އިޤްތިޞާދީ މަސައްކަތްތަކަށް 3 ކައުންސިލަކަށް ފަޅުރަށް ރަސްމީކޮށް ހަވާލުކޮށްފި
-
މިއީ ފަޅުރަށްތައް ކައުންސިލްތަކަށް ދޫކުރާ ފުރަތަމަ ފަހަރު
-
އަތޮޅު ކައުންސިލާއި ރަށު ކައުންސިލްތަކަށް ފަޅު ރަށް ދޫކުރާނެ
-
28 ރަށެއް ދޫކުރުމަށް ހުޅުވާލާފައިވޭ
މާލީ ގޮތުން ކައުންސިލްތައް ބާރުވެރިކުރުމަށްޓަކައި، ފަޅުރަށްތައް ކައުންސިލްތަކާ ހަވާލުކުރެއްވުމުގެ އުސޫލުގެދަށުން ފުރަތަމަ ފަހަރަށް ފަޅުރަށްތައް ރަސްމީކޮށް ހަވާލުކުރައްވައިފިއެވެ. އެގޮތުން 4 ފަޅުރަށެއްވަނީ 3 ކައުންސިލަކާ ހަވާލުކުރައްވާފައެވެ.
ފަޅުރަށްތައް ކައުންސިލްތަކާއި ހަވާލުކުރެއްވުމަށް ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާ ބެހޭ ވުޒާރާއާއި، މާލީ ކަންކަމާއި ތަރައްޤީގެ ރޭވުންތެރިކަމާ ބެހޭ ވުޒާރާ ގުޅިގެން އެކަމުގެ އެއްބަސްވުމުގައި ކައުންސިލްތަކާއެކުވަނީ ސޮއިކުރައްވާފައެވެ. އެގޮތުން ފުރަތަމަ ބުރުގައި ހުށައެޅި ކައުންސިލްތަކުގެ ތެރެއިން 3 ކައުންސިލަކަށް 4 ފަޅުރަށެއް ދޫކުރެއްވުމަށް ވަނީ ނިންމަވާފައެވެ. އޭގެތެރޭގައި އަތޮޅު ކައުންސިލަކާއި އިތުރު 2 ރަށެއްގެ ކައުންސިލް ހިމެނެއެވެ.
އެއްބަވުމުގައި ސޮއިކުރެއްވީ މާލީ ކަންކަމާއި ތަރައްޤީގެ ރޭވުންތެރިކަމާ ބެހޭ ވުޒާރާގައި އެކަމަށްޓަކާ ބޭއްވެވި ޚާއްސަ ރަސްމިއްޔާތެއްގައެވެ.
ފަޅުރަށްތައް ހަވާލުކުރި ކައުންސިލްތައް:
* ދ.އަތޮޅު ކައުންސިލަށް ހަވާލުކޮށްފައިވަނީ ދ. މިނިމަސްގަލި އާއި ދ. ފެންފުށި
* ރ.އިނގުރައިދޫ ކައުންސިލަށް ހަވާލުކޮށްފައިވަނީ ރ.ނެޔޮ
* ލ.މާވަށު ކައުންސިލާ ހަވާލުކޮށްފައިވަނީ ލ.ބޮޑުމާބުޅަލި
މި އެއްބަސްވުންތަކުގައި ދ. އަތޮޅު ކައުންސިލްގެ ފަރާތުން ސޮއިކުރެއްވީ އަތޮޅު ކައުންސިލްގެ ރައީސް އަޙްމަދު ޝާފިޢުއެވެ. އެއްބަސްވުމުގައި ރ. އިނގުރައިދޫ ކައުންސިލްގެ ފަރާތުން ސޮއިކުރެއްވީ އިނގުރައިދޫ ކައުންސިލްގެ ރައީސް މުޙައްމަދު ޖަލީލްއެވެ. އަދި ލ. މާވަށު ކައުންސިލްގެ ފަރާތުން ސޮއިކުރެއްވީ މާވަށު ކައުންސިލްގެ ރައީސް އަޙްމަދު މޫސާއެވެ.
މި އެއްބަސްވުންތަކުގައި މާލީ ކަންކަމާއި ތަރައްޤީގެ ރޭވުންތެރިކަމާ ބެހޭ ވުޒާރާގެ ފަރާތުން ސޮއިކުރެއްވީ ސްޓޭޓް މިނިސްޓަރ އަޙްމަދު މާޒިންއެވެ.
މި ރަސްމިއްޔާތުގައި ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާ ބެހޭ ވަޒީރު ޢާދަމް ޝަރީފް ޢުމަރު ވިދާޅުވީ މިއީ ރާއްޖޭގެ ލާމަރުކަޒީ ނިޒާމު ހަރުދަނާކުރުމަށް ރައީސުލްޖުމްހޫރިއްޔާ ގެންގުޅުއްވާ ދުރު ވިސްނުންފުޅުކަމަށެވެ. ފަޅުރަށް ދޫކުރުމަކީ ގަވާއިދުތަކާއި އުސޫލުތަކަށް ބަދަލުތައް ގެނެސް، ކުރެވުނު ވަރަށް ބޮޑު، ބުރަ މަސައްކަތެއްކަމަށް ވަޒީރު ވިދާޅުވިއެވެ.
"އަތޮޅު ކައުންސިލަކާއި 2 ރަށު ކައުންސިލަކަށް މިރަށްރަށް މިދޫކުރީ. ކޮންމެ ކައުންސިލެއްގެވެސް އެންމެ ބޮޑު ޒިންމާއަކީ އަތޮޅު ފެންވަރުގައާއި ރަށު ފެންވަރުގައި މަންފާ ލިބޭނެގޮތަށް މިރަށްތަކުގެ ބޭނުން ހިފުން." އާދަމް ޝަރީފް އުމަރު ވިދާޅުވިއެވެ.
ކައުންސިލްތަކަށް ފަޅު ރަށްތައް ދޫކުރުމަށް ރައީސުލްޖުމްހުރިއްޔާ ޑރ.މުޙައްމަދު މުޢިއްޒު ނިންމެވީ، ބިން ކުޑަ ރަށްތަކަށް އިޤްތިޞާދީ މަސައްކަތްތައް ކުރެވޭނެ މަގު ފަހިކޮށްދިނުމާއި ކައުންސިލްތައް ޒިންމާދާރުކުރުވައި މާލީ ގޮތުން ބާރުވެރި މަސައްކަތްތަކެއް ކުރާ ބަޔަކަށް ހެދުމަށް ގެންގުޅުއްވާ ވިސްނުންފުޅުގެތެރެއިންނެވެ.
މިއީ ލާމަރުކަޒީ ނިޒާމުގައި މިފަދަ މަސައްކަތެއް ކުރާ ފުރަތަމަ ފަހަރެވެ.