ބީއެމްއެލްގެ ބޯޑުގައި އާންމު ހިއްސާދާރުން ތަމްސީލްކުރާ ޑިރެކްޓަރުކަމަށް ކުރިމަތިލުމަށް ހުޅުވާލައިފި

ބޭންކް އޮފް މޯލްޑިވްސް، ބީއެމްއެލްގެ ޑިރެކްޓަރުންގެ ބޯޑަށް އާންމު ހިއްސާދާރުންގެ ފަރާތުން އިންތިޚާބުކުރާ 3 ޑިރެކްޓަރުންގެ މަޤާމަށް ކުރިމަތިލުމުގެ ފުރުޞަތު ހުޅުވާލައިފިއެވެ.

ބީއެމްއެލްއިން ޑިރެކްޓަރުކަމަށް ކުރިމަތިލުމަށް ހުށައަޅާ ފޯމު 26 ޖަނަވަރީ އިން 24 ފެބްރުއަރީ ވަނަ ދުވަހުގެ 14:00 ގެ ނިޔަލަށެވެ. މި މަޤާމަށް ކުރިމަތިލެވޭނީ ރާއްޖޭގެ ބޭންކިންގއާބެހޭ ޤާނޫނުގައިވާ ގޮތުގެ މަތިން އުމުރުން 30 އަހަރާއި 70 އަހަރާއި ދެމެދުގެ ފަރާތްތަކަށެވެ.

މަޤާމަށް ކުރިމަތިލާ ފަރާތްތަކުގެ ކިބައިގައި އެމްއެމްއޭގެ ޕްރުޑެންޝިއަލް ރެގިއުލޭޝަންގެ "ފިޓް އެންޑް ޕްރޮޕަރ ރިކުއަރމެންޓްސް" ގައި ބަޔާންކޮށްފައިވާ މިންގަނޑުތަކާއި ސިފަތައް ހުރުން ލާޒިމްކުރެއެވެ.

ބީއެމްއެލްއިން ވިދާޅުވީ، ކެޕިޓަލް މާކެޓް ޑިވެލޮޕްމަންޓް އޮޓޯރިޓީން އެކުލަވާލާފައިވާ ކޯޕަރޭޓް ގަވަނަންސްގައި ބަޔާންކޮށްފައި ވާގޮތައް ކޮންމެ ޑިރެކްޓަރަކީވެސް އެ މަޤާމުގެ މަސްއޫލިއްޔަތު އުފުލޭފަދަ ޤާބިލުކަން ހުރި މީހަކު ކަމުގައިވާންވާނެކަމަށެވެ.

ބީއެމްއެލްގެ ބޯޑުގައި 11 މެންބަރުން ތިއްބަވައެވެ. އޭގެތެރޭގައި ހިމެނެނީ ސަރުކާރުން ޢައްޔަންކުރައްވާ 6 މެންބަރުންނާއި، ބީއެމްއެލްއިން ޢައްޔަންކުރާ 2 މެންބަރުންގެ އިތުރުން އަމިއްލަ ހިއްސާދާރުން ތަމްސީލްކުރައްވާ 3 މެންބަރުންނެވެ.