އެންމެފަހުން ދެކުނު ކޮރެޔާގެ ރައީސް ހައްޔަރުކޮށްފި، ކޮރަޕްޝަން ތަޙުޤީޤަށް އެއްބާރުލުން ދެެއްވާނެ

ދުސްތޫރީ ކުށެއްގެ ދަޢުވާ ސާބިތުވެފައިވާ ދެކުނު ކޮރެޔާގެ ރައީސް ޔޫން ސުކް ޔޯލް ހައްޔަރު ކޮށްފިއެވެ. ވެރިރަށް ސޯލްގައި ހުންނަ ރިޔާސީ ގަނޑުވަރުގައި ހުންނަވަނިކޮށް އޭނާ ހައްޔަރު ކޮށްފައި ވަނީ ދެކުނު ކޮރެޔާގެ ކޮރަޕްޝަންގެ މައްސަލަތައް ތަޙުޤީޤު ކުރާ އިދާރާ (ސީއައިއޯ)އާއި ފުލުހުން ގުޅިގެން ހިންގި އޮޕަރޭޝަނެއްގައެވެ. އޭނާ ހައްޔަރު ކުރުމަށް ކޯޓު އަމުރެއް ނެރެފައި ވަނީ ޤާނޫނީ ޙުކޫމަތު ނަގައިލުމާއި ދައުލަތާ ދެކޮޅަށް ފިތުނަވެރިކަމުގެ އަމަލެއް ހިންގެވުމާއި، ޚިޔާނާތުގެ ކުށުގެ ދަޢުވާއާ ގުޅިގެންނެވެ. އަދި، ސީއައިއޯގެ ތަޙުޤީޤަށް އެއްބާރުލުން ދެއްވުމަށް ދެކޮޅު ހައްދަވަމުން ގެންދަވާތީއެވެ.

"

ސިއައިއޯގެ ތަޙުޤީޤަށް އެއްބާރުލު ދިނުމަށް އަޅުގަނޑު ނިންމައިފިން. އެއީ ޣައިރުޤާނޫނީ ތަޙުޤީޤެއް ނަމަވެސް އެ ކަން ކުރީ ލޭއޮހޮރުވުމެއް ހުއްޓުވުމަށް،"

ދެކުނު ކޮރެޔާގެ ރައީސް ޔޫން ސުކް ޔޯލް

ޔޫންގެ މައްޗަށް ސާބިތުވެފައި ވަނީ، ރައީސް ކަމުގެ މަޤާމުގެ ބާރާއި ނުފޫޒު ބޭނުން ކުރެއްވުމުގެ ކުށުގެ ދަޢުވާއެވެ. އޭނާއާ ދެކޮޅަށް ޤާނޫނު ހަދާ މަޖިލީހަށް ޤަރާރެއް ހުށަހަޅަައި، ފާސްކޮށްފައި ވަނީ ޑިސެންބަރު 3ވަނަ ދުވަހު ޤައުމުގައި ކުއްލިހާލަތު އިޢުލާނު ކުރައްވަން މަސައްކަތް ކުރެއްވުމާ ގުޅިގެންނެވެ. ޤާނޫނު ހަދާ މަޖިލީހުން ނިންމާފައި ވަނީ، އެއީ ޣައިރުޤާނޫނީ އަމަލެއްގެ ގޮތުގައެވެ. އަދި، ރައީސް ކަމުގެ މަޤާމުގެ ބާރާއި ނުފޫޒު ބޭނުން ކުރައްވައިގެން ޔޫން ދުސްތޫރީ ކުށެއް ކުރައްވާފައިވާ ކަމުގައެވެ. އެ ނިންމުމާ އެކު ޤާނޫނު ހަދާ މަޖިލީހުން ވަނީ ރައީސް ކަމުގެ މަޤާމުގެ ޒިންމާތަކާއި މަސްއޫލިއްޔަތުތަކުން ޔޫން ސަސްޕެންޑު ކޮށްފައެވެ.

ޔޫން ހައްޔަރު ކުރުމަށް ބޮޑު އޮޕަރޭޝަނެއް

ޔޫން ހައްޔަރު ކުރުމަށް ހިންގި އޮޕަރޭޝަނުގައި ސީއައިއޯގެ ގިނަ އަދަދެއްގެ އޮފިޝަލުންނާއި 3,000އެއްހާ ފުލުހުން ބައިވެރިވިއެވެ. ފުލުހުންގެ ބެލުމުގެ ދަށަށް ޔޫން ގެންދެވުމުގެ ކުރިން އޭނާ ނެރުއްވި ބަޔާނެއްގައި ބުނެފައި ވަނީ، ފުލުހުންގެ ބެލުމުގެ ދަށަށް ވަޑައިގަންނަވައި، ސީއައިއޯގެ ތަޙުޤީޤަށް އެއްބާރުލުން ދިނުމަށް ނިންމަވާފައި ވަނީ ލޭއޮހޮރުވުމަކަށް ފުރުޞަތު ނުދެއްވުމުގެ ގޮތުން ކަމުގައެވެ. ރިޔާސީ ގަނޑުވަރުގައި އޭނާ ހުންނެވީ ހަށިފާރަވެރިންނާއި ސިފައިންގެ ޙިމާޔަތުގައެވެ.

ޔޫން ވިދާޅުވީ، ސީއައިއޯން އޭނާއާ ދެކޮޅަށް ހިންގަމުން ދަނީ ޣައިރުޤާނޫނީ ތަޙުޤީޤެއް ކަމުގައެވެ. އަދި، އޭނާ ހައްޔަރު ކުރުމަށް ނެރެފައި ވަނީ ޣައިރުޤާނޫނީ ކޯޓު އަމުރެއް ކަމުގައެވެ. ސަބަބަކީ، އޭނާ ހައްޔަރު ކުރުމުގެ އަމުރު ނެރެފައި ވަނީ، އެ ކަމުގެ އިހުތިސާސް ނެތް ކޯޓަކުން ކަމުގައި އޭނާ ވިދާޅުވިއެވެ. މިއީ، ވެރިކަމުގައި ހުންނަވަނިކޮށް ދެކުނު ކޮރެޔާގެ ރައީސަކު ހައްޔަރުކޮށްފައިވާ ފުރަތަމަ ފަހަރެވެ.

ހައްޔަރު ކޮށްގެން ޔޫން ގެންގޮސްފައި ވަނީ ސީއައިއޯގެ މައި އޮފީހަށެވެ. އޭނާއާ ސުވާލު ކުރުމަށް ސީއައިއޯއަށް 48 ގަޑިއިރުގެ މުހުލަތެއް ލިބޭނެއެވެ. އެއަށްފަހު، އޭނާ އިތުރު 20 ދުވަހު ބަންދުގައި ބެހެއްޓުމަށް ސީއައިއޯއަށް އައު ކޯޓު އަމުރެއް ހޯދަން ޖެހޭނެއެވެ. ޔޫންގެ ޤާނޫނީ ވަކީލުންގެ ޓީމުން ވެސް ބުނެފައި ވަނީ އޭނާ ހައްޔަރަށް ގެންގޮސްފައި ވަނީ ޣައިރުޤާނޫނީ ކޯޓު އަމުރެއްގެ ދަށުން ކަމުގައެވެ. އަދި، އޭނާއާ ދެކޮޅަށް ތަޙުޤީޤެއް ހިންގުމުގެ ދުސްތޫރީ ބާރު ސީއައިއޯއަށް ލިބިގެން ނުވާ ކަމުގައެވެ. ކޯޓު އަމުރުގައި ސިފަކޮށްފައި ވަނީ ޔޫނަކީ ދައުލަތާ ދެކޮޅަށް ފިތުނަވެރި އަމަލެއް ހިންގުމުގެ ވެރިޔާގެ ގޮތުގައެވެ.

ކުއްލިހާލަތުގެ އަމުރާ އެކު ދެކުނު ކޮރެޔާއަށް ސިހުން

ޑިސެންބަރު 3ވަނަ ދުވަހު ކުއްލި ޙާލަތު އިޢުލާނު ކުރެއްވުމަށް ފަހު، ޤާނޫނުހަދާ މަޖިލީހާއި ޢާންމުންގެ ފަރާތުން ކުރިމަތިވި ނުރުހުމާއި ފިއްތުންތަކާ ގުޅިގެން މަޑު ގަޑިއިރުތަކެއްގެ ތެރޭގައި ޔޫން ވަނީ އެ ނިންމުން ބާޠިލު ކުރައްވާފައެވެ. ނަމަވެސް، ކުއްލިހާލަތުގެ އަމުރު ތަންފީޒު ކުރުމަށް އޭނާ ވަނީ ޤާނޫނު ހަދާ މަޖިލީހަށް ސިފައިން ފޮނުވާފައެވެ. އަދި، އޭނާއާ ދެކޮޅަށް އިތުބާރު ނެތް ކަމުގެ މައްސަލައެއް ހުށަހެޅުމަށް މަސައްކަތް ކުރުމުން އެ ކަން ހުއްޓުވަން ފިޔަވަޅުތަކެއް އަޅުއްވާފައެވެ. ޤާނޫނުހަދާ މަޖިލީހުގެ އިމާރާތުގެ ތެރެއަށް ހަތިޔާރު އެޅި ސިފައިން ވަނުމާ ގުޅިގެން، ސިފައިންނާއި މަޖިލީހުގެ މުވައްޒަފުންނާ ދެމެދު ހަމަނުޖެހުންތަކެއް ހިނގިއެވެ.

ކުއްލިހާލަތު އިޢުލާނު ކުރައްވަން ޔޫން ނިންމެވުމަކީ ދެކުނު ކޮރެޔާގެ ރައްޔިތުންނަށް ސިހުން ގެނުވި އަމަލެކެވެ. އަދި، އޭޝިޔާ ބައްރުގެ ހަތަރުވަނައަށް އެންމެ ބޮޑު އިޤުތިޞާދަށް ސިޔާސީ ލޮޅުންތަކެއް ގެނުވި ނިންމެވުކެވެ. ދެކުނު ކޮރެޔާއަކީ އެމެރިކާއާ ގާތް ގުޅުންތަކެއް ބާއްވަމުންދާ، ސަލާމަތީ ދާއިރާއިން އެމެރިކާގެ މުހިންމު ބައިވެރިއެކެވެ. ރައީސް ކަމުގެ މަޤާމުގެ ބާރާއި ނުފޫޒު ބޭނުން ކުރެއްވުމުގެ ކުށެއް ޔޫން ކުރައްވާފައިވާ ކަމަށް ދެކުނު ކޮރެޔާގެ ޤާނޫނު ހަދާ މަޖިލީހުން ފާސްކޮށްފައި ވަނީ ޑިސެންބަރު 14ވަނަ ދުވަހުއެވެ.

ޔޫނާ ދެކޮޅަށް ދުސްތޫރީ ކުށެއްގެ ދަޢުވާ ސާބިތުވެފައިވުމާ ގުޅިގެން ދެކުނު ކޮރެޔާގެ ދުސްތޫރީ ކޯޓުން ވަނީ އޭނާގެ ޝަރިޢަތް ފަށާފައެވެ. މިއީ، އޭނާއާ ދެކޮޅަށް ސީއައިއޯން ތަޙުޤީޤު ކުރަމުންދާ މައްސަލަތަކާއި ވަކިން ހިންގާ ޝަރިޢަތެކެވެ. ދުސްތޫރީ ކޯޓުގައި ފަށާފައިވާ ޝަރިޢަތުގައި ޔޫން ރައީސް ކަމުގެ މަޤާމުގައި ދެމިހުންނެވުމާ މެދު ގޮތެއް ނިންމާނެއެވެ.

ދެކުނު ކޮރެޔާ ސިޔާސީ ހަމަނުޖެހުން ގަނޑެއްގެ ތެރެއަށް ވެއްޓިފައިވާ މި ދަނޑިވަޅުގައި އެމެރިކާއިން ވަނީ އެ ޤައުމުގެ ސަރުކާރާ އެކު މަސައްކަތް ކުރުމުގައި ދެމިއޮންނާނެ ކަމުގައި ބުނެފައެވެ. އަދި، ޖަޕާނުން ވަނީ، ދެކުނު ކޮރެޔާގެ މަސްރަޙު ވަރަށް ގާތުން ބަލަމުންދާ ކަން ހާމަކޮށްފައެވެ. އެއީ، ދެކުނު ކޮރެޔާގެ އެންމެ ގާތް ދެ އެކުވެރިންނެވެ.