ވައިޑް-ބޮޑީގެ ދަތުރުތައް ފުޅާވެގެންދާއިރު، ވަޒީފާގެ ގިނަ ފުރުސަތުތަކެއް ދިވެހިންނަށް ފަހިވެގެންދާނެ: ސަލީމް

ވައިޑް-ބޮޑީ މަތިންދާ ބޯޓުތަކުގައި މޯލްޑިވިއަންގެ ދަތުރުތައް ބައިނަލްއަޤްވާމީ މަންޒިލްތަކަށް ފުޅާވެގެންދާއިރު، ދިވެހިންނަށް ގިނަ އަދަދެއްގެ ވަޒީފާގެ ފުރުސަތުތައް ފަހިވެގެންދާނެ ކަމަށް އައިލެންޑް އޭވިއޭޝަންގެ ޑެޕިއުޓީ މެނޭޖިންގ ޑިރެކްޓަރ އަލީ ސަލީމް ވިދާޅުވެއްޖެއެވެ.

ސަމީލް މިހެން ވިދާޅުވީ ޕީއެސްއެމްނިއުސްގެ ރާއްޖެ މިއަދު ޕްރޮގްރާމުގައި ވާހަކަދައްކަވަމުންނެވެ.

މޯލްޑިވިއަންގެ ދަތުރުތަކުގައި މިހާރުވަނީ ވައިޑް-ބޮޑީ މަތިންދާބޯޓެއް ބޭނުންކުރަން ފަށާފައެވެ. އަދި މި ބޯޓުގައި މިހާރުވަނީ ޗައިނާއަށް ދަތުރުތައް ފަށާފައެވެ.
އައިލެންޑް އޭވިއޭޝަންގެ ޑެޕިއުޓީ މެނޭޖިންގ ޑިރެކްޓަރ އަލީ ސަލީމް ވިދާޅުވީ ވަޒީފާގެ ގިނަ ފުރުސަތުތަކާއި އެކު ރާއްޖޭގެ އޭވިއޭޝަން ސިނާއަތަށްވެސް މި ދަތުރުތަކާއި އެކު ކުރިއެރުންތައް ލިބިގެންދާނެ ކަމަށެވެ.

"ކެޕްޓަނުން ބޭނުންވާނެ، ކެބިންކުރޫއިން ބޭނުންވާނެ، ކާގޯ އިންޖިނިއަރުންބޭނުންވާނެ، އެޖެޓުން ބޭނުންވާނެ، އެންމެ މަތިންދާބޯޓަކާއި ވެސް ގިނަ ވަޒީފާގެ ފުރުސަތުތައް ހުޅުވާލެވިއްޖެ،" އަލީ ސަލީމް ވިދާޅުވިއެވެ.

އެންމެ ބޯޓަކާއި އެކު 70 ވަރަކަށް ވަޒީގެ ފުރުސަތު އެފެދިފައިވާއިރު، އަމާޒަކީ މޯލްޑިވިއަންއަކީ ހުސް ދިވެހިން މަސައްކަތްކުރާ އެއަރލައިނަކަށް ހެދުންކަމަށެވެ. މިހާރު އެކުންފުނީގެ %95 އަކީ ދިވެހިންކަން އެކުންފުނިން ފާހަގަކުރެއެވެ.

ސަލީމު ވިދާޅުވީ މޯލްޑިވިއަންގެ ބައިނަލްއަޤްވާމީ ދަތުރުތައް ކާމިޔާބުކުރުމަށް ގިނަ ބައެއްގެ އެއްބާރުލުން ބޭނުންވާނެ ކަމަށެވެ. އެގޮތުން އެމްއޭސީއެލްއާއި ޤައުމުތަކުގެ އެމްބަސީތަކާއި ޓްރެވަލް އެޖެންޓުނާއި ވިޔަފާރިވެރންގެ އެއްބާރުލުން ބޭނުންވާނެކަން އޭނާ ފާހަގަކުރެއްވިއެވެ.

ރާއްޖެ މިއަދު ޕްރޮގްރާމުގައި ވާހަކަދައްކަވަމުން ޑިރެކްޓަރ އޮފް ފްލައިޓް އޮޕަރޭޝަންސް، ކެޕްޓަން އަހުމަދު ހުނައިނު ވިދާޅުވީ ވައިޑް-ބޮޑީ މަތިންދާ ބޯޓުތައް އިތުރުކޮށް މޯލްޑިވިއަންގެ ދަތުރުތައް ފުޅާކުރުމުން، ރާއްޖޭގައި ޕައިލެޓުކަން ކިޔަވައިގެން ތިބި ކުދިންނަށްވެސް މޯލްޑިވިއަންގައި މަސައްކަތްކުރުމުގެ ފުރުސަތުތައް ފަހިވާނެކަމަށެވެ. ހުނައިނު ފާހަގަކުރެއްވިގޮތުގައި އެ ކުންފުނިން ހުޅުވާލާ ވަޒީފާގެ ފުރުސަތުތަކަށްވެސް ގިނަ އަދަދެއްގެ ދިވެހި ކުދިން ކުރިމަތިލާކަމަށެވެ. އެހެންނަމަވެސް އެކުންފުނީގައި މިވަގުތު އެހާ ގިނަ ކުދިން ނެގުމުގެ ޖާގައެއް ނެތް ކަމަށެވެ.

"100އަށްވުރެ ގިނަ ކުދިން ކިޔަވައިގެން އައިސް އެބަތިބި ޕްއިލެޓުކަން ކިޔަވައިގެން އައިސް ވަޒީފާ ނުލިބިފައި، އެންމެފަހުން އިންޓަރވިއުއަށް ހުޅުވާލީމައި، 100ވަރަކަށް ކުދިން ކުރިމަތިލި، އެކަމަކު އަޅުގަނޑުމެން ބޭނުންވަނީ އެންމެ 3 ޖާގަ، އެކަމަކު އައިލެންޑު އޭވިއޭޝަނަށްވެސް ކުދިން ނެގޭނީ ކެޕޭސިޓީ އޮތް ވަރަކަށް،" ހުނައިނު ވިދާޅުވިއެވެ.

މޯލްޑިވިއަނުން ދަނީ އިތުރު ވައިޑް-ބޮޑީ މަތިންދާ ބޯޓެއް ގެނައުމަށް މަސައްކަތްކުރަމުންނެވެ. އެގޮތުން ދެން ދަތުރުތައް ފެށިގެންދާނީ ޔޫރަޕްގެ މަންޒިލްތަކަށްކަމަށް މީގެކުރިން އެކުންފުނިން ވަނީ ވިދާޅުވެފައެވެ. އަދި އަމާޒަކީ ގިނަ އަދަދެއްގެ ވައިޑް ބޮޑީ މަތިންދާ ބޯޓުތައް ގެނެސް ޚިދުމަތްތައް ފުޅާކުރުންކަމަށްވެސް އައިލެންޑް އޭވިއޭޝަންގެ ޑެޕިއުޓީ މެނޭޖިންގ ޑިރެކްޓަރ އަލީ ސަލީމް ވިދާޅުވިއެވެ.