ތުރުކީވިލާތުގެ ސްކީ ރިސޯޓެއްގައި ހިނގި އަލިފާނުގެ ޙާދިސާގައި ގިނަ ބަޔަކު މަރުވުމާ ގުޅިގެން ތުރުކީވިލާތުގެ ރައީސް ރަޖަބް ޠައްޔިބު އުރްދުޣާނަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތަޢުޒިޔާ ވިދާޅުވެއްޖެއެވެ.
މި ޙާދިސާއާގުޅިގެން ތުރުކީވިލާތުގެ ރައީސަށް ރައީސުލްޖުމްހޫރިއްޔާ ފޮނުއްވި ހަމްދަރުދީގެ މެސެޖުގައި ތުރުކީގެ ފަރުބަދަ ސަރަޙައްދުގައި ހުންނަ ކާރްޓަލްކަޔާ ރިސޯޓުގައި ހިނގި ނުރައްކާތެރި އަލިފާނުގެ ހާދިސާގައި އެތައް ބަޔަކު މަރުވި ޚަބަރު އެއްސެވީ ކުއްލި ހައިރާންކަމާއި ފުންހިތާމައާ އެކުގައި ކަމުގައި ވިދާޅުވެފައިވެއެވެ.
އެ މަނިކުފާނުގެ މެސެޖުގައި، މި ހާދިސާގައި މަރުވި މީހުންގެ އާއިލާތަކަށާއި ތުރުކީވިލާތުގެ ސަރުކާރަށާއި ރައްޔިތުންނަށް، ޚާއްޞަގޮތެއްގައި މި ހާދިސާގެ ސަބަބުން އަސަރުކުރި ފަރާތްތަކަށް ވަރަށް އިޚްލާޞްތެރިކަމާއެކު ތަޢުޒިޔާ ވިދާޅުވެފައިވެއެވެ.
އަންގާރަ ދުވަހުގެ ފަތިހުގެ ވަގުތެއްގައި ކާރްޓަލްކަޔާ ރިސޯޓުގައި ހިނގި މި ޙާދިސާގައި 66 މީހުން މަރުވެފައިވާކަމަށް ތުރުކީވިލާތުގެ ކަމާބެހޭ އިދާރާތަކުން ވަނީ ހާމަކުރައްވާފައެވެ.
އެ ރިސޯޓުގެ ގްރޭންޑް ކާޓަލް ހޮޓެލުގައި ހުރި ރެސްޓޯރަންޓެއްގައި ރޯވި އަލިފާންގަނޑު ފެތުރެން ފެށުމުން 11 ފަންގިފިލާގެ އެ ހޮޓަލުގެ ކޮޓަރިތަކުގައި ތިބި ބައެއް މީހުން ވަނީ އަލިފާނުން ސަލާމަތްވުމަށްޓަކައި ކުޑަދޮރުތަކުން ބޭރަށް ފުުއްމާފައެވެ. އަލިފާންގަނޑު ނިއްވައިލުމުގެ މަސައްކަތް ފެށިފައި ވަނީ ހުޅުގަނޑު ރޯވި ކަން ރިޕޯޓު ކުރިތާ 45 މިނެޓު ފަހުންނެވެ.
އަލިފާނުގެ ޙާދިސާ ހިނގިއިރު އެ ހޮޓަލުގެ ކޮޓަރިތަކުގައި 234 މީހުން ތިއްބެވެ. އެ ހާދިޘާގައި 51 މީހަކަށް އެކި ވަރުގެ އަނިޔާ ލިބިފައިވާ ކަމަށް ތުުރުކީވިލާތުގެ ޞިއްޙީ ވަޒީރު ކަމާލް މެމިސޮގްލު ވިދާޅުވިއެވެ.