ޔަހޫދީން ހަނގުރާމަ ހުއްޓައިލުމަށް އެއްބަސްވުމުން ދައްކުވައިދެނީ ޙަމާސްގެ ހިތްވަރުގަދަކަން: ޙިޒްބުالله
ފަލަސްޠީނުގެ މުސްލިމުންނާ ދެކޮޅަށް ޔަހޫދީން ކުރަމުންދިޔަ ހަނގުރާމަ ހުއްޓައިލުމަށް އެއްބަސްވުމުން ދައްކުވައިދެނީ ޣައްޒާގައި ވެރިކަންކުރާ ޙަމާސް ޖަމާޢަތުގެ ހިތްވަރުގަދަކަން ކަމަށް ވިދާޅުވެ ލުބުނާނުގެ މުޖާހިދުންގެ ޖަމާޢަތް, ޙިޒްބުاللهގެ އިސްވެރިޔާ ނަޢީމް ޤާސިމް ފަލަސްޠީނަށް މަރުޙަބާ ވިދާޅުވެއްޖެއެވެ. މިއީ ޖަނަވަރީ މަަހުގެ 15ވަނަ ދުވަހު ޔަހޫދީ ދައުލަތާއި ޣައްޒާގައި ވެރިކަން ކުރާ ޙަމާސާ ދެމެދު ހަނގުރާމަ ހުއްޓައިިލުމުގެ އެއްބަސްވުމެއް ޤާއިމު ކުރި ފަހުން އެއްބަސްވުމާ ގުޅޭ ގޮތުން ޤާސިމް ބަހެއް ވިދާޅުވި ފުރަތަމަ ފަހަރެވެ.
ޤާސިމް ވިދާޅުވީ ޔަހޫދީންނާ ޙަމާސާ ދެމެދު ވެފައިވާ އެއްބަސްވުމަކީ ހަނގުރާމަ ހުއްޓާލުމަށް 2024ވަނަ އަހަރުގެ މެއި މަހުގެ ތެރޭގައި ހުށަހެޅި ހުށަހެޅުންތަކާ އެެއްވެސް ތަފާތެއް ނެތް އެއްބަސްވުމެއް ކަމަށެވެ. އެ ކަމުން ދައްކުވައިދެނީ ޔަހޫދީންނާ ދެކޮޅަށް ޙަމާސުން ކުރި މިންނަތް މަސައްކަތް ކަމަށް އޭނާ ވިދާޅުވިއެވެ. އަދި ޙަމާސުން ބޭނުންވި ގޮތް އެ ޖަމާޢަތަށް ޙާޞިލްވެފައިވާ ކަމަށާއި ޔަހޫދީންނަށް އެ މީހުންގެ މަޤުޞަދު ޙާޞިލް ކުރުމަށް ނުކުޅެދިފައިވާ ކަމަށް އޭނާ ވިދާޅުވިއެވެ.
މިދިޔަ ނޮވެމްބަަރު މަހުގެ ތެރޭގައި ލުބުނާނާއި ޔަހޫދީ ދައުލަތާ ދެމެދު ކުރަމުން ދިޔަ ހަނގުރާމަ ވެސް ވަނީ މި ފަދަ އެއްބަސްވުމެއްގެ ދަށުން ނިމުމަކަށް ގެނެސްފައެވެ. އެމެރިކާއާއި ފަރަންސޭސިވިލާތުން އިސްވެ އޮވެ ޤާއިމު ކުރި އެއްބަސްވުމުގެ ދަށުން ލުބުނާނުގެ ދެކުނުގެ ސަރަޙައްދުތަކުން 60 ދުވަހުގެ ތެރޭގައި ޔަހޫދީ ފައުޖު ފައިބަން ޖެހެއެވެ. އަދި ޙިޒްބުاللهގެ ހަނގުރާމަވެރިން އެ ސަރަޙައްދުން ފައިބައި ހަތިޔާރު އަނބުރާ ގެންދިއުމަށް ވެސް އެއްބަސްވުމުގައި ޝަރުތު ކޮށްފައި ވެއެވެ. ނަމަވެސް ދެ ފަރާތުން ވެސް ޙަމަލާ ބަދަލު ކުރުމުގެ އެއްބަސްވުމާ ޚިލާފުވެފައިވާ ކަމަށް ދެ ފަރާތުން ވެސް ތުހުމަތު ކުރެއެވެ.
އެ ކަމާ ގުޅޭ ގޮތުން ވެސް ޤާސިމް ވަނީ ވާހަކަ ދައްކަވައިފައެވެ. ޔަހޫދީން ޙިޒްބުاللهގެ ކެތްތެރިކަން އިމްތިހާނު ނުކުރަން އިންޒާރު ދެއްވާ ޤާސިމް ވިދާޅުވީ ލުބުނާނުގެ ސަރުކާރުން ވެސް ޔަހޫދީން އެއްބަސްުވުމާ ޚިލާފަށް ކުރަމުންދާ ކަންތައްތައް ބަލައި ހަރުކަށި ފިޔަވަޅު އަޅަން ޖެހޭ ކަމަށެވެ. ޔަހޫދީން އެއްބަސްވުމާ ޚިލާފަށް ކަންތައް ކޮށްފައިވާ 100އަށް ވުރެ ގިނަ ޙާލަތު މެދުވެރިވެފައިވާ ކަމަށް އޭނާ ވިދާޅުވިއެވެ.
ޤާސިމް ވަނީ ލުބުނާނުގެ އައު ރައީސް ޖޫޒީފް ޢައޫން އެ މަޤާމަށް އިންތިޚާބު ކުރުމުގައި ޙިޒްބުاللهން ޢަދާ ކުރި ދަޢުރާ ގުޅޭ ގޮތުން ވެސް ވާހަކަ ދައްކަވައިފައެވެ.