ވައިޑް-ބޮޑީ މަތިންދާބޯޓުން ޗައިނާއިން އަހަރަކު 40،000 ފަތުރުވެރިން ގެނެވޭނެ: ވަޒީރު ފައިސަލް

މޯލްޑިވިއަންގެ ވައިޑް-ބޮޑީ މަތިންދާބޯޓުގެ ދަތުރުތަކާއިއެކު ޗައިނާއިން އަހަރަކު 40،000 ފަތުރުވެރިން ރާއްޖެއަށް ގެނެވޭނެކަމަށް ފަތުރުވެރިކަމާބެހޭ ވަޒީރު އިބްރާހީމް ފައިޞަލް ވިދާޅުވެއްޖެއެވެ. ވަޒީރު މިހެން ވިދާޅުވީ ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުންނެވެ.

ޤައުމީ އެއަރލައިން، މޯލްޑިވިއަންގެ ޚިދުމަތަށް ފުރަތަމަ ފަހަރަށް ގެނައި ވައިޑް-ބޮޑީ މަތިންދާ ބޯޓަކީ 264 މީހުންގެ ޖާގައިގެ އެއަރބަސް އޭ330ގެ 200 ވޭރިއަންޓްގެ މަތިންދާބޯޓެކެވެ. މި ބޯޓު ރާއްޖެ ގެނެސްފައިވަނީ މިމަހުގެ 6 ވަނަ ދުވަހުއެވެ.

ޕީއެސްއެމްނިއުސްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުން ފަތުރުވެރިކަމާބެހޭ ވަޒީރު އިބްރާހީމް ފައިޞަލް ވިދާޅުވީ، މޯލްޑިވިއަންގެ ޚިދުމަތައް ވައިޑް-ބޮޑީ މަތިންދާބޯޓު ގެނައުމަކީ ރާއްޖޭގެ ފަތުރުވެރިކަމަށް ލިބިގެންދިޔަ ވަރަށް ބޮޑު ކުރިއެރުމެއްކަމަށެވެ. ކޮންމެ ޤައުމެއްގެވެސް ޤައުމީ އެއަރލައިން ވަރުގަދަވެގެން ދިއުމަކީ އެ ޤައުމަކަށް ލިބޭނެ ވަރަށް ބޮޑު ކުރިއެރުމެއްކަމަށް ވަޒީރު ވިދާޅުވިއެވެ.

މޯލްޑިވިއަންގެ ވައިޑް-ބޮޑީ މަތިންދާބޯޓުގެ ފުރަތަމަ ދަތުރު ކުރުމަށް ހަމަޖެހިފައިވަނީ މިމަހުގެ 21ވަނަ ދުވަހު ޗައިނާގެ ޗެންޑޫއަށެވެ. ވަޒީރު ފައިޞަލް ވިދާޅުވީ، މި ދަތުރުތަކާއިއެކު ޗައިނާއިން އަހަރެއްގެ މައްޗަށް 40،000 ފަތުރުވެރިން ރާއްޖެ ގެނެވޭނެކަމަށް ލަފާކުރެވޭކަމަށެވެ.

"މިހާރު މި ގެނެވުނު އެއަރކްރާފްޓްއިން 40،000 ފަތުރުވެރިން ޗައިނާއިން ގެނެވޭނެ. އެއީ ވަރަށް ބޮޑު ކުރިއެރުމެއް. މި ރިސްކު ނެގުން އެއީ މީގެ ކާމިޔާބީއަކީ" ވަޒީރު ވިދާޅުވިއެވެ.

މޯލްޑިވިއަނުން ވައިޑް ބޮޑީގެ ދަތުރުތައް ޗައިނާގެ ތިން ސިޓީއަކަށް ކުރުމަށް ވަނީ ހަމަޖެހިފައެވެ. އެއީ ބެއިޖިން، ޝެންހާއީ އަދި ޗެންޑޫއެވެ. މި ބޯޓުގައި ތިން ކެޓަގަރީގެ ފަސިންޖަރުންނަށް ޚިދުމަތްދެވޭނެއެވެ. އެއީ އިކޮނޮމީ ކްލާސް، ބިޒްނަސް ކްލާސްގެ އިތުރުން ޕްރިމިއަމް ކްލާސްއެވެ.

ޗައިނާއަކީ މިދިޔަ އަހަރު ރާއްޖެއަށް އެންމެ ގިނަ އަދަދަކަށް ފަތުރުވެރިން އައި ޤައުމެވެ. މިދިޔަ އަހަރު ޗައިނާއިން ރާއްޖެއަށް 2 ލައްކައަށްވުރެ ގިނަ ފަތުރުވެރިން ވަނީ ޒިޔާރަތްކޮށްފައެވެ.