާފަ އެވެ. އަދި މި ބަދަލާއެކު އެ ޓީމުގެ އެޓޭކުތައް އިތުރަށް ވަރުގަދަވެ ޓޮޓްނަމްގެ ގޯލަށް ވަނީ ނުރައްކާތެރި ގިނަ ހަމަލަތަކެއް ފޮނުވާލާފަ އެވެ.

މި މެޗުގައި ޓޮޓްނަމް ހޮޓްސްޕަރ އިން ޖެހި ހަމައެކަނި ލަނޑު މެޗުގެ ފުރިހަމަ ވަގުތު ހަމަވަ އިތުރު ވަގުތުގެ ކުޅުމުގައި އެ ޓީމަށް ކާމިޔާބު ކޮށްދީފައިވަނީ އެ ޓީމާއި އަލަށް ގުޅުނު މެތީސް ޓެލް އެވެ.

މި މެޗުން ބަލިވެ ޓޮޓްނަމް ހޮޓްސްޕަރ މުބާރާތުން ކަޓާފައިވީ ނަމަވެސް ކޯޗު ޕޮސްޓެކޮގްލޫ ވަނީ ކުޅުންތެރިންނަށް ތައުރީފުކޮށް ވާހަކަ ދައްކާފަ އެވެ.