މަޑުއްވަރީއަށް ގަވާއިދާ ޚިލާފަށް ދިޔަ ބިދޭސީންގެ މައްސަލަ ދަނީ ބަލަމުން: އިމިގްރޭޝަން

އެމެރަލްޑް މޯލްޑިވްސްގައި މަސައްކަތް ކުރަމުންދިޔަ ބިދޭސީންތަކެއް، ގަވާއިދާ ޚިލާފަށް ރ.އަތޮޅު މަޑުއްވަރީއަށް ދިޔަ މައްސަލަ ބަލަމުންދާކަމަށް މޯލްޑިވްސް އިމިގްރޭޝަނުން ވިދާޅުވެއްޖެއެވެ.

މަޢުލޫމާތު ލިބިފައިވާގޮތުގައި އެމެރަލްޑް މޯލްޑިވްސްގައި މަސައްކަތް ކުރަމުންދިޔަ ބިދޭސީންތަކެއް މަޑުއްވަރީއަށް ގޮސްފައިވަނީ ގަވާއިދާ ޚިލާފަށް އުޅެމުންދާ ބިދޭސީން ހޯދުމަށް ކުރަމުންދާ މަސައްކަތުގެ ތެރޭން އެރިސޯޓަށް އިމިގްރޭޝަނުން ދާކަމަށް ބުނެ މަޢުލޫމާތު ދިނުމާ ގުޅިގެންނެވެ. އެހެންނަމަވެސް އެރިސޯޓަށް ގޮސްފައި ނުވާކަމަށް އިމިގްރޭޝަނުން ވިދާޅުވެއެވެ.

ޕީއެސްއެމް ނިއުސްއަށް މަޢުލޫމާތު ދެއްވަމުން މަޑުއްވަރީ ކައުންސިލްގެ ރައީސް މުޙައްމަދު ޞާދިޤު ވިދާޅުވީ، ގަވާއިދާ ޚިލާފަށް ބިދޭސީންތަކެއް މަޑުއްވަރީއަށް އައުމާ ގުޅިގެން ފުލުހުންނާއި ގުޅިގެން އެމީހުންގެ މަޢުލޫމާތު އެއްކުރުމަށްފަހު އެބިދޭސީން އަނބުރާ ރިސޯޓަށް ފޮނުވާލާފައިވާކަމަށެވެ. އެގޮތުން ރަށަށް އެރިކަމަށް ބެލެވޭ 60 މީހުންގެ ތެރެއިން 40 މީހެއްގެ މަޢުލޫމާތު އެއްކޮށްފައިވާއިރު ދެން ތިބި މީހުން އޭގެކުރިން ރަށުން ގޮސްފައިވާކަމަށް ކައުންސިލުން ވިދާޅުވެއެވެ.

މޯލްޑިވްސް އިމިގްރޭޝަނުން ވިދާޅުވީ މިމައްސަލަ އިމިގްރޭޝަންގެ ސަމާލުކަމަށް އައިސްފައިވާކަމަށާއި، އެމައްސަލަ ދިވެހި ފުލުހުންގެ ޚިދުމަތާއި ގުޅިގެން ބަލަމުންދާކަމަށެވެ.

ރާއްޖޭގައި ގަވާއިދާ ޚިލާފަށް އުޅޭ ބިދޭސީންގެ މައްސަލަ ހައްލުކުރުމަށް ސަރުކާރުން ކުރިއަށްގެންދާ މަޝްރޫޢުގެ ދަށުން މުޅިރާއްޖޭގައި އަންނަނީ އޮޕަރޭޝަން ކުރަނގީގެ ނަމުގައި ޚާއްސަ އޮޕަރޭޝަނެއް ހިންގަމުންނެވެ. މިމަޝްރޫޢުގެ ދަށުން މަޑުއްވަރީގައި ތިބި ހުރިހާ ބިދޭސީންގެ މަޢުލޫމާތު އެއްކޮށްފައިވާކަމަށް ކައުންސިލުން ވިދާޅުވެއެވެ. އެގޮތުން އެރަށުގައި ތިބި 130 ބިދޭސީންގެ ބަޔޯމެޓްރިކްސް ނަގާފައިވާކަމަށް ކައުންސިލުން ވިދާޅުވެއެވެ.

ކުރަނގި އޮޕަރޭޝަންގެ ދަށުން މިހާތަނަށް ފަންސަވީސްހާހަށްވުރެ ގިނަ ބިދޭސީންގެ މަޢުލޫމާތު ނަގާފައިވާކަމަށް ދާޚިލީ ސަލަމާތާއި ފަންނިއްޔާތާ ބެހޭ ވުޒާރާއިން ވިދާޅުވެއެވެ.