ދަތުރުފުޅުން ހާމަވީ އެސްޓޯނިއާއިން ރާއްޖެއާއެކު އޮތް ގުޅުން މާފުޅާކޮށް ބޭއްވުމަށް ބޭނުންވާކަން: ޚާރިޖީ ވަޒީރު

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، އެސްޓޯނިއާއަށް ކުރެއްވި ދަތުރުފުޅުން ހާމަވީ، އެޤައުމުން ރާއްޖެއާމެދު އޮންނަ ގާތް ގުޅުން މާ ފުޅާކޮށް ބޭއްވުމަށް ބޭނުންވާކަންކަމަށް ޚާރިޖީ ވަޒީރު ޑރ. ޢަބްދުﷲ ޚަލީލް ވިދާޅުވެއްޖެއެވެ. ވަޒީރު މިހެން ވިދާޅުވީ، އެސްޓޯނިއާގައި ހުންނަވައި ޕީއެސްއެމް ނިއުސްއަށް ދެއްވި އިންޓަރވިއުއެއްގައެވެ.

ޚާރިޖީ ވަޒީރު ޑރ. ޢަބްދުﷲ ޚަލީލް ވިދާޅުވީ، ރާއްޖޭން ތަފާތު އެކި ޤައުމުތަކާ ގުޅުން ބަދަހިކުރުމަށް މަސައްކަތްކުރާކަމަށާއި، ދިވެހިންނަށް އެހީތެރިވާ ޤައުމުތަކާއެކު ކުރިއަށްދިއުމަށް ޚާއްޞަ އިސްކަންދެއްވާކަމަށެވެ. އެގޮތުން އެސްޓޯނިއާއާއެކު އޮތް ގުޅުންވެސް އިތުރަށް ބަދަހިވެގެން ގޮސްފައިވާކަމަށާއި، އެޤައުމަކީ ރާއްޖެއަށް ފައިދާކުރާނެ އެންމެ މުހިންމު ދާއިރާތަކުން އެހީތެރިވެވޭނެ އެއް ޤައުމުކަމަށް ޚާރިޖީ ވަޒީރު ވިދާޅުވިއެވެ.

ރާއްޖޭގެ އިޤްތިޞާދުގެ %15 އަކީ ޑިޖިޓަލް އިޤްތިޞާދުގެ ގޮތުގައި ހެދުމަށް ރައީސް ކަނޑައަޅުއްވާފައިވާ ސިޔާސަތު ފާހަގަކުރައްވަމުން ވަޒީރު ވަނީ އެސްޓޯނިއާއިން ރާއްޖޭގެ ޑިޖިޓަލް ނިޒާމު ކުރިއަރުވަން އެހީތެރިވެދޭނެކަމުގެ ޔަޤީންކަން ލިބިފައިވާކަމަށްވެސް ވިދާޅުވެފައެވެ. އެސްޓޯނިއާއަކީ ދުނިޔޭގައި ޑިޖިޓަލް ނިޒާމު އެންމެ ކުރިއަރާފައިވާ އެއްޤައުމެވެ. ސަރުކާރުގެ ސައްތައިންސައްތަ ޚިދުމަތް ފޯރުކޮށްދެނީ ޑިޖިޓަލް ނިޒާމުގެތެރެއިންކަން ފާހަގަކުރައްވާ ވަޒީރު ވިދާޅުވީ އެފަދައިން ރާއްޖޭގައިވެސް ޑިޖިޓަލް ނިޒާމު ޤާއިމުކުރެވިއްޖެނަމަ އިޤްތިޞާދީގޮތުން ގިނަ ފައިދާތަކެއް ކުރާނެކަމަށެވެ.

ޑިޖިޓަލް ވަސީލަތުގެ ދާއިރާގެ ގުޅުމުގެ އިތުރުން ރާއްޖެއާއި އެސްޓޯނިއާއަކީ ކުޑަ ދެ ޤައުމުގެ ގޮތުގައި އޮވެ، ބައިނަލްއަޤްވާމީ މައިދާނުގައި އެކުގައި ގުޅިގެން މަސައްކަތްކުރެވޭނެކަން މިދަތުރުފުޅުން ހާމަވިކަމަށްވެސް ވަޒީރު ވިދާޅުވިއެވެ. ޚާއްޞަކޮށް މިނިވަންކަމާއި އިސްތިގުލާލު ހިމާޔަތްކޮށް ކުރިއަށްދިއުމުގެ އުސޫލުތަކާއި ސިޔާސަތުތަކުގައި ރާއްޖެއާއި އެސްޓޯނިއާގެ ވަރަށް އެއްގޮތް ސިފަތަކެއް އެބަހުރިކަމަށްވެސް ވަޒީރު ވިދާޅުވިއެވެ.

"ރާއްޖެއާއި އެސްޓޯނިއާއަކީ ކުޑަ ދެޤައުމަށްވާއިރު، އެއްކޮށް މަސައްކަތްކުރެވިދާނެ ޚާއްޞަ ކަންތައްތަކެއް އަޅުގަނޑުމެންނަށްވަނީ ބައިނަލްއަޤްވާމީ މައިދާނުގައި ފާހަގަވެގެން ގޮސްފައި. ޔޫއެންގައިވެސް އަދި ބައިނަލްއަޤްވާމީ ޢެހެން ފޯރަމްތަކުގައިވެސް." ޚާރިޖީ ވަޒީރު ވިދާޅުވިއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެސްޓޯނިއާއަށް ކުރެއްވި ދަތުރުފުޅުގައި ވަނީ އެސްޓޯނިއާގެ ރައީސާ ބައްދަލުކުރައްވާފައެވެ. އަދި މުހިންމު ދާއިރާތަކުން ވަނީ މަޝްވަރާކުރައްވާފައެވެ. މިއީ ރާއްޖޭގެ ރައީސަކު އެސްޓޯނިއާއަށް ވަޑައިގެންނެވި ފުރަތަމަ ފަހަރެވެ.

އެސްޓޯނިއާއާއެކު ކުރެވުނު މަޝްވަރާތަކުން ރާއްޖޭގެ ޑިޖިޓަލް އިޤްތިޞާދު ކުރިއެރުވުމަށް، ރާއްޖެއަށް ގިނަ ފައިދާތަކެއްކުރާނެކަމަށް ޚާރިޖީ ވަޒީރު ވިދާޅުވިއެވެ. ވަޒީރު ވަނީ އެސްޓޯނިއާގެ އެންމެ އިސްވެރިން ރައީސުލްޖުމްހޫރިއްޔާއަށް ދެންނެވި ހޫނު މަރުހަބާ ފާހަގަކުރައްވާފައެވެ. އަދި ރާއްޖެއާއެކު އޮންނަ ގުޅުން އިތުރަށް ފުޅާކުރަން އެސްޓޯނިއާއިން ބޭނުންވާކަން ހާމަވިކަމަށްވެސް ޚާރިޖީ ވަޒީރު ޑރ. ޢަބްދުﷲ ޚަލީލް ވިދާޅުވިއެވެ.