ލ. ގަމާއި ތ. ތިމަރަފުށީގައި ފެން ބޮޑުވުމާ ގުޅިގެން ފެން ހިންދުމުގައި ސިފައިން ހަރަކާތްތެރިވެއްޖެ
ރާއްޖެއަށް މިހާރު ކުރަމުންދާ ވިއްސާރައިގައި ލ. ގަމާއި ތ. ތިމަރަފުއްޓަށް ބޯކޮށް ވާރޭވެހި ފެން ބޮޑުވެފައިވާތީ، އެދެރަށުގައި ފެންހިންދުމުގެ މަސައްކަތުގައި ސިފައިން ހަރަކާތްތެރިވެއްޖެއެވެ.
އެމްއެންޑީއެފްއިން ބުނެފައިވަނީ ރާއްޖެއަށް މިހާރު ކުރަމުންދާ ވިއްސާރައިގައި ލ. ގަމުގައި ފެން ބޮޑުވުމުގެ ސަބަބުން ފެން ހިންދުމުގައި އެމްއެންޑީއެފް ސެންޓްރަލް އޭރިއާ ކޮމާންޑްގެ ސިފައިން ހަރަކާތްތެރިވަމުން ދާކަމަށެވެ. އަދި ބައެއް ގޭގެއަށް ފެން ވަންނަމުންދާތީ ވެލިބަސްތާ ޖެހުމުގައި އެމްއެންޑީއެފް ސެންޓްރަލް އޭރިއާ ކޮމާންޑްގެ ސިފައިން ވަނީ ހަރަކާތްތެރިވެފައެވެ.
ލ.ގަމުގައި ފެން ބޮޑުވުމާއި ގުޅިގެން އެންޑީއެމްއޭ އިން ވިދާޅުވީ މިހާތަނަށް އެއްގެއަށް ފެން ވަދެގެން އެގޭގެ ވެރިފަރާތުން ރިޕޯޓްކޮށްފައިވާކަމަށެވެ.
މީގެ އިތުރުން ރާއްޖެއަށް ކުރަމުންދާ ވިއްސާރައިގައި ތ. ތިމަރަފުށްޓަށް ބޯކޮށް ވާރޭވެހި ފެން ބޮޑުވުމާއި ގުޅިގެން އެހީތެރިކަން ފޯރުކޮށްދިނުމުގައި އެމްއެންޑީއެފް ސެންޓްރަލް އޭރިއާ ކޮމާންޑްގެ ސިފައިން ވަނީ ހަރަކާތްތެރިވެފައެވެ.
ރާއްޖެއަށް މިހާރު މި ކުރަމުންދާ ވިއްސާރައަކީ، ރާއްޖޭގެ އިރުމަތީ ސަރަހައްދުގައި އުފެދިފައިވާ ސާކިއުލޭޝަންއާއި އޭގެ ޓްރަފްގެ ސަބަބުން ކުރަމުންދާ ވިއްސާރައެއްކަމަށްށާ، ވިއްސާރަ އަލިކުރާނެކަމަށް ލަފާކުރެވެނީ މާދަމާގެ ފަހުންކަމުންކަމަށް މޫސުމާ ބެހޭ ޤައުމީ އިދާރާއިން ވިދާޅުވެއެވެ.