ޖަރުމަންގެ ގައުމީ ފުޓްބޯޅަ ޓީމުގެ ކޯޗު ޖޫލިއަން ނާގަލްސްމަން އާއި ޖަރުމަން ފުޓްބޯޅަ ފެޑަރޭޝަނާ ދެމެދު ހަދާފައިވާ އެއްބަސްވުމުގެ މުއްދަތު 2028 ވަނަ އަހަރުގެ ނިޔަލަށް އިތުރުކޮށްފިއެވެ.
ޖަރުމަންގެ ގައުމީ ފުޓްބޯޅަ ޓީމުގެ ކޯޗުގެ މަގާމާ 2023 ވަނަ އަހަރުގެ ސެޕްޓެމްބަރު މަހު ހަވާލުވި ނާގަލްސްމަން ވަނީ މިދިޔަ އަހަރު ބޭއްވި ޔޫރޯ ފުޓްބޯޅަ މުބާރާތުގެ ކުއާޓާ ފައިނަލަށް ޖަރުމަން ގެންގޮސްދީފަ އެވެ.
ޖަރުމަން ލީގުގެ ކުލަބު ބަޔާން މިޔުނިކަށް ކުރިން ކޯޗުކޮށްދިން ނާގަލްސްމަން ވެގެން ގޮސްފައިވަނީ ޖަރުމަންގެ ގައުމީ ޓީމުގެ ކޯޗު ކަމާއި ހަވާލުވި ދެވަނައަށް އެންމެ ޒުވާން ކޯޗަށެވެ. އޭނާ ޖަރުމަނުގެ ގައުމީ ޓީމާއި ހަވާލުވިއިރު އުމުރަކީ 36 އަހަރެވެ.
ޖަރުމަނުގެ ފުޓްބޯޅަ ފެޑަރޭޝަނުން ބުނެފައިވާ ގޮތުގައި 2028 ވަނަ އަހަރު ބޭއްވުމަށް ހަމަޖެހިފައިވާ ޔޫރޯ ފުޓްބޯޅަ މުބާރާތުގެ ނިޔަލަށް އޭނާ އެ މަގާމުގައި ދެމި ހުންނާނެ އެވެ. އަދި 2026 ވަނަ އަހަރު އެމެރިކާ އާއި މެކްސިކޯގެ އިތުރުން ކެނެޑާ ގައި ބޭއްވުމަށް ހަމަޖެހިފައިވާ ފީފާ ވޯލްޑް ކަޕް ފުޓްބޯޅަ މުބާރާތުގައިވެސް ޖަރުމަނުގެ ކޯޗަކަށް ހުންނާނީ ނާގަލްސްމަންއެވެ.
ނާގަލްސްމަން ވަނީ ބަޔާން މިއުނިކާއި އެކު 22-2021 ވަނަ އަހަރުގެ ޖަރުމަން ލީގު އެ ކްލަބަށް ކާމިޔާބުކޮށްދީފަ އެވެ. އަދި 2021 ވަނަ އަހަރާއި 2022 ވަނަ އަހަރުގެ ޖަރުމަން ސުޕަ ކަޕުވެސް އޭނާ ވަނީ ބަޔާން މިއުނިކަށް ހޯދައިދީފައެވެ.