މިދިޔަ އަހަރު ފެމިލީ ކޯޓު މެދުވެރިކޮށް 97 މިލިއަން ރުފިޔާ ނަގައިދީފި

ފެމިލީ ކޯޓު މެދުވެރިކޮށް މިދިޔަ އަހަރު ދެއްކުމަށް ސާބިތުކުރި ފައިސާގެ އަދަދު 97 މިލިއަން ރުފިޔާއަށް އަރާ ކަމަށް އެ ކޯޓުން ވިދާޅުވެއްޖެއެވެ.

ފެމެލީ ކޯޓިން އާންމުކޮށްފައިވާ މިދިޔަ އަހަރުގެ ތަފާސްހިސާބުތައް ދައްކާގޮތުގައި ކޯޓު މެދުވެރިކޮށް ދެއްކުމަށް ސާބިތުކުރި ޚަރަދުތަކުގެތެރޭގައި އަނބިދަރިންގެ ޚަރަދާއި އިއްދައިގެ ޚަރަދާއި ވިހެއުމުގެ ޚަރަދާއި ކައިވެނީގެ ރަނުގެ ޚަރަދު ހިމެނެއެވެ. އެ ފައިސާގެ ޖުމްލަ 97 މިލިއަން ރުފިޔާއަށް އަރައެވެ.

އެކިއެކި ގަޟިއްޔާތަކާ ގުޅިގެން މިދިޔަ އަހަރު 46.8 މިލިއަން ރުފިޔާ އެ ކޯޓުން ބަލައިގަތް އިރު 2023ވަނަ އަހަރުގައި ރައްދު ނުކުރެވިހުރި ފައިސާ ހިމެނޭ ގޮތަށް 47.5 މިލިއަން ރުފިޔާ މިދިޔަ އަހަރު ރައްދުކޮށްދީފައިވާކަމަށް ތަފާސްހިސާބުތަކުން ދައްކައެވެ.

ފެމިލީ ކޯޓުގެ މިދިޔަ އަހަރުގެ ތަފާސްހިސާބުތައް:

- ކޯޓަށް ހާޒިރުވުމަށް އަންގާ 12،096 އަމުރު ފޮނުވި
- ޝަރީއަތުގެ އަޑުއެހުމާ ގުޅޭ 4،101 މައްސަލަ
- އާއިލީ މައްސަލަތައް ހައްލު ކުރުމާ ބެހޭ ބަޔަށް 227 މައްސަލަ ހުށަހެޅި އަދި 119 މައްސަލައަށް ސުލްހަވެރި ހައްލެއް ހޯދައިދިން
- ދެމަފިރިންގެ މެދުގައި ޖެހިފައިވާ މައްސަލަތައް ހައްލު ކުރުމާއި ވަރިވެފައިވާ ދެމަފިރިންގެ ދަރިން ބެލުމާ ގުޅޭގޮތުން 6 އެއްބަސްވުން ލިޔުމުންވި
- ކައިވެންޏަށް ހޭލުންތެރިކުރުމާ ބެހޭ ޕްރޮގްރާމުގައި 3،428 މީހުން ބައިވެރިވެފައިވޭ. އެއީ 1،746 ފިރިހެނުންނާއި 1،682 އަންހެނުން

މީގެއިތުރުން މިދިޔަ އަހަރު 2،485 ކައިވެނި ކޮށްދީފައިވާއިރު 1،326 ވަރި ވަނީ ކޮށްދީފައެވެ. ރާއްޖެއިން ބޭރުގައި ކޮށްފައިވާ 181 ކައިވެނި މިދިޔަ އަހަރު ރަޖިސްޓަރީކޮށްދީފައިވާކަމަށްވެސް ފެމެލީ ކޯޓުން ވިދާޅުވެއެވެ.

މިދިޔަ އަހަރުގެތެރޭގައި އެ ކޯޓުން ވަނީ ގެވެށި އަނިޔާ އިން ރައްކާތެރިކުރުމާއި ކުޑަކުދިންގެ ހައްގުތަކާ ގުޅޭ އަމުރުތައް ހިމެނޭ ގޮތުން 117 އަމުރެއް ނެރެފައެވެ.