ޕީޕީއެމްއަށް އިޞްލާޙުތަކެއް ގެންނަންޖެހިފައިވާ ކަމަށް ވިދާޅުވެ، ޕާޓީގެ އިޞްލާޙީ އެޖެންޑާއެއް ޕީޕީއެމްގެ ރައީސް މައުމޫން ޢަބްދުލްޤައްޔޫމް އިޢުލާންކުރައްވައިފިއެވެ.
ޕީޕީއެމް އޮފީހުގައި މީޑިއާއަށް ދެއްވި ބަޔާނުގައި ކުރީގެ ރައީސް އަދި ޕީޕީއެމްގެ ރައީސް މައުމޫން ވިދާޅުވީ، ފަހަކަށް އައިސް އެ ޕާޓީގެ ޑިމޮކްރެޓިކް ޙަރަކާތްތައް މަޑުޖެހި، ޕާޓީގެ ތަޞައްވުރު ރައްޔިތުންގެ ކުރިމަތީގައި ކިލަނބުވެފައިވާކަމަށް. މިއީ ޕާޓީގެ ޢާންމު މެމްބަރުންނާއި އެމަނިކުފާނުވެސް ކަންބޮޑުވެވެޑައިގަންނަވާ ކަމެއްކަމަށް ވިދާޅުވިއެވެ. އެމަނިކުފާނުގެ ވާހަކަފުޅުގައި އެޕާޓީގެ ޕާލަމެންޓްރީގެ ގްރޫޕްގެ ބައެއް މަސައްކަތްތައް ކުރިޔަށް ގެންދަވާ ގޮތާމެދު ފާޑުވިދާޅުވި. ރާއްޖޭގެ ފަޅުރަށްތަކާއި ބިމާއި، ފަޅުތައް ޢާންމުކޮށް އިޢުލާންނުކޮށް ކުއްޔަށް ދޫކުރެވޭ އިޞްލާޙަކީ ޕީޕީއެމްގެ މަޤްޞަދާއި ޚިލާފް އިޞްލާޙެއްކަމަށް ދެކެވަޑައިގަންނަވާކަމަށް ވިދާޅުވިއެވެ.
ރައީސް މައުމޫން ވިދާޅުވީ، ޕީޕީއެމްގެ އެތެރޭގައި ބައެއް މައްސަލަތައް އުފެދި، ޙައްލުނުވެ ވަގުތު ގެއްލެމުންދާތީ އަދި ޢާންމު މެމްބަރުންގެ ހިތްހަމަނުޖެހުންތަކުގެ ސަބަބުން ޕީޕީއެމްގެ އިޞްލާޙީ ޕްރޮގްރާމެއް އިޢުލާންކުރެއްވީ ކަމުގައެވެ. މި އިޞްލާޙުގެ ތެރެއިން އެންމެ އިސްކަމެއް ދެއްވާނީ، ޕާޓީގެ ނާއިބު ރައީސުންނަކީ ޕާޓީގެ ރައީސަށް އެހީތެރިވެދޭ ބަޔަކަށް ހެދުންކަމަށާއި، ދެވަނަ ފިޔަވަޅެއްގެ ގޮތުން ޕާޓީގެ ޞައްޙަ މެމްބަރުންގެ ޢަދަދު ހޯދައި، ޞައްޙަ ގޮފިތައް ދެނެގަނެ ގުނަވަންތަކަށް ހުރި ފިއްތުންތައް ބެލުންކަމުގައި ޕީޕީއެމްގެ ރައީސް ވިދާޅުވި. މީގެ އިތުރުން ޕާޓީ ޑިމޮކްރެޓިކްކޮށް، 2017 ވަނަ އަހަރުގެ އޮންނަ ލޯކަލް ކައުންސިލް އިންތިޚާބަށް ރަނގަޅަށް ތައްޔާރުވުންކަމުގައި މައުމޫން ޢަބްދުލްޤައްޔޫމް އިޢުލާންކުރެއްވިއެވެ.