މޯލްޑިވިއަން އައިޑަ ލްއިން ވިދާލި ފަންނާނު، ޝަލަބީ އިބްރާހީމްގެ މަދަހަ އަލްބަމެއް ނެރެފިއެވެ. " ހިދާއީ ނޫރު" ގެ ނަމުގައި ނެރުނު މި މަދަހަ އަލްބަމް އިފްތިތާޙު ކޮށްދެއްވީ، ކުރީގެ ރައީސް އަލް އުސްތާޛު މައުމޫން ޢަބްދުލްޤައްޔޫމެވެ.
ޝަލަބީ އިބްރާހީމްގެ ހިތްގައިމު އަޑުން ހުށައަޅައިދީފައިވާ ހަތް މަދަހަ އާއެކު، ހިދާއީ ނޫރުގެ ނަމުގައި ނެރުނު އަލްބަމްގައި މުޅިންވެސް ހިމެނެނީ އަމިއްލަ ރާގުގެ މަދަހަތަކެވެ. މަދަހަތައް ހައްދަވައިދެއްވި ބޭފުޅުންގެ ތެރޭގައި ރައީސް މައުމޫނާއި، އާދަމް ނަސީރު އިބްރާހީމާއި، ހަސަން ޝާކިރު މުޙައްމަދު އަދި އާދަމް އަބްދުއްރަޙްމާން ހިމެނެއެވެ.
އަލްބަމް އިފްތިތާޙް ކޮށްދެއްވުމަށްފަހު، ރައީސް މައުމޫން ވަނީ ޝަލަބީ އިބްރާހީމްގެ ހުނަރުތަކަށް ތައުރީފް ކުރައްވާފައެވެ. އެގޮތުން ރައީސް މައުމޫންގެ ކުރިފުޅުމަތީގައި ޝަލަބީ ލަވައެއް ކިޔުމުން، ޝަލަބީ އަކީ ވަރަށް މޮޅަށް ޤުރުއާން ކިޔަވާ ކުއްޖަކަށް ވާނެ ކަމަށް އުންމީދުކުރެއްވި ކަމަށް ވިދާޅުވިއެވެ. އަދި މި އަލްބަމަށް މަދަހައެއް ހެއްދެވުމުގެ ފުރުސަތު ލިބުނުކަން ފާހަގަކޮށް، އެކަމަށް ޝުކުރު އަދާ ކުރެއްވިއެވެ. img:http://s4.psmnews.mv/images/660x400/14673751024546.jpg|ޝަލަބީގެ މަދަހަ އަލްބަމް " ހިދާއީ ނޫރު" ނެރުން - ފޮޓޯ: ފޭސްބުކް
ޝަލަބީ އިބްރާހީމްވަނީ އަލަބަމްގައި ކިޔާފައިވާ މަދަހައެއްގެ އެއް ކަޑި ހުށައަޅައިދީފައެވެ. އެއަށްފަހު އޭނާ ބުނީ މިއަހަރުން ފެށިގެން ކޮންމެ ރަމަޟާން މަހެއްގައި މިފަދަ މަދަހަ ސިޑީއެއް ނެރުމަކީ އަމާޒެއް ކަމަށާއި، މި ދާއިރާއިން ކުރިއަށް ދިއުމުގައި ގިނަ ބައެއްގެ ފަރާތުން އޭނާއަށް ހިތްވަރު ލިބޭ ކަމަށެވެ. މަދަހަތައް ހެއްދެވި ބޭފުޅުންގެ ތެރޭގައި ހިމެނޭ، އާދަމް ނަސީރު އިބްރާހީމް ވަނީ ރާއްޖޭގައި ދީނީ ޅެން ހެދުމާއި، މަދަހަ ހެދުމުގެ ތާރީޚާ ބެހޭގޮތުން ވާހަކަ ދައްކަވާފައެވެ. އަދި ޝަލަބީގެ އަލްބަމަކީ، އަމިއްލަ ރާގު ހިމަނައިގެން ރާއްޖޭގައި ނެރުނު މަދު އަލްބަމް ތަކުގެ ތެރެއިން އެއް އަލްބަމް ކަމަށް ވިދާޅުވިއެވެ.
މަދަހަ އަލްބަމް ނެރުމަށް ބޭއްވި ރަސްމިއްޔާތުގައި، ނުކުޅެދުންތެރިކަން ހުންނަ ކުއްޖެއްގެ އެއް އަހަރު ދުވަހުގެ ކިޔެވުމުގެ ޚަރަދުތައް ޝަލަބީ އިބްރާހީމްގެ ފަރާތުން ސްޕޮންސަރ ކުރުމަށް ނިންމިކަން އިއުލާންކޮށްފައިވެއެވެ. އެއީ ކެއަރ ސޮސައިޓީގައި ކިޔަވަމުންދާ ކުއްޖެއްގެ ކިޔެވުމުގެ ޚަރަދެވެ. މިރަސްމިއްޔާތުގައި އެކަމުގެ ރަމްޒީ ލިޔުން ވަނީ ކެއަރ ސޮސައިޓީއަށް ދެއްވާފައެވެ.
ޝަލަބީ އިބްރާހީމަކީ ރާއްޖޭގައި މިހާތަނަށް ބޭއްވި އެންމެ ބޮޑު ރިއަލިޓީ ޝޯވް، މޯލްޑިވިއަން އައިޑޮލްގެ 2 ވަނަ ހޯދި ފަންނާނެވެ. ޝަލަބީގެ ހިތްގައިމު އަޑުގެ ސަބަބުން، ގިނަ ބައެއްގެ މަޤްބޫލްކަން އޭނާއަށް ވަނީ ލިބިގެން ގޮސްފައެވެ.