އެޗްއާރުސީއެމްގެ ނައިބު ރައީސަކަށް މުއުމިނާ އައްޔަނުކުރަން މަޖިލީހުން ފާސްކޮށްފި

ހިއުމަން ރައިޓްސް ކޮމިޝަން އޮފް ދަ މޯލްޑިވްސް، އެޗްއާރުސީއެމްގެ ނައިބު ރައީސަކަށް އެ ކޮމިޝަނުގެ މެންބަރު މުއުމިނާ ވަޙީދު އައްޔަންކުރައްވަން ރައްޔިތުންގެ މަޖިލީހުން ފާސްކުރައްވައިފިއެވެ. މަޖިލީހުން މިގޮތަށް ފާސްކުރައްވާފައިވަނީ އެޗްއާރުސީއެމްގެ ނައިބު ރައީސްކަމަށް މުއުމިނާ އައްޔަން ކުރެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރައްޔިތުންގެ މަޖިލީހަށް ފޮނުއްވުމުން މިނިވަން މުއައްސަސާތަކުގެ ކޮމިޓީން އެ މައްސަލަ ދިރާާސާ ކުރެއްވުމަށްފަހުއެވެ. މުއުމިނާ އައްޔަން ކުރެއްވުމަށް ފާސްކުރައްވާފައިވަނީ 67 މެންބަރުންގެ ވޯޓުންނެވެ.

އެޗްއާރުސީއެމްގެ ނައިބު ރައީސްގެ މަގާމަށް މުއުމިނާ ވަޙީދު އައްޔަންކުރެއްވުމަށް ރައީސުލްޖުމްހޫރިއްޔާ ފޮނުއްވެވީ މި މަހުގެ 16ވަނަ ދުވަހުއެވެ. މި މައްސަލަ ދިރާސާ ކުރުމަށް މިނިވަން މުއައްސަސާތަކުގެ ކޮމިޓީއަށް ފޮނުވުމުން އެ ކޮމޮޓީން ފާސްކުރެއްވީ އިންޓަވިއުއަކާ ނުލައި މުއުމިނާ އައްޔަންކުރުމަށް ފެންނަ ކަމަށެވެ. އެޗްއާރްސީއެމްގެ ނައިބު ރައީސްގެ މަގާމަށް މުއުމިނާ އައްޔަންކުރަން ކޮމިޓީން ފާސްކުރެއްވީ އެ ބައްދަލުވުމުގައި ބައިވެރިވެވަޑައިގެންނެވި މެންބަރުންގެ އިއްތިފާގުންނެވެ.

އެޗްއާރްސީއެމްގެ މެންބަރުކަމަށް މުއުމިނާ އައްޔަންކުރެއްވީ 2020 ސެޕްޓެމްބަރު 8ވަނަ ދުވަހުއެވެ. އޭނާ ވަނީ އޮސްޓްރޭލިއާގެ ޔުނިވާސިޓީ އޮފް ސިޑްނީން ހިއުމަން ރައިޓްސް އެންޑް ޑިމޮކްރަޓައިޒޭޝަންއިން މާސްޓާސް ހާސިލުކުރައްވާފައެވެ. މުއުމިނާ ވަނީ އިކޮނޮމިކް މިނިސްޓްރީގައި ކޮންސަލްޓެންޓެއްގެ މަގާމުވެސް ކުރިން އަދާކުރައްވާފައެވެ.

މީގެ އިތުރުން އެޗްއާރްސީއެމްގެ މެމްބަރަކަށް ވެވަޑައިގެންނެވުމުގެ ކުރިން، އެ ކޮމިޝަންގެ އެސިސްޓެންޓް ރިސާރޗް އޮފިސަރުގެ މަގާމާއި ޕްލޭނިން އޮފިސަރުގެ މަގާމުގެ އިތުރުން ކޯޕަރޭޓް އެފެއާޒް ޑިޕާޓްމެންޓުގެ ޑިރެކްޓަރުގެ މަގާމުވެސް މުއުމިނާ ވަނީ އަދާކުރައްވާފައެވެ.

އެޗްއާރްސީއެމަށް ނައިބު ރައީސަކު އައްޔަންކުރެއްވުމަށް ރައީސުލްޖުމްހޫރިއްޔާ ފޮނުއްވެވީ އެ ކޮމިޝަންގެ ކުރީގެ ނައިބު ރައީސް ޑރ. އަޙްމަދު އަދުހަމް ޢަބްދުﷲ މަޤާމުން އިސްތިއުފާދެއްވުމާ ގުޅިގެންނެވެ.

މޫމިނާގެ އިތުރުން އެޗްއާރުސީއެމްގެ މިވަގުތު ހަތަރު ބޭފުޅުން ތިއްބަވައެވެ. އެއީ ކޮމިޝަނުގެ ރައީސް މަރްޔަމް މުނާއާއި، މެންބަރު
އާމިނަތު ޝިފާއަތު އަބްދުއްރައްޒާގާއި، މެންބަރު ސަމާއު އަހުމަދު ނަޖީބުގެ އިތުރުން، މެންބަރު އިސްމާޢީލް ހަބީބު ޢަބްދުއްރަޙްމާނެވެ.

އެޗްއާރުސީއެމްގެ މެންބަރުކަމުގެ ދައުރަކީ ފަސް އަހަރު ދުވަހެވެ.