އޮޅުވާލައިގެން ހޯދާފައިވާ ބިމެއްގައި ގޯތި ރާނަށް ފާށާފައިވީނަމަވެސް އެތަނެއް އަތުލާނަން: ގެދޮރުވެރިކަމާ ބެހޭ ވަޒީރު

އޮޅުވާލައިގެން ގެއެއް ނުވަތަ ފްލެޓެއް ހޯދާފައިވާނަމަ، އެ ގެއެއް އިމާރާތްކުރަން ފަށާފައިވީނަމަވެސް ނުވަތަ ފްލެޓް ހަވާލުކޮށްފައިވީނަމަވެސް އެތަނެއް އަތުލާނެކަމަށް އިމާރާތްކުރުމާއި ގެދޮރުވެރިކަމާއި ބިނާރާ ބެހޭ ވަޒީރު ޑރ. ޢަބްދުﷲ މުއްޠަލިބް ވިދާޅުވެއްޖެއެވެ. ވަޒީރު ވިދާޅުވީ މި މަސައްކަތް ފުރަތަމަ ފަށާނީ ހުޅުމާލެ ދެވަނަ ފިޔަވަހިންކަމަށެވެ.

ސަރުކާރުން ދޫކުރާ ފްލެޓް އަދި ގޯތި ދޫކުރުމުގެ ސްކީމްތަކުގެ ތެރެއިން، އޮޅުވާލައިގެން ނުވަތަ ސްކޭމްތަކުން ގެދޮރު ހޯދާ ވާހަކައަކީ އަބަދުވެސް އިވޭ ވާހަކައެކެވެ. ޕޮއިންޓް ދިނުމުގައި އޮޅުވާލުމާއި އަދި ސްކީމްތަކަށް ހުށަނާޅާ މީހުންނަށްވެސް ގޯތި ލިބުމުގެ ވާހަކަތަކެއް ދާދިފަހުންވެސް ފެންމަތިވިއެވެ. މީގެއިތުރުން ކޮރަޕްޝަނުން ފައިސާ ދީގެން ސްކީމްތަކުގެ ތެރެއަށް ވައްދާނެކަމަށްބުނެ ހިންގާ ސްކޭމްތައްވެސް ހިމެނެއެވެ.

ގެދޮރުވެރިޔާ ފްލެޓްތައް ހާވާލުކުރުމަށް ވަމުންދާ ތައްޔާރީތަކާ ގުޅޭގޮތުން ބޭއްވި ނޫސްވެރިންގެ ބައްދަލުކުރެއްވުމުގައި އިމާރާތްކުރުމާއި ގެދޮރުވެރިކަމާއި ބިނާރާ ބެހޭ ވަޒީރު ޑރ. ޢަބްދުﷲ މުއްޠަލިބް ވިދާޅުވީ ބިންވެރިޔާ އަދި ގެދޮރުވެރިޔާ ސްކީމާއި ގުޅޭގޮތުން ހިންގާ ސްކޭމްތަކަކީ ވުޒާރާއި ގުޅުމެއްހުރި ކަންކަން ނޫންކަމަށެވެ. ނަމަވެސް ބަޔަކު މިފަދަ ސްކޭމްތައް ހިންގާކަމަށާއި ގޯތި ދިނުމުގެ ނަމުގައި ބޮޑެތި އަދަދުން ފައިސާވެސް ހޯދާކަން ފާހަގަވާކަމަށެވެ. ވަޒީރު ވަނީ މިގޮތަށް ފައިސާދީގެން ބިން ހޯދުމުގެ ސްކޭމްތަކުގައި ނުޖެހުމަށް ރައްޔިތުންނަށް އިލްތިމާސްކުރައްވާފައެވެ.

ގެދޮރުވެރިކަމާ ބެހޭ ވަޒީރު ވިދާޅުވީ މިނޫންވެސް ގޮތަކުން އޮޅުވާލައިގެން ބިމެން ނުވަތަ ފްލެޓެއް ހޯދާފައިވާނަމަ، އެތަނެއް އަތުލާނެކަމަށެވެ.

މަޢުލޫމާތު ވެރިފައިކުރުމުގެ ތެރޭގައި، ގޯތި އޮތް މީހެއްގެ ގޯއްޗެއް ނެތްކަމަށް ދައްކައިގެން ގޯތި ހޯދުން ނުވަތަ މާލެއަށް އުފަން ނޫން މީހުން މާލެއަށް އުފަން މީހުންގެ ގޮތުގައި ދައްކައިގެން ދީފައިވާ ގޯތިތައްވެސް އަތުލާނެކަމަށް ވަޒީރު ވިދާޅުވިއެވެ. ރެޖިސްޓްރީ ހަވާލުކޮށް ގޯތި ރާނަށް ފަށާފައި ހުރިނަމަވެސް، އެއީ ކޮރަޕްޝަނުން ހޯދި ތަނެއްކަން އެނގޭހިސާބުން އެ މަސައްކަތް ހުއްޓުވާ ދައުލަތަށް ނާގާނެކަމަށް ވަޒީރު ޑރ. މުއްޠަލިބް ވިދާޅުވިއެވެ.

"ގޯތި ރެޖިސްޓްރީ ދީފައި ގޯތި ހަވާލުކުރިއަސް، ވަށާ ފާރު ރާނަން ފަށާފައި އޮތަސް، ޝަރުތު ހަމަނުވާ މީހަކަށް ދީފައިވާނަމަ އެ ތަނެއް އަތުލާނަން. އެ ފިޔަވަޅު އަޅާނަން. ބިމަކީ ވަކި މަޤުސަދެއްގައި މާލޭގެ ރައްޔިތުންނަށް ދޭން ނިންމި އެއްޗެއް. އަޅުގަނޑުމެން ބަލާއިރު، އެއަށް ކޮރަޕްޝަން ވައްދައިގެން ހޯދި ތަނެއްކަން އިނގޭނަމަ އަތުލާނަން. މި މަސައްކަތް ފުރަތަމަ ފަށާނީ ހުޅުމާލެ 2 ވަނަ ފިވަހިން." އިމާރާތްކުރުމާއި ގެދޮރުވެރިކަމާ ބެހޭ ވަޒީރު ޑރ. ޢަބްދުﷲ މުއްޠަލިބް ވިދާޅުވިއެވެ.

ވަޒީރު ވިދާޅުވީ ގެދޮރުވެރިކަމުގެ މައްސަލައަކީ ވަރަށް ހައްސާސް މައްސަލައެއްކަމަށާއި ސްކޭމާއި ކޮރަޕްޝަނަށް ފުރުޞަތު ނުދޭނެކަމަށެވެ. ވުޒާރާއިން ނުވަތަ އެޗްޑީސީންވެސް، އޮޅުވާލައިގެން ލިބެން ނުޖެހޭ ފަރާތަކަށް ނުވަތަ ލިސްޓުގައި ނުހިމެނޭ މީހަކަށް ފްލެޓާ ގޯތި ދެވިގެން ނުވާނެކަމަށް ވަޒީރު ވަނީ ވިދާޅުވެފައެވެ.

ބިންވެރިޔާ ސްކީމްގެ ދަށުން، ގޯތި ނުލިބޭ ބަޔަކަށް ހުޅުމާލެއިން ގޯތި ދީފައިވާ މައްސަލައެއް ފުލުހުން މިހާރުވެސް ދަނީ ތަހުޤީގުކުރަމުންނެވެ. ބިންވެރިޔާ ސްކީމްގައި ޖުމްލަ 9000 އަށްވުރެ ގިނަ ގޯތި ދޫކުރުމަށް ހަމަޖެހިފާއިރު، ހުޅުމާލެއިން ދޫކުރާ 1300 އަށްވުރެ ގިނަ ގޯތި ހިމެނެއެވެ.