ނުތަނަވަސްކަން ބޮޑު ދަނޑިވަޅެއްގައި އީރާނުން ބިމުއަޑީގައި ހެދި އައު އަސްކަރީ މަރުކަޒު ދައްކާލައިފި

ޔަހޫދީ ދައުލަތާ މެދު އުފެދިފައި އޮތް ނުތަނަވަސްކަން ބޮޑުވެފައިވަނިކޮށް، އީރާނުން ބިމުއަޑީގައި ހެދި ކަނޑުގެ ސިފައިންގެ އައު އަސްކަރީ މަރުކަޒު ދައްކާލައިފިއެވެ.

ދުރު ސަރަޙައްދުތަކަށް މިސައިލް ޙަމަލާ ދިނުމުގެ ޤާބިލުކަން ހުރި މި އައު މަރުކަޒު ޤާއިމުކުރީ، އެމެރިކާގެ އިންތިޚާބީ ރައީސް ޑޮނަލްޑް ޓްރަމްޕް ހުވާކުރެއްވުމާއެކު، އެމެރިކާއިން ޔަހޫދީ ދައުލަތް އިތުރަށް ބާރުވެރިކުރުވައި، އީރާނުގެ ނިޔުކްލިޔަރ ކާރުޚާނާތަކަށް ޙަމަލާދީފާނެކަމުގެ ބިރުވެރިކަން ހީވެފައިވާ ދަނޑިވަޅެއްގައެވެ.

އީރާނުގެ ދައުލަތުގެ ޓީވީ މެދުވެރިކޮށް، އީރާނުގެ އިންޤިލާބީ ފައުޖުގެ ވެރިޔާ ޖެނެރަލް ޙުސެއިން ސަލާމީ، މި އައު މަރުކަޒަށް ޒިޔާރަތްކުރެއްވި މަންޒަރުތައް ވަނީ ގެނެސްދީފައެވެ. "އަޅުގަނޑުމެން، އީރާނުގެ ރައްޔިތުންނަށް ޔަޤީންކަން މި އަރުވަނީ، މި ޤައުމުގެ ޒުވާނުންނަށް ކުދި ބޮޑު ދުޝްމަނުންނާ ދެކޮޅަށް ކަނޑުތަކުގައި ކުރާ ހަނގުރާމައަކުން ކާމިޔާބު ހޯދުމުގެ ޤާބިލުކަން އެބަހުރި ކަން،" ސަލާމީ ވިދާޅުވިއެވެ.

ގާތްގަނޑަކަށް ބިމުގެ 500 މީޓަރު އަޑީގައި ހަދާފައިވާ މި މަރުކަޒުގައި ދުރު ސަރަޙައްދުތަކަށް މިސައިލް ޙަމަލާދެވޭ ކަނޑުގެ އެކި އުޅަނދުތައް ބެހެއްޓުމުގެ ޤާބިލުކަން ހުންނާނެއެވެ. ނަމަވެސް، ގަލްފު ސަރަޙައްދުގައި މި މަރުކަޒު ޤާއިމުކުރި ސީދާ ތަނެއް އީރާނުން ހާމަކޮށްފައެއް ނުވެއެވެ.