މެންޗެސްޓަރ ޔުނައިޓެޑްގެ ކުރީގެ ކޯޗު އޮލެގުނަ ސޯލްޝެއާ ތުރުކީގެ ބެސިކްޓާސްގެ ކޯޗު ކަމުގެ މަގާމަށް ހަމަޖެއްސުމަށް ނިންމައިފި އެވެ.
ތުރުކީގެ ލީގުގެ ހަވަނައިގައި މިވަގުތު އޮތް ބެސިކްޓާސް އާއި ހަވާލުވުމުގެ ގޮތުން އިތުރު މަޝްވަރާތައް ކުރުމަށް މިވަގުތު ތުރުކީގެ އިސްތަންބޫލުގައި ހުރި ސޯލްޝެއާ އެ މަގާމަށް ހަމަޖެއްސުމަށް އެ ކްލަބުން ނިންމާފައިވަނީ ކުރިން އެ ކްލަބުގެ ކޯޗުގެ މަގާމުގައި ހުރި ނެދަލޭންޑްސްގެ ޖިއޮވާނީ ވެން ބްރޮންކޮސްޓް މިދިޔަ ނޮވެމްބަރ މަހު އެ މަގާމުން ވަކިކުރުމަށްފަހުގަ އެވެ.
ތުރުކީގެ އިސްތަންބޫލުގެ އަޓަޓުކް އެއަރޕޯޓުގައި ހުރެ ނޫސްވެރިންނާ ވާހަކަ ދައްކަމުން ސޯލްޝެއާ ބުނެފައިވަނީ ބެސިކްޓާސްގެ އޮފިޝަލުންނާއިއެކު މަޝްވަރާތައް ކުރިއަށްދާ ކަމަށާއި އަދި ވަރަށް އަވަހަށް އެ ކްލަބާއި ހަވާލުވުމުގެ ކަންތައްތައް ހަމަޖެހިގެންދާނެކަމަށް އުންމީދު ކުރާ ކަމަށެވެ.
2021 ވަނަ އަހަރުގެ ނޮވެމްބަރ މަހު މެންޗެސްޓަރ ޔުނައިޓެޑްގެ ކޯޗު ކަމުގެ މަގާމުން ވަކިވި ފަހުން ސޯލްޝެއާ އަދި މިހާތަނަށް އެއްވެސް ޓީމަކަށް ކޯޗުކޮށްދީފައެއް ނުވެއެވެ. އުމުރުން 51 އަހަރުގެ ސޯލްޝެއާ މެންޗެސްޓަރ ޔުނައިޓެޑާއި ހަވާލުވެފައިވަނީ 2018 ވަނަ އަހަރު ޖޯސޭ މޮރީނިއޯ އެ ކްލަބުގެ ކޯޗުކަމުގެ މަގާމުން ވަކިކުރުމަށްފަހުގަ އެވެ.
ސޯލްޝެއާ ވަނީ އޭނާ މެންޗެސްޓަރ ޔުނައިޓެޑްގައި ހޭދަކުރި ދުވަސްތަކުގައި އެކްލަބަށް ޕްރިމިއާ ލީގުގެ ދެވަނަ ހޯދައިދިނުމުގެ އިތުރުން ޔޫރޮޕާ ލީގުގެ ފައިނަލަށް އެ ކްލަބު ގެންގޮސްދީފަ އެވެ.
ކުޅުންތެރިއެއްގެ ގޮތުގައި ގިނަ ކާމިޔާބީތަކެއް ހޯދާފައިވާ ސޯލްޝެއާ ވަނީ މެންޗެސްޓަރ ޔުނައިޓެޑްގައި ހޭދަކުރި 11 ސީޒަނުގައި އެ ކްލަބަށް 126 ގޯލު ޖަހައިދީފަ އެވެ. އަދި 1999 ވަނަ އަހަރުގެ ޗެމްޕިއަންސް ލީގުގެ ފައިނަލުގައި ލަނޑު ޖަހާ އޭނާ ވަނީ އެ ކްލަބަށް އެ ފަހަރުގެ މުބާރާތް ކާމިޔާބުކޮށްދީފަ އެވެ.