ޖަރުމަންގެ އެއިންޓްރެކްޓް ފްރެންކްފަޓަށް ކުޅެމުން އަންނަ މިސްރުގެ އުމަރު މަރްމޫޝް ހޯދުމަށް މެންޗެސްޓާ ސިޓީން ކުރަމުންދާ މަސައްކަތުގައި ދެ ކުލަބުގެ ދެމެދުގައި އެއްބަސްވުމަކަށް އާދެވިފައިވާ ކަމަށް ރިޕޯޓުތައް ބުނެފިއެވެ.
އުމުރުން 25 އަހަރުގެ މަރްމޫޝް މި ސީޒަނުގައި ދައްކަމުންދާ ތަފާތު މޮޅު ކުޅުމާއެކު ޔޫރަޕްގެ ގިނަ ކްލަބްތަކަކުން ވަނީ އޭނާއަށް ޝައުގުވެރިކަން ފާޅުކޮށްފަ އެވެ. މި ސީޒަނުގައި ބުންޑެސްލީގާގައި މިހާތަނަށް 15 ލަނޑު އޭނާ ވަނީ ޖަހާފަ އެވެ.
2023 ވަނަ އަހަރު ބުންޑެސްލީގާގެ ކްލަބް, ވޮލްސްބަރގް އިން ހިލޭ ޓްރާންސްފަރ އެއްގެ ދަށުން ފްރެންކްފަޓް އާއި ގުޅުނު މަރްމޫޝްގެ ސޮއި ހޯދުމަށް ދެ ކްލަބުގެ ދެމެދުގައިވަ އެއްބަސްވެފައިވާ އަދަދެއް އަދި އެއްވެސް ފަރާތަކުން ހާމަކޮށްފައެއް ނުވެއެވެ.
ޕްރިމިއާ ލީގުގައި ކުޅޭ އެންމެ ނުރައްކާތެރި ފޯވަޑުންގެ ތެރޭގައި ހިމެނޭ އާލިން ހާލަންޑްގެ ފަރާތުން ގޯލުތަކެއް ފެންނަމުން ނުދާއިރު, ސިޓީގެ ކޯޗު ވަނީ އެ ޓީމަށް ނިމިދިޔަ ހޫނު މޫސުމުގައި ކުޅުންތެރިން ހޯދިފައިނުވާ ކަމީ ހެދުނު ގޯހެއް ކަމަށް ބުނެފަ އެވެ.
އަދި އެ ޓީމު އިތުރަށް ވަރުގަދަ ކުރުމުގެ ގޮތުން މަރްމޫޝްގެ އިތުރުން ފްރާންސްގެ ލެންސް އަށް ކުޅެމުންދާ އުޒްބެކިސްތާނުގެ ޑިފެންޑަރ އަބްދުކާދިރު ކުސަނޯވް ގެ ސޮއި ހޯދުމަށް ދެ ކްލަބުގެ ދެމެދުގައި ވަނީ 33.6 މިލިއަން ޕައުންޑުގެ ފީއަކަށް އެއްބަސްވެފަ އެވެ.
މީގެ އިތުރުން އިޓަލީގެ ޔުވެންޓަސް އަށް ކުޅެމުންދާ އެންދްރިއާ ކެމްބިއާސޯ ހޯދުމުގެ މަޝްވަރާތައް ކުރިއަށްދާކަމަށްވެސް މީޑިޔާ ރިޕޯޓްތައް ވަނީ ބުނެފަ އެވެ.
އުމުރުން 24 އަހަރުގެ ކެމްބިއާސޯ ޔުވެންޓަސް އާއި ގުޅިފައިވަނީ 2022 ވަނަ އަހަރު އިޓަލީގެ ޖެނޯއާ އިންނެވެ. އޭނާ ވަނީ މި ސީޒަނުގައި ޔުވެންޓަސް އަށް 25 މެޗު ކުޅެދީ ދެ ލަނޑު ޖަހާފަ އެވެ.
ފާއިތުވެދިޔަ ހަތަރު ސީޒަނުގައި ޕްރިމިއާ ލީގު ޖެހިޖެހިގެން ކާމިޔާބުކޮށްފައިވާ މެންޗެސްޓަރ ސިޓީއަށް މި ސީޒަނުގައި އެދެވޭ ނަތީޖާތަކެއް ހޯދިފައިނުވާއިރު އެ ޓީމު މިހާރު އޮތީ ލީގުގެ ހަވަނައިގަ އެވެ.