ފުޓްބޯޅަ ކުލަބުތަކުގެ ތެރެއިން އާމްދަނީގެ ގޮތުގައި އަހަރަކު އެއް ބިލިޔަން ޔޫރޯ ހޯދި ފުރަތަމަ ކުލަބުގެ ޝަރަފު ރެއާލް މެޑްރިޑުން ހޯދައިފިއެވެ.
ޑެލޮއިޓްސް މަނީ ލީގުގެ ހިސާބުތަކުން ދައްކާ ގޮތުގައި ނިމިގެންދިޔަ 24-2023 ވަނަ ސީޒަނުގައި ރެއާލް މެޑްރިޑް އިން ވަނީ އާމްދަނީގެ ގޮތުގައި 1.05 ބިލިއަން ޔޫރޯ ހޯދާފަ އެވެ. މިއީ ފާއިތުވެދިޔަ ދުވަސްތަކުގައި އެއްވެސް ފުޓްބޯޅަ ކްލަބަކަށް ހޯދިފައިވާ އާމްދަނީ އެއް ނޫނެވެ.
ރެއާލް މެޑްރިޑަށް މިފަދަ ބޮޑު އާމްދަނީއެއް ލިބިފައިވަނީ މިދިޔަ ސީޒަނުގައި ސްޕެނިޝް ލަލީގާ އާއި ޔޫއެފާ ޗެމްޕިއަންސް ލީގު ކާމިޔާބު ކުރުމުގެ ސަބަބުންނެވެ. ރެއާލް މެޑްރިޑްގެ ސެންޓިއާގޯ ބަރނަބިއު ސްޓޭޑިއަމްގެ ޖާގަ އިތުރު ކުރުމާއެކު އެ ޓީމަށް ލިބެމުންދިޔަ އާމްދަނީ ވަނީ އެތައް ގުނައެއް އިތުރުވެފަ އެވެ. އެގޮތުން މެޗުތައް ކުޅޭ ދުވަސް ތަކުގައި އެ ޓީމަށް ވަނީ އާމްދަނީގެ ގޮތުގައި 210 މިލިއަން ޕައުންޑް ލިބިފަ އެވެ.
ރެއާލް މެޑްރިޑަށް މެޗުތަކުން 248 މިލިއަން ގެ އާމްދަނީއެއް ލިބިފައިވާއިރު ބްރޯޑްކާސްޓިން ރައިޓްސްގެ ގޮތުގައި 316 މިލިއަން ވަނީ ލިބިފަ އެވެ. އަދި އިޝްތިހާރުގެ ގޮތުގައި ވަނީ 482 މިލިއަންގެ އާމްދަނީ އަކާއިއެކު ޖުމްލަ 1 ބިލިއަންގެ އާމްދަނީ އެއް ލިބިފަ އެވެ.
މި ލިސްޓުގެ ދެވަނައިގައި އޮތް އިނގިރޭސި ޕްރިމިއާ ލީގުގެ ކްލަބް މެންޗެސްޓަރ ސިޓީ އަށް ލިބިފައިވަނީ 838 މިލިއަން ޔޫރޯ އެވެ. އަދި ތިންވަނައިގައި އޮތް ޕީއެސްޖީ އަށް 806 މިލިއަން ގެ އާމްދަނީ އެއް ވަނީ ލިބިފަ އެވެ.
ފުޓްބޯޅަ ކްލަބްތަކުގެ ތެރެއިން އެންމެ ބޮޑު އާމްދަނީ އެއް ހޯދާކަމަށް ޑެލޮއިޓްސް އިން ނެރެފައިވާ 20 ކްލަބުގެ ތެރޭގައި އިނގިރޭސި ޕްރިމިއާ ލީގުގެ 9 ކްލަބް ހިމެނެ އެވެ.