މާލެ ސަރަހައްދުގައި ހޮނިހިރު ދުވަހުވެސް ޕާސްޕޯޓު ދޫކުރަން ފަށަނީ

އަންނަ ހޮނިހިރު ދުވަހުން ފެށިގެން މާލެ ސަރަހައްދުގައި ޕާސްޕޯޓް ދޫކުރުމުގެ ޚިދުމަތް ހޮނިހިރުދުވަހުވެސް ލިބޭނެކަމަށް މޯލްޑިވްސް އިމިގްރޭޝަނުން ވިދާޅުވެއްޖެވެ.

މީގެ ކުރިން ޕާސްޕޯޓް ދޫކުރުމުގެ ޚިދުމަތް ދެމުންދަނީ ހަފްތާއަކު ފަސް ދުވަހުއެވެ. އެއީ އާދިއްތައިން ފެށިގެން ބުރާސްފަތި ދުވަހާއި ހަމައަށެވެ.

ކޮންޓްރޯލަރ ޖެނެރަލް އޮފް އިމިގްރޭޝަން މުޙައްމަދު ޝަމްއާން ވަހީދު ވިދާޅުވީ މީގެ ކުރިން ޕާސްޕޯޓު ދޫކުރަމުން ދިއައީ ހަމައެކަނި ރަސްމީ ދުވަސްތަކުގައި ނަމަވެސް ހަފްތާ ބަންދު ދުވަހެއް ކަމަށްވާ ހޮނިހިރު ދުވަހުވެސް ދެން ޕާސްޕޯޓު ދޫކުރަމުންދާނެކަމަށެވެ. މިގޮތަށް ނިންމުމުގެ މަގްސަދަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އިރުޝާދާއި އެއްގޮތަށް، ޚިދުމަތް ދޭ ވަގުތު އިތުރުކޮށް، ރައްޔިތުންނާ ގާތުން އަވަސް އަދި ލުއިފަސޭހަ ޚިދުމަތެއް ފޯރުކޮށްދިނުންކަމަށް ޝަމްއާން ވިދާޅުވިއެވެ. މީގެއިތުރުން، މެޑިކަލް އިމަރޖެންސީގައި ރާއްޖޭން ބޭރަށް ދާ ފަރާތްތަކަށް ކުރިއެކޭވެސް އެއްގޮތަށް 24/7 ޚިދުމަތް ލިބޭނެކަމަށްވެސް ޝަމްއާން ވިދާޅުވިއެވެ.

މާދަމާ އިން ފެށިގެން މާލެ ސަރަހައްދުގައި ހިމެނޭ އިމިގްރޭޝަންގެ 03 އޮފީހަކުން ކޮންމެ ހޮނިހިރު ދުވަހަކު ވެސް ޕާސްޕޯޓު ދޫކުރުމަށް ވަނީ ހަމަޖެހިފައި.#DhivehiPassport #MaldivesImmigration pic.twitter.com/gg21qUmabz

— Maldives Immigration (@ImmigrationMV) January 24, 2025

އިމިގްރޭޝަނުން ވިދާޅުވީ އަންނަ ހޮނިހިރު ދުވަހުން ފެށިގެން މާލެ ސަރަހައްދުގައި ހިމެނޭ އިމިގްރޭޝަންގެ 3 އޮފީހަކުން ކޮންމެ ހޮނިހިރު ދުވަހަކުވެސް ޕާސްޕޯޓު ދޫކުރާނެކަމަށެވެ.

އެއީ މާލެ ވެލާނާގެ 1 ވަނަ ފަންގިފިލާ، ހުޅުމާލޭ ފޭސް 1ގެ އުމަރު ޒާހިރު ބިލްޑިންގ އަދި ހުޅުމާލެ ފޭސް 2ގެ ވިނަރެސް ދޭއްގެ 1 ވަނަ ފަންގިފިލާއިންނެވެ. އިމިގްރޭޝަނުން ވިދާޅުވީ ކޮންމެ ހޮނިހިރު ދުވަހަކުވެސް ނަންބަރު ދޫކުރުމަށް ހަމަޖެހިފައި ވަނީ ހެނދުނު 9:00އިން މެންދުރު 12:00އަށް ކަމަށެވެ.

އާއްމުގޮތެއްގައި ބަންދު ދުވަސްތަކާއި ދިމާކޮށްވެސް އިމިގްރޭޝަނުން ޕާސްޕޯޓުގެ ޚިދުމަތް ރައްޔިތުންނަށް މެދު ކެނޑުމެއްނެތި ފޯރުކޮށްދެއެވެ. ބަންދު ދުވަސްތަކުގެ ކުރިއަށް ދުރާލާ ޕާސްޕޯޓުގެ މުއްދަތު ބެލުމަށްފަހު ޕާސްޕޯޓު ހެއްދުމަށް ހުށައެޅުމަށް އިމިގްރޭޝަނުން އަބަދުވެސް އަންނަނީ އިލްތިމާސްކުރައްވަމުންނެވެ.