އިންޓަރނޭޝަނަލް ކްރިކެޓް ކައުންސިލް (އައިސީސީ) އިން ޕާކިސްތާނުގެ ކްރިކެޓް ދަނޑުތައް ބަލާފައި ވަކި އެއްޗެއް ނުބުނެ ހިމޭންވެއްޖެއެވެ.
އަންނަ ފެބްރުއަރީ މަހުގެ 19 ގައި ފަށާ ޗެމްޕިއަންސް ޓްރޮފީ ކްރިކެޓް މުބާރާތް ބާއްވަނީ ޕާކިސްތާނުގަ އެވެ. މެޗުތައް ކުޅޭނީ އެ ގައުމުގެ ތިން ސްޓޭޑިއަމެއްގަ އެވެ. އެއީ ލާހޯރުގައިވާ ގައްދާފީ ސްޓޭޑިއަމާއި ކަރާޗީގައިވާ ނެޝަނަލް ސްޓޭޑިއަމާއި ރާވަލްޕިންޑީގައިވާ ކްރިކެޓް ސްޓޭޑިއަމެވެ. މީގެ ތެރެއިން ނުނިމިގެން އުޅެނީ އެންމެ ބޮޑު ދަނޑު ކަމަށްވާ 35000 މީހުންނަށް ވަދެވޭ ގައްދާފީ ސްޓޭޑިއަމެވެ.
އައިސީސީގެ ޓީމުން އެ ތަނަށް ޒިޔާރަތްކުރީ ހެޑް އޮފް އިވެންޓްސް ސަރާހް އެޑްގާ އާއި ޖެނެރަލް މެނޭޖަރި ވަސީމް ހާން އެވެ. ޕާކިސްތާނުގެ މީޑިޔާތަކުން ބުނީ އައިސީސީގެ ޓީމަށް ޕާކިސްތާނުން ދީފައިވާ ޔަގީންކަމަކީ މި މަހުގެ 30ގެ ކުރިން ސްޓޭޑިއަމުގެ ހުރިހާ މަސައްކަތެއް ނިންމާނެކަން ކަމަށެވެ. މިކަން ޕާކިސްތާނުގެ ޑިރެކްޓަރ އޮފް އިންފްރާންސްޓްރަކްޗާ ޖަވަދް ޢާޒީ ވެސް ވަނީ ކަށަވަރުކޮށްދީފަ އެވެ.
މުބާރާތަށް ޕާކިސްތާނުން އެންމެ އެކަށީގެންވާ ވަރަށް ތައްޔާރުނުވާ ކަމަށް ބުނެ އެ ގައުމުގެ ބަދަލުގައި ޑުބާއީގައި ހުރިހާ މެޗެއް ކުޅެން ބަދަލުކޮށްދިނުމަށް ވެސް ބައެއް ގައުމުތަކުން ވަނީ އެދިފަ އެވެ. މިކަމަށް އައިސީން ދެކޮޅު ހެދި އެވެ. ޑުބާއީ އަކީ އިންޑިޔާގެ ހުރިހާ މެޗެއް ވެސް ކުޅޭ ތަނެވެ.
ސަބަބަކީ ޕާކިސްތާނަށް އިންޑިޔާގެ ޓީމު ދާން އެ ގައުމުގެ ސަރުކާރުން ހުއްދަނުދޭތީ އެވެ.
ޗެމްޕިއަންސް ޓްރޮފީ އަކީ 1996ގެ ފަހުން ޕާކިސްތާނުގައި ބާއްވާ ފުރަތަމަ އިންޓަނޭޝަނަލް ކްރިކެޓް މުބާރާތެވެ. މުބާރާތުގެ ގްރޫޕް އޭގައި ހިމެނެނީ ޕާކިސްތާނާއި އިންޑިޔާ އާއި ނިއުޒީލޭންޑާއި ބަނގްލަދޭޝް އެވެ. ގްރޫޕް ބީގައި ހިމެނެނީ ދެކުނު އެފްރިކާ އާއި އޮސްޓްރޭލިޔާ އާއި އިންގްލޭންޑާއި އަފްގާނިސްތާނެވެ.